1 Amwene 16
16
Jewu ohofiyiheda mazu omutonga mwene Baaza
1Mazu a Yehova ommanga mulandu mulombwana Baaza kohozaga wa Jewu mwana Anani ira: 2<<Miyo duhuvenyiha vatumbulruni vevo vali we eto dusakanya ira weyo ukale musogolrelri wa atwaga aIzarayeli. Mbwenye weyo unahara ndila da Jerobowawu eto unnana ategiha atwaga aIzarayeli, aliwa tatamulaga takaleliwa waga na mwasa wa jotega jewa. 3Na mwasa wenno miyo nnoutolotcha we Baaza vamohi na atu atene a muibalini mwawo eto nnoairana atu a muibalini mwawo na makalelo nnga dimuirele miyo Jerobowawu mwana Nebati. 4Nyo atu a muibalini mwa Baaza mwafunaga kwa, atu anne anakwele musidadi anerege takuniwa na anambwa. Eto ale anafuna kwela mukokolani, anadjiwege na mbalrame dovava zulu.>> 5Joira jimohi jiwa ja mwene Baaza vamohi na mabasa matene alabile liye, vamohi na kopolo daye, jinafwanyeya jagalrembiwe mulivuruni mwa Joira ja Amwene a Izarayeli. 6Noira enne, mwene Baaza ohokwa, liye dowa vuma na makolo aye, liye dowa koyiwa sidadi ya Tiriza. Mwa enne mwanaye Elaa gwahambile umwene vamalroni vaye.
7Mwene Baaza ahanakwe, mazu a Yehova ommanga mulandu Baaza na atu a muibalini mwaye kohozaga wa namafiyiheda Jewu mwana Anani na mwasa oira Baaza osakanya jabure jaira liye vamentoni va Yehova, liye tatamulaga takaleliwa wa Yehova, liye kalaga nnga mulombwana Jerobowawu na atu a muibalini mwaye. Eto omangiwa mulandu na mwasa oira mulombwana Baaza gwaatolotchile atu a muibalini mwa Jerobowawu.#16:7 na mwasa oira mulombwana Baaza gwaatolotchile atu a muibalini mwa Jerobowawu: Mulugu gwawongile ira akuda Jerobowawu atene anoza kapiwe. (1 Amwene 14:10-11) Aapile atwale ali Baaza. Eto Mulugu kamurumile Baaza ira adowe aape atwale. Nona agaapile atwale, Mulugu ohommanga mulandu Baaza. Tchoira Mulugu unomutonga mutu osakanya yengo yabure masiki akwakwanelihedaga funa wa Yehova. Kalaga nnga Judasi na Pilatu na atu atene kampile Yesu kohofwanyeyana mulandu agali kakwakwaneliheda funa wa Mulugu. (Matewuji 26:24; Joira ja Anamarumiwa 2:23, 4:25-28)
Tonga wa Elaa, mwene wa Izarayeli
8Elaa mwana Baaza aromile atonga aIzarayeli sidadi ya Tiriza mwene Aza agamanle yaka 26 aatongaga aJuda. Liye atongile yaka mbinli. 9Muwari mwa andimuwa a umwene waye, ohokalamo mmohi aitaniwa Zimiri, wenno asogolrelra pandi imohi ya maaterelado aye a kondoni. Zimiri ule ohompanganela ira ampe. Fwanyeya ira mwene Elaa ang'waga eto alrezelraga vande va Ariza, musogolrelri wa palasiyoni waye sidadi ya Tiriza, 10Zimiri ohoza volowa mmba mule, liye mpa mwene Elaa. Jejo jaireya Aza agamanle yaka 27 aatongaga aJuda. Noira eno, Zimiri ule ohokala mwene vamalroni vaye. 11Mwa enne liye agagaratile vampandoni, agaromile tonga, ohatolotcha alombwana atene a muibalini mwa Baaza vamohi na afwaye atene, nne mmohi kamuhiyile.#16:11 Zimiri ohatolotcha alombwana atene a muibalini mwa Baaza. Muwari moapa atu pwi, liye kamuhiyile mutu ofuna muweliheda kunyakunya sogolro. 12Mwa enne mulombwana Zimiri ohatolotchaga atu atene a muibalini mwa Baaza molingana na mazu a Yehova awongile liye muwari mwa namafiyiheda Jewu zela mulombwana Baaza 13na mwasa wa jotega jatene ja Baaza vamohi na jotega jatene ja mwanaye Elaa, na jotega jejo jaategihilena atu aIzarayeli na vikwamutu josema jewa, katatamulaga takaleliwa wa Yehova Mulugu wa Izarayeli. 14Joira jimohi jiwa ja mwene Elaa vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Izarayeli.
Tonga wa Zimiri, mwene wa Izarayeli
15Aza agali mwene wa Juda, vagamanle yaka 27 atongaga, tchi tempu yaroma mulombwana Zimiri tonga sidadi ya Tiriza. Zimiri ule atongile malambo matanu na menli bahi. Fwanyeya ira liye atongaga Tiriza ule, anyakondo atene kakungile misasa diwa sidadi ya aFilistewu inaitaniwa Jibetomi. 16Anyakondo ale kagavwile ira: <<Mulombwana Zimiri uhumurungunuwela mwene wehu fiyeda mpa!>>, siku nimohive nenne kagali vamisasani viwa evale, atene kohomuhambihaga musogolrelri wewa wa anyakondo aitaniwa Omiri, liye kala mwene wa Izarayeli. 17Noira enne, mwene Omiri vamohi na anyakondo aye a Izarayeli atene kohomaruwaga Jibetomi ule, aliwa za irindja sidadi ya Tiriza. 18Evale mwene Zimiri agaonne ira sidadi yafwanyeya liye ile yohomala gondjihiwa, ohovolowaga nyumbaye ya umwene, liye vitumeyela mmba emule ekave, fiyeda kwela emule. 19Liye akwele na mwasa wa jotega jairilena liye, asakanyaga jabure vamentoni va Yehova, liye wendaga ndila imohive ya Jerobowawu eto liye haraga yotega imohive ya Jerobowawu aategihaga aIzarayeli. 20Joira jimohi jiwa ja mwene Zimiri vamohi na makalelo amurungunuwenle liye mwene waye afiyeda mpa, jinafwanyeya jagalrembiwe mulivuruni mwa Joira ja Amwene a Izarayeli.
Tonga wa Omiri, mwene wa Izarayeli
21Noira enne, aIzarayeli kohovigawa makuru menli. Metadi ya aIzarayeli kohomuhara Tibini mwana Jinati ira kamuhambihe akale mwene eto aIzarayeli metadi amohiwa kamuhara mwene Omiri. 22Mbwenye ale kamuhara mulombwana Omiri kali a kopolo akwaranya ale kamuhara Tibini mwana Jinati. Eto mulombwana Tibini ohokwa. Mbwenye Omiri ohalave atongaga. 23Aza agamanle yaka 31 aatongaga aJuda, tchi tempu Omiri aromile liye atonga aIzarayeli. Liye atongile yaka kumi na mbinli. Muwari mwa yaka kumi na mbinli dile, yaka tanu na imohi damanle atongaga sidadi ya Tiriza. 24Mwa enne ohodowa gula mwango wa Samariya na mundimuwa mmohi aitaniwa Semeri. Agunle mwangole na parata okwakwana kilu 70. Noira enne, ohomangaga vamwangoni vale sidadi yowereweriha na muru tawiha amwidani, liye vaha sidadile nzina na Samariya na mwasa wa nzina na Semeri wenno ali mwinnya murandji wa mwangole.
25Eto mulombwana Omiri ohosakanya jabure vamentoni va Yehova. Eto liye gwasimbwile sakanya jabure akwaranya amwene atene kaliwo liye ahanakale mwene. 26Liye eto ohowenda mundilani mwatene mwavirile Jerobowawu mwana Nebati, vamohi na jotega jatene jejo jaategihilena liye aIzarayeli, atatamulaga uwali wa Yehova Mulugu wa Izarayeli na mwasa wa vikwamutu josema. 27Joira jimohi jiwa ja mwene Omiri, na mabasa matene alabile liye vamohi na kopolo daye, jinafwanyeya jagalrembiwe mulivuruni mwa Joira ja Amwene a Izarayeli. 28Noira eno, Omiri ohokwa, liye dowa vuma na makolo aye, liye koyiwa sidadi ya Samariya. Eto mwanaye Akabe gwahambile umwene vamalroni vaye.
Tonga wa Akabe, mwene wa Izarayeli
29Mwene Aza agamanle yaka 38 aatongaga aJuda, tchi tempu Akabe mwana Omiri aromile liye atonga aIzarayeli. Akabe atongile yaka 22 sidadi ya Samariya. 30Fwanyeya Akabe mwana Omiri ohosakanya jabure vamentoni va Yehova na makalelo okwaranya amwene atene kaliwo liye ahanakale mwene. 31Muwari moira liye kaonne yotega ya Jerobowawu mwana Nebati nnga yengo, liye ohosakanya yotega yokwaranya, liye mutela Jezabeli,#16:31 Jezabeli ali muhiyana okumela Sidoni, amuhara mulugu aitaniwa Baali eto omuholotcha mamunaye ira amuharege mulugu mmohiwene. (21:25-26) Liye eto gwaadjiha anamakuta 450 a Baali vamohi na anamakuta 400 a mulugu mmohiwene eriwa Azera (18:19) eto ohompiha mutu ohokana mulandu ira amuwake mundaye. (21:7-16) Liyene eto ohapa anamafiyiheda a Mulugu (2 Amwene 9:7) eto gwafunne ira ampe Eliya. (19:1-3) mwana Etibali, mwene wa Sidoni. Agamutenle ohoroma tamalelaga ikwamutu yosema yaitaniwa Baali eto liye ikokorelaga. 32Liye ohomanga nyumba ya Baali sidadi ya Samariya, liye sakanya ibuwa ya mulugu waye mmba mule. 33Eto mulombwana Akabe ohosakanya nimbozo nofwalrafwaniha mulugu Azera, fiyeda tatamula takaleliwa wa Yehova Mulugu wa Izarayeli, kwaranya makalelo airile amwene atene kaliwo liye ahanakale mwene.
34Muwari mwa yaka datonga mwene Akabe, mulombwana mmohi aitaniwa Hiyeli nkuda Beteli, ohomanga akoka sidadi ya Jeriko. Nnga mwemo mwawongele Yehova muwari mwa mulombwana Jozuwe mwana Numi, mulombwana Hiyeli amangaga maaliserisi a sidadile, ohokweliwa mwanaye wa mwanapongwe murandji baliwa aitaniwa Abirawu. Eto ahelaga milango da sidadile, ohokweliwa mwanaye wa mwanapongwe ogomiheda baliwa aitaniwa Segube.#16:34 Nnga mwemo mwawongele Yehova muwari mwa mulombwana Jozuwe mwana Numi: Nione Jozuwe 6:26, zela mazu matene otembelrelra awongile Jozuwe zela mutu wenne afuna venyiheda sidadi ya Jeriko. Mazu awongile liye kohokwakwanela.
Currently Selected:
1 Amwene 16: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
