1 Amwene 15
15
Tonga wa Abiya mwene wa Juda
1Mwene Jerobowawu mwana Nebati agamanle yaka 18 aatongaga aIzarayeli, tchi tempu Abiya aromile liye atonga aJuda. 2Abiya ule atongile yaka taru akalaga muJeruzalemu. Mmaye ali mwana Abisalawu wenno aitaniwa na nzina na Maka. 3Mwene Abiya ohoirana jotega jatene jejo jairilena babaye tempu yatonga liye eto murimaye kaali okwakwanela vamentoni va Yehova Mulugu waye nnga vere mbwiyaye Davi. 4Masiki eno, Yehova Mulugu waye na mwasa omuzivela Davi, ohonvaha Abiya wareya muJeruzalemu. Wareya uwa, anvenyihile mwanaye ira ahale vamalroni vaye eto ira alimbihe Jeruzalemu.#11:36 5Tchoira Davi ohosakanya jengo jofwanela vamentoni va Yehova, nne kahiyile jatene jejo jamuwandenle Yehova kalawo waye watene. So mbwenye yoviringaniha yaye ali zela nkani wa Uriya muEti ule.#15:5 Muselu wa Uriya unafwanyeya 2 Samuweli 11:1-27.
6Abiya okana wanawana na Jerobowawu kalawo waye watene nngave wanawana wanna babaye Robowawu na Jerobowawu. 7Joira jimohi jiwa ja mwene Abiya vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda. Eto wohokala wanawana zela Abiya na Jerobowawu. 8Mulombwana Abiya ohokwa, liye dowa vuma na makolo aye, liye koyiwa sidadi ya Davi. Noira enne, mwanaye Aza gwahambile umwene vamalroni vaye.
Tonga wa Aza, mwene wa Juda
9Jerobowawu mwene wa Izarayeli agamanle yaka 20 aatongaga aIzarayeli, tchi tempu mwene Aza aromile liye atonga aJuda. 10Aza ule amanle yaka 41 atongaga Jeruzalemu. Mbwiyaye wa muhiyana#15:10 Mbwiyaye wa muhiyana MaBibiliya amohiwa anawonga mmaye. ali mwana Abisalawu wenno aitaniwa Maka. 11Mulombwana Aza ohosakanya jofwanela vamentoni va Yehova na makalelo nnga vere mbwiyaye Davi. 12Tchoira liye ohakumihamo mwilamboni mule alombwana anno kararuwa muwari mwa sanganiko da amilugu ewa eto ohokumihamo vikwamutu josema jatene jasakanyile makolo aye. 13Eto Aza ohomuwaka mbwiyaye wa muhiyana Maka undimuwa wanna liye okala mwene mmaye.#15:13 Malambo a mundulrimu amwene koavaha ammiwa izo ya vang'ono muumweneni mwewa. Afwase kovahiwa izo yomuwelruza mwene owu hehi aliwa kowonga na nzina na mwene. Mbwenye Asa ohomuwaka… Maaka undimuwa wanna liye okala mwene mmaye mwasiwa liye ali ohara vikwamutu josema. Mwasiwa liye ohosakanya nimbozo ira nikale nnga yofwalrafwaniha ya mulugu wewa Azera ira aitamalelege. Aza ohobwanyula nimbozo nne, liye dowana ndabo na Sedoromi, liye tumeya. 14Mbwenye mamburo otama ovelela mikuto wa amilugu, liye kagumunle. Masiki eno murima waye watene ali omuhara Yehova kalawo waye watene. 15Liye ohotukulaga parata na oru vamohi na jolabana jatene jejo jatchenihile babaye vamohi na jejo jatchenihile liye, liye dowana Nyumba ya Yehova.
16Eto vohokala wanawana zela mulombwana Aza vamohi na Baaza mwene wa Izarayeli kalawo wewa watene. 17Tchoira mulombwana Baaza, mwene wa Izarayeli ohodowa mwilamboni mwa Juda, liye roma manga muru ira awerewerihe sidadi yatene ya Rama ira ahakalevo unafuna kuma nne volowa mwilamboni mwa Aza mwene wa Juda. 18Mwa enne mulombwana Aza ohotukulaga parata vamohi na oru watene ahanle munyumbani yokoyamo ja Yehova, vamohi na nyumba yaye ya umwene, liye avaheda anamalabaye ira kadowe kanfwanye mwene mmohiwene aitaniwa Beni-Hadade, mwana Tabiriyomi, muzula wa Heziyomi, mwene wa Siriya wenno akaletcha sidadi ya Damaxiku. 19Mwene Aza ule aarumaga anamalabaye ale ohawandelaga eraga: <<Mudowe mwanvahe eji mwene wa Siriya, muire: <Nnafuna ira nisakanye yopangana yowandana nnga wandana wanna ababihu. Eto eni oru vamohi na parata ula, ti mivaho nnaurumihedani miyo. Nnafuna ira mugwade yopangana yowandana yenno inna nyo na Baaza, mwene wa Izarayeli, mudowe mwawane na liye ira liye akumemo mwilamboni mwaga.> >> 20Mwa enne mulombwana Beni-Hadade ohorumela yovepa ya mwene Aza. Oharumaga asogolrelri aye a anyakondo ira kadowe kawane na sidadi da Izarayeli. Kohogondjihaga sidadi ya Ijomi, Dani, Abeli-Bete-Maka, na ilambo yatene ya Kinereti vamohi na ilambo yatene ya Nafitali. 21Mwa enne mwene Baaza agavwile, ohiya manga waye muru wa sidadi ya Rama, liye gundeya dowa kala Tiriza. 22Mwa enne mwene Aza ohawandela alombwana atene a Juda ira kaze, nne mutu mmohi kahale, ira kadowe katukule mabwe matene vamohi na matabwa matene kafwanyeya Rama anno amangana mulombwana Baaza. Evale Mwene Aza ohotukulaga jomangana jile, liye dowa limbihana sidadi ya Jeba yenno yafwanyeya munlogoni mwa Benjami eto ohodowa limbihana sidadi ya Mizipa. 23Joira jimohi jiwa ja mwene Aza, vamohi na kopolo daye datene, na mabasa matene alabile liye, vamohi na sidadi datene damangile liye, jatene jejo jinafwanyeya jagalrembiwe mulivuruni mwa Joira ja Amwene a Juda. Eto fwanyeya ira mwene Aza aululaga ohokana urenda opiwa manyalo. 24Mwene Aza ohokwa, liye dowa vuma na makolo aye, liye koyiwa wewo wakoyiwe makolo aye, sidadi ya mbwiyaye Davi. Mwa enne mwanaye Jozafa gwahambile umwene vamalroni vaye.
Tonga wa Nadabe mwene wa Izarayeli
25Nadabe mwana Jerobowawu aromile atonga aIzarayeli, mwene Aza agamanle yaka mbinli aatongaga aJuda. Liye aatongile aIzarayeli yaka mbinli. 26Liye ohosakanya jabure vamentoni va Yehova, liye haraga ndila dedo dahara babaye eto ohategiha aIzarayeli na makalelo mamohive nnga airile babaye.
27Eto fwanyeya ira mwene Nadabe vamohi na aIzarayeli kohodowa, aliwa mala rindja sidadi imohi ya aFilistewu yeriwa Jibetomi. Kagali wewule, ohokala mulombwana mmohi eriwa Baaza, mwana Ayiya, wa nlogo na Isakari apanganenle na afwaye ira kampe mwene Nadabe. Evale Baaza ule ohompa mwenole agali sidadi ya Jibetomi ile. 28Baaza ampile Nadabe yaka yaneraru yatonga mwene Aza ilambo ya Juda. Nompa, liye ohohamba umwene vamalroni vaye. 29Baaza nokala mwene, yengo yoroma yalabile liye ali apa atu atene a muibalini mwa Jerobowawu. Nne mmohi kamuhiyile. Ohatolotcha atene molingana na mazu awongile Yehova#15:29 molingana na mazu awongile Yehova: Yehova ohowonga zela tolotchiwa wa abali a Jerobowawu na mwasa wa yotega yasakanyile Jerobowawu ule. Nione 1 Amwene 14:10, mazu awongile namafiyiheda Ayiya na mwadi Jerobowawu. muwari mwa muzari waye Ayiya nkuda Silo. 30Jejo jaireyile na mwasa wa jotega jairile mulombwana Jerobowawu eto na mwasa oira liye ohategiha aIzarayeli eto na mwasa oira liye ohotatamula takaleliwa wa Yehova Mulugu wa Izarayeli.
31Joira jimohi jiwa ja mwene Nadabe vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Izarayeli.
32Fwanyeya ira wohokala wanawana zela Aza na Baaza mwene wa Izarayeli, kalawo wewa watene.
Tonga wa Baaza, mwene wa Izarayeli
33Baaza mwana Ayiya aromile atonga aIzarayeli atene ilambo ya Tiriza, mwene Aza agamanle yaka taru aatongaga akuda Juda. Baaza agagwenle vampandoni, atongile yaka 24. 34Liye ohosakanya jabure vamentoni va Yehova, ohara ndila da Jerobowawu eto ohategiha aIzarayeli na makalelo mamohive nnga aategihile Jerobowawu.
Currently Selected:
1 Amwene 15: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
