1 Amwene 14
14
Namafiyiheda Aiya ohowonga zela tongiwa wa mwene Jerobowawu
1Mwa tempu yenne, mwana Jerobowawu mmohi wa mulombwana aitaniwa Abiya, ohokala murenda. 2Mwa enne mwene Jerobowawu ohowonga na muhiyanaye eraga: <<Kavenya uware jowara jimohi jiwa jene#14:2 jowara jimohi jiwa jene: Tempu yenne mwadi mwene okana jowara jawara liye jotonyiheda ira gu mwadi mwene. Mamunaye afuna ira liye awungule jowara jejile ira aware jowara ja vaheno vene ira adowaga atu kahamuone ira ali mwadi mwene. ira wahaoniwe ira uli mwadi Jerobowawu, udowe sidadi ya Silo, wanfwanye namafiyiheda Ayiya, wenno awongile zela miyo ira nnokala mwene wa aIzarayeli. 3Eto wadowaga utukule pawu kumi na mabolu vamohi na garafwa nimohi na nuwi. Wadowa wewule, liye unouwandela zela yenno inafuna muireyela muzombwela.>>
4Mwadi Jerobowawu ohoiragana nnga mwemo mwamuwandenle mamunaye. Liye ohomaruwaga, liye dowa sidadi ya Silo, dowa fiya vande va Ayiya. Fwanyeya ira mulombwana Ayiya kaona na mwasa oira liye ohomala ulula. 5Mbwenye ahanafiye Yehova ohomuwandelaga namafiyiheda Ayiya, liye kwi: <<Mwadi Jerobowawu unaza ira aufuke zela mwanaye, mwasiwa unafwanyeya murenda. Mbwenye liye afiya unovikaliha nnga gu muhiyana mmohiwene hiya kala mwadi Jerobowawu. Liye afiya umuwandele eni, eni, eni.>>
6Mwa enne mulombwana Ayiya agavwile migugudo da mwadi Jerobowawu azaga va mulango, liye ohowongaga eraga: <<Kavolowa mwadi Jerobowawu! Kodi mwasiwa gwa nni we vikalihaga nnga muhiyana mmohiwene? Tchoira miyo dihirumiwa ira duwandele milanyo dowopiha. 7Uvenye udowe wamuwandele mamunawo Jerobowawu ira: <Yehova Mulugu wa Izarayeli unawonga eni: <<Miyo duhulukuliha weyo vari va atu adjindji, duhusakanya weyo kala musogolrelri wa atwaga aIzarayeli, 8eto dihikawula umwene wafwanyeyana atu a muibalini mwa Davi eto duhuvaha weyo, mbwenye weyo kufunile kala nnga namalaba waga Davi wenno aharihile malamulo aga eto wenno adiharile na murimaye watene airagana jofwanela vamentoni vaga. 9Weyo mbwenye uhusakanya ubure ulukulu kwaranya atene kavirile mundulri mwawo. Weyo uhudowa asakanya amilugu amohiwa, vamohi na vikwamutu dimohi donyungulrutchiwa. Uhuwanda irana jatene jejo we tatamulaga takaleliwa waga eto weyo uhuditatilela unduli wawo. 10Nona miyo nnozana ubure muibalini mwa mulombwana Jerobowawu. Eto nnoapa alombwana atene a Jerobowawu vamohi na ahimene, masiki kala muzari nari ohokala muzari ira kahafwanyeye mwilamboni mwa Izarayeli. Eto nnoatatilela unde ahima a Jerobowawu kalaga nnga makalelo anatatiliwa mambi, fiyeda atene kamale tolowa.#14:10 Mazwala kohokwakwanela sogolro. Nione Nione 1 Amwene 15:29. 11Zela mutu uli watene wa Jerobowawu, unakwele musidadi unerege takuniwa na anambwa eto ule unafuna kwela mukokolani, unadjiwege na mbalrame dovava zulu. Mwasiwa unawonga gu Yehova!>> > >>
12Namafiyiheda Ayiya ohomuwongaganave mwadi Jerobowawu eraga: <<Weyo mbwenye uvenye udowege waninyu. Tempu inanyingalihege we manyalo awo musidadi, mwanawo wenno uli murenda unokwa tempu imohive. 13Eto aIzarayeli atene anomunlela eto anodowa kamukoye. Muwari mwa atu atene a Jerobowawu, liyene bahi gunafuna koyiwa masiyeni, mwasiwa muwari mwa atu atene a muibalini mwa Jerobowawu, Yehova Mulugu wa Izarayeli unfwannyena upama liyene bahi. 14Mbwenye tchineneva eni Yehova unonvenyiha mwene waye mmohiwa wenno unafuna atongaga aIzarayeli. Liye gunafuna atolotcha atu a muibalini mwa Jerobowawu siku niwa nafiya. Eto jejo jinafuna jiireye tchineneva. 15Eto Yehova unoza aaporotche aIzarayeli ira karome denguma nnga murere adengumaga mwiko. Yehova unoadula aIzarayeli ilambo yapama yenno yaavahile liye makolo ewa. Agaadunle, unoabalaletcha ira kadowe kombela ya muhindje Eufarati mwasiwa aliwa kohomutakaleliwiha Yehova muwari mosakanya mambozo a mulugu wewa Azera ira kamutamalelegevo. 16Mulugu unoanyanyala aIzarayeli na mwasa wa jotega ja mwene Jerobowawu tchoira liye uhutega eto uhategiha aIzarayeli.>>
17Noira enne, mwadi mwene Jerobowawu ohovenyihana, liye welela Tiriza. Afiyaga wene vande vale, agali va mulango vene, mwanaye ule ohokwa. 18Agakwile, aIzarayeli atene kohomukoya mwanole eto kohomunlela molingana na mwemo mwawongele Yehova muwari mwa namalaba waye namafiyiheda Ayiya.
19Joira jimohi jiwa ja mwene Jerobowawu, vamohi na kondo daye datene, vamohi na makalelo atongile liye, jatene ejo jinafwanyeya jagalrembiwe mulivuruni mwa Joira ja Amwene a Izarayeli.#14:19 mulivuruni mwa Joira ja Amwene a Izarayeli. Tempu yalrembiwa mazwala afwase livuru neni nohokalawo. Mbwenye peno kaniliwo. 20Jerobowawu atongile yaka 22, noira eno ohokwa, liye dowa vuma na makolo aye. Noira enne, mwanaye aitaniwa Nadabe gwahambile umwene vamalroni vaye.
Tonga wa mulombwana Robowawu mwene wa Juda
21Mulombwana Robowawu mwana Salomawu ali mwene wa Juda. Liye aromaga tonga anna yaka 41. Eto agagwenle vampandoni, atongile yaka 17 muJeruzalemu, sidadi yenno Yehova asakunlre liye muwari mwa malogo matene a Izarayeli ira katamalelege wewo nzina naye. Mulombwana Robowawu mmaye ali nkuda Amoni wenno aitaniwa Naama.#14:21 Robowawu mmaye ali nkuda Amoni: Fwanyeya ira Robowawu mmaye kaali muhiyana ofwanela ira babaye amutele mwasiwa Mulugu ohakameliha aIzarayeli atela anamwali a Amoni mwasiwa aliwa kohokana amilugu kahara atu. Nione 1 Amwene 11:1,7.
22AJuda kohosakanya jabure vamentoni va Yehova eto aliwa kohotatamula sandje ya Yehova kwaranya makalelo kairile makolo ewa muwari mwa jotega jewa jatene. 23Mwasiwa aliwa kohomanga mamburo otama ovelela mikuto wa amilugu vamohi eto kohoimetcha mambozo amohiwa a mulugu wewa Azera. Mamburo anno kafwanyeya vazulu va mikuma datene dogwela vamohi na vati va mitengo datene da matakuru gubugubu. 24Eto mwilamboni mohokala atu kararuwetcha muwari mwa sanganiko diwa dohara amilugu ewa.#14:24 mwilamboni mohokala atu kararuwetcha muwari mwa sanganiko diwa dohara amilugu ewa. Wanle atu anne kahara amilugu amohiwa, muwari moharihamo sanganiko dewa, kafunaga ira yengo yafuna atu iireye, kohokana makalelo oraruwa. (Detoronomiyo 23:17) Kalaga nnga sanganiko ang'anga ananvaha atu mutu afunaga rayela. Evale aJuda koirana jotakaletchetcha jatene jejo jairetchana malogo anne Yehova aatamangihile liye vasogolro va Ana Izarayeli ira aliwa kakalegemo.
25Fwanyeya ira yaka yanetanu ya umwene wa Robowawu, Sizaki mwene wa Ijipitu ohoza, liye gondjiha sidadi ya Jeruzalemu. 26Agagondjihile, ohotukulaga jorayela jakoyiwe muNyumbani mwa Yehova vamohi na jorayela jakoyiwe munyumbani mwa mwene vamohi na jatene jene. Liye eto ohotukula defeza datene da oru dedo dasakanyile Salomawu.#14:26 Zela sakanyediwa wa defeza datene da oru dile, nione 1 Amwene 10:16-17; 2 Koronika 9:15-16.
27Na mwasa wenno, vamalroni va defeza datukuliwe dile, mwene Robowawu ohosakanyaga defeza da mukuwa, liye avaheda andimuwa a agwarda, anno kaing'aneletcha va mulango va nyumba ya mwene. 28Mwa enne mwene avenya, adowaga Nyumba ya Yehova, agwarda ale konvelelana, amala aliwa welana, za hiya nimburo nakoka nene nokoyamo ja agwarda.
29Joira jimohi jiwa ja mwene Robowawu, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda. 30Fwanyeya ira malambo matene a mwene Robowawu, liye ohokana kondo na mwene Jerobowawu. 31Evale mwene Robowawu ohokwa, liye dowa vuma na makolo aye, liye koyiwa wewo wakoyiwe ababaye sidadi ya Davi. Liye mmaye ali nkuda Amoni aitaniwa Naama. Liye agakwile, mwanaye Abiya gwahambile umwene vamalroni vaye.
Currently Selected:
1 Amwene 14: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
