1 Amwene 13
13
Namafiyiheda mmohi ohowonga zela bwanyuwa wa ibuwa yafwanyeya Beteli
1Mwa enne Yehova ohomuruma mutu mmohi wa Mulugu, liye kuma Juda dowa Beteli. Agadowile, anfwannye mulombwana Jerobowawu agali oimelene ibuwani ule ira atumeye jonukela. 2Liye agafiyile, ohokuwaga mazu a Yehova akuwelaga ibuwele, awongaga eraga: <<We ibuwa we! Yehova unawonga ira: <Ukala mwanapongwe mmohi unafuna baliwa muibalini mwa Davi. Liye unaitaniwege Joziya. Liye abaliwa, unoatukula anamakuta a mamburo otama ovelela mikuto wa amilugu, anno anatumeya jonukela va weyo, liye unoapa anamakuta anno muwari mosakanya mukuto vazulu vawo. Eto makuva a atu kakwile wanle anoza katumeyiwe vazulu vawo.> >>#13:2 makuva a atu kakwile wanle anoza katumeyiwe vazulu vawo: Tempu yenno atu katumeya makuva a atu vaibuwani, ibuwele yomala takalihiwa eto tchalabana akoka. Zela kwakwanela wa mazwala, nione 2 Amwene 23:15-16. 3Siku nimohive nenne, mutu wa Mulugu ule ohosakanyaga ionihedo. Liye ohowongaga eraga: <<Ionihedo iwongile Yehova tchi ila. Ibuwa ila inobwanyuwa eto ndora nnafwanyeya vazulu va ibuwa ila nnomala mwadeya.>> 4Mwa enne mwene Jerobowawu agavwile mazu awongile mutu wa Mulugu ule zela ibuwa yali Beteli, mwenole agalive vaibuwani evale, ohomutonyaga eraga: <<Kammangeni mulombwanola!>> Mbwenye agawongile enne, muwono wenno amutonyilegena liye ohoummaga. Kawandaga vinda ira awelihewo. 5Mobaranya ibuwele yohobwanyuwa eto ndora nafwanyeya vazulu va ibuwa vale nohokutuwela vati mokwakwanela na ionihedo yenno yawongile mutu wa Mulugu mowandeliwa na Yehova. 6Mwa enne mwene Jerobowawu ohowongaga na mutu wa Mulugu ule eraga: <<Nnavepa ira mulobele vamentoni va Yehova Mulugu wenyu ira ndanda naga niwelele nnga mwakalele atu.>> Mwa enne mutu wa Mulugu ule oholobelaga vamentoni va Yehova, noira enne ndanda na mwene Jerobowawu nne nohowelelaga nnga mwakalele atu. 7Noira enne, mwene ule ohowongaga na mutu wa Mulugu ule eraga: <<Ndoweni vande vaga, mwavume eto dutambilriheni zela divulumutcha wenyu.>> 8Mbwenye mutu wa Mulugu ule ohomuwandelaga mwene ule eraga: <<Masiki ahakale nnga udivaha metadi ya jengo jatene ja vande vawo, miyo kadauhara, nne kadadja pawu, nne kadang'wa mahindje ilambo yenna. 9Tchoira Yehova uhudiwandela mazu ira: <Wadowa wewo, kudje pawu nne kung'we mahindje eto wawelagawo, kuhare ndila imohive yenno inafuna we hara wadowaga.> >> 10Mwa enne ohomaruwaga adowaga. Mbwenye kaharile ndila imohive yaharile liye adowaga Beteli ule. Aharile ndila imohiwene.
Piwa wa mutu wa Mulugu
11Sidadi ya Beteli ohokalawo namafiyiheda mmohi aulunle. Ahimaye kohomaruwaga, aliwa dowa nfwanya, muwandela zela jatene jairile mutu wa Mulugu siku nenne Beteli eto zela mazu matene awongile liye na mwene. 12Evale babiwa ule ohafukaga eraga: <<Liye uharile ndila tchivi?>> Evale ahimaye ale kohomutonyihedaga ndila yenno yaharilege mutu wa Mulugu wenno akumile Juda. 13Evale namafiyiheda ule ohawandelaga ahimaye ale eraga: <<Kahelani yogaratela vaburuni vaga.>> Evale ahimaye ale kohela yogaratela vaburuni vale, liye gwelavo. 14Ohomaruwaga amuharaga mutu wa Mulugu ule. Amuharaga ohonfwanyaga agagaratile vati va mutengo wa karvaliyo. Evale ohonfukaga eraga: <<Kodi mutu wa Mulugu wenno ukumile Juda gu weyo?>> Liye ohomuwakulaga eraga: <<He, gu miyene.>> 15Evale namafiyiheda ule ohomuwandelaga eraga: <<Ndowemo vande ira udowe wadje pawu.>> 16Mbwenye liye ohowakulaga eraga: <<Kavili jowandeya ira miyo nnowela vamohi na weyo, nne fiya vande vawo, nne dja pawu eto nne ng'wa mahindje na weyo ilambo yenna. 17Tchoira Yehova udiwandenle mazu ira: <Wadowa wewo, kudje pawu nne kung'we mahindje eto wawelagawo, kuhare ndila imohive yenno inafuna we hara wadowaga.> >> 18Mwa enne namafiyiheda oulula ule ohowakulaga eraga: <<Na miyene dili namafiyiheda nnga weyo. Mungelro gudiwandenle mazu a Yehova ira: <Kamuwelihe, umudowena vande vawo ira adowe adje pawu eto ira ang'we mahindje!> >> Mbwenye liye awongaga mazu anne eraga nama. 19Evale mutu wa Mulugu ule ohowelaga vamohi na liye, aliwa dowa vande vaye. Agadowile, ohovolowaga mmba mwaye, liye dja pawu eto ohong'waga mahindje.
20Fwanyeya ira kagali vameza evale kadjaga, mazu a Yehova kohozaga wa namafiyiheda wenne amuwelihile nfwaye ule. 21Mwa enne namafiyiheda amuwelihile nfwaye ule ohokuwaga amuwandelaga mutu wa Mulugu akumile Juda ule eraga: <<Yehova unawonga ira: <Voira weyo uhuruniha yenno yauwandenle Yehova, voira kuwandile harihamo nlamulo neno nauwandenle Yehova Mulugu wawo, 22uhufiyeda wela, we za dja pawu eto uhung'wa mahindje ilambo yenna yakondihiwile we ira: <<Kudje pawu, nne kung'we mahindje>>, eni unokwa eto kwa uwa maningwawo kinakoyiwa masiyeni wewo ukoyiwe ababawo.> >>
23Mwa enne mutu wa Mulugu ule agamanle dja pawu eto agamanle ng'wa mahindje, namafiyiheda oulula ule ohela yogaratela vaburuni va namafiyiheda wenno amuwelihile liye ule. 24Evale liye ohomaruwa, liye dowaga. Fwanyeya ira adowaga podogoma ohonfwanyaga mundila, liye mpa. Maningwaye kohokalaga pesele mundila eto buru waye ule vamohi na podogoma ule kohoimelaga vafwanyeyaga maningo aye vale.#13:24 Navwa ira buru waye ule vamohi na podogoma ule kohoimelaga vafwanyeyaga maningo aye vale ku wonga na ibaribari arumile podogoma ali Mulugu. Tchoira ahakale ikala yoireya vahali mwasa, podogoma ule ogompa buru ule eto ogomudja mutu ampile liye ule. (1 Amwene 20:36; 2 Amwene 17:25) 25Mwa enne kohokalawo alombwana kaviraga. Aliwa kohonfwanyaga agali pesele vati eto kohomuonaga podogoma ule agali oimelene vevale. Aliwa kohodowaga wonga sidadi ya Beteli yenno yakala namafiyiheda oulula ule.
26Evale namafiyiheda amuwelihile nfwaye ule agavwile zela jejo jamuireyele mutule, ohowongaga eraga: <<Gu mutu wa Mulugu wenno ahafunne vwelela yenno yamuwandenle Yehova. Nona Yehova gunvahedile mmandani mwa podogoma, liye mugwadanya, liye mpa nnga mwemo mwamuwandenle Yehova.>> 27Nomala enne, namafiyiheda oulula ule ohowongaga na ahimaye eraga: <<Kahelani yogaratela vaburuni vaga.>> Evale ahimaye ale kohelaga yogaratela vaburuni vaye vale, liye gwelavo. 28Agadowile, ohofwanyaga maningo aye kagali pesele mundila eto ohonfwanyaga buru ule vamohi na podogoma ule kagali oimelene wandamelana vafwanyeya maningo ale. Fwanyeya ira podogoma ule katakunile maningwale eto nne kampile buru ule. 29Mwa enne namafiyiheda ule ohotukulaga maningo a mutu wa Mulugu ule, liye gweliha vaburuni vale, liye mutukula, welelaga musidadi ira amunlele eto ira amukoye. 30Evale liye ohomudowana dowa mukoya masiyeni waye wewo wafuna liye koyiwa. Eto atwale kohomunlelaga, kada mutu eraga: <<Mbalaga! Mbalaga!>> 31Agamanle mukoya, ohowongaga na ahimaye ale eraga: <<Miyo dakwa, mudowe mwadikoye masiye amohive wewo dimukoyile miyo mutu wa Mulugu ule. Muhiye makuvaga mmambalo mwa makuva aye. 32Tchoira na ibaribari mazu anno awongile liye mowandeliwa na Yehova zela ibuwa ya Beteli eto vamohi na nyumba datene nnafwanyeya mamburo otama ovelela mikuto wa amilugu muwari mwa sidadi da Samariya, na ibaribari jatene ejo jinoza jikwakwanele.>>
33Mbwenye masiki jaireyileve enne, mulombwana Jerobowawu kawandile tchindja ndila yaye yabure. Ohokalelave asakulraga alombwana muwari mwa aIzarayeli ira kakale anamakuta a mamburo otama wavelela atu mikuto wa amilugu. Malringana mutu wenne afuna ira akale namakuta, liye omuhambiha mutule, liye kala namakuta mamburo otama otamalelamo vikwamutu josema. 34Evale yotega yenne yohozana tolotchiwa para atu a muibalini mwa Jerobowawu ira kadimelihiwe mwilamboni ya vati.
Currently Selected:
1 Amwene 13: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
