1 Amwene 12
12
Mwene Robowawu ohokonda vwanana na aIzarayeli
1AIzarayeli kohogumanaga Sikemu ira kamuhambihe mulombwana Robowawu umwene. Evale Robowawu ohovenyaga, liye dowa Sikemu. 2Mulombwana Jerobowawu mwana Nebati wenno atawenle Ijipitu na mwasa omuova mwene Salomawu, agavwile jejile ohowelagawo Ijipitu wali liye. 3Mwa enne aIzarayeli kohomuitanihaga Jerobowawu, aliwa gumanela dowa wa Robowawu. Kagafiyile wewule Jerobowawu na aIzarayeli atene kohowongaga na Robowawu keraga: 4<<Babinyu ohotabwa nikapatchiha mutolro onyemela.#12:4 Babinyu ohotabwa nikapatchiha mutolro onyemela: Salomawu oasoka atu jodja johokala ja masika (1 Amwene 4:22-28) eto oalabiha mabasa okanyihediwa (1 Amwene 5:3-16) eto ohakana aliba wendiha kavalo adjindji. (1 Amwene 10:26) Jatene eji jakwakwaneliheda zela mazu awongile Samuweli zela goyi dafuna atu kana tempu yavepile aIzarayeli mwene. (1 Samuweli 8:10-18) Mbwenye hiyo nnafuna ira muvungule mabasa anna hiyo orutcha ala vamohi na mutolro onyemela wenno anikapatchihile babinyu. Mwaira eno hiyo nnerege ulabani.>> 5Evale Robowawu ohowongaga eraga: <<Tabo, nyo tchiyeni, mwamale malambo mararu. Amala muwele nigumaneni akoka.>> Noira enne, atwale kohodowaga.
6Mwene Robowawu vahanle liye, ohafukaga andimuwa anno kamulabetcha babaye Salomawu ahanakwe, liye ira: <<Kodi zelru tchivi inafuna nyo divaha ira dawakule atwale?>> 7Aliwa kohomuwakulaga keraga: <<Nyo mwakala namalaba wewa oalaba atwala eto mwawakulaga muwongaga na makalelo apama, aliwa anokala anamalabinyu kala no kala.>> 8Mbwenye mulombwana Robowawu oholramwisa zelru yenno yawelruziwe liye na andimuwale. Mwa enne ohodowa, liye afuka zelru afwaye aulukunlena liye uzombweni waye eto kamulabetcha. 9Liye ohafuka eraga: <<Kodi munadivaha zelru nni zela atwala kadivepile ira: <Nnouvepani munivungulele mutolro onyemela wenno anikapatchihile babinyu!> >> 10Evale afwaye kaulukunle vamohi na liye ale, kohomuwakulaga keraga: <<Atwale kauvepile ira: <Babawo ohonikapatchiha mutolro onyemela. Nnavepa ira univungulele mutolro unna hiyo>, awakula uwa, wairena eni. Waawandele wire: <Miyo ibuno yaga ing'ining'ini ihiulukula kwaranya mmwinini mwa babaga.#12:10 Miyo ibuno yaga ing'ining'ini ihiulukula kwaranya mmwinini mwa babaga. Mazwala kafuna katapulele ira makalelo aye kafuna kakale orutcha kwaranya makalelo anna babaye. 11Voira babaga ohoukapatchihani mutolro onyemela, miyo eto nnafuna duwendjedeni. Babaga aububudetchani na iwaxuwaxu yopa vang'ono. Miyo mbwenye nnaububudegeni na iwaxuwaxu yokana minga.> >>
12Noira enne, siku naneraru nne nagafiyile, mulombwana Jerobowawu vamohi na aIzarayeli atene kohogumanela, aliwa dowa wa mwene Robowawu nnga mwemo mwawongele mwene ira: <<Mwamale malambo mararu. Amala muwele nigumaneni akoka.>> 13Mbwenye kagazile, mwene Robowawu ohawakulaga na mazu a uwali, alramwisaga zelru yavahiwe liye na andimuwa a Izarayeli. 14Liye ohara zelru yavahiwe liye na azombwe afwaye. Evale ohowongaga eraga: <<Babaga ohoukapatchihani mutolro onyemela. Mbwenye miyo nnafuna duwendjedeni nyemela wa mutolro wenyu. Babaga aububudetchani na iwaxuwaxu yopa vang'ono. Miyo mbwenye nnaububudegeni na iwaxuwaxu yokana minga.>> 15Ku wonga mwene Robowawu kafunile vwa yovepa ya atu. Mwasiwa havwanana ule wakumela wa Yehova ira kakwakwanele mazu anno awongile Yehova muwari mwa namafiyiheda Ayiya nkuda Silo amuwandelaga Jerobowawu mwana Nebati.#12:15 mazu anno awongile Yehova muwari mwa namafiyiheda Aiya… amuwandelaga Jerobowawu : Fwanyeya Aiya ohomuwandela Jerobowawu zela gaweya wa aIzarayeli na nlogo na Juda. Nione eto 1 Amwene 11:29-39.
Mwalana wa umwene wa Izarayeli na umwene wa Juda
16Mwa enne aIzarayeli atene kagumannege evale, kagaonne ira mwene kafuna avwelela yovepa yewa, aliwa kohomuwakulaga mwene keraga: <<Kodi hiyo ninna pandi nni na mwene Davi? Hiyo kaninna yoing'anela inafuna hiyo vahiwa vamohi na Davi mwana Jese. Kambeni nibalaleyeni kada mutu adowege vande vaye. Nyo akuda Davi mwahala, mutonganege nyoka!>> Mwa enne aIzarayeli kohobalaleyaga, kada mutu dowaga vande vaye. 17Mbwenye Ana Izarayeli anno kakala sidadi da Juda kohala, aliwa tongiwaga na Robowawu.
18Noira enne, mwene Robowawu ohomurumaga mulombwana Adorawu wenno ali musogolrelri wa mabasa okanyihediwa. Mbwenye aIzarayeli kagamuonne liye azaga wa aliwa, kohonvoka mabwe, aliwa mpa. Mwa enne mwene Robowawu ohogwela muatereladoni mwaye mobaranya, liye tawela Jeruzalemu. 19Roma siku nenne fiyeda siku na peno aIzarayeli anokonda tongiwa na amwene a muibalini mwa Davi.
20Eto aIzarayeli atene kagavwile ira mulombwana Jerobowawu uhuwelawo Ijipitu, kohomuitaniha, aliwa gumana atene, aliwa muhambiha ira akale mwene wa aIzarayeli atene. Mbwenye kanalivo nlogo nimohi niwa naharile amwene a muibalini mwa Davi ahali nlogo na Juda bahi.
21Evale mwene Robowawu mwana Salomawu agafiyile Jeruzalemu, ohagumanihaga alombwana atene oiziwa wana pama a muibalini mwa Juda vamohi na a nlogo na Benjami#12:21 alombwana… a muibalini mwa Juda vamohi na a nlogo na Benjami: Nlogo na Benjami nali nimohive nabandile na Robowawu na nlogo na Juda afwaye. Jerobowawu mbwenye ohala na malogo kumi nnga mwawongele namafiyiheda Aiya. (1 Amwene 11:31-32) okwakwana 180.000 ira kadowe kawane na atu a muibalini mwa aIzarayeli ale ira kawande welela umwene waye. 22Mbwenye mazu a Mulugu kohozaga wa Semaya, wenno ali mutu wa Mulugu keraga: 23<<Udowe wamuwandele Robowawu mwene wa Juda, mwana Salomawu eto waawandele atu a nlogo na Juda vamohi na nlogo na Benjami nari atu atene ofuna ja Robowawu, waawandele ira: 24<Yehova unawonga ira kamudowe ira mwawane na abalinyu Ana Izarayeli. Muwelele mmavande mwenyu, mwasiwa usakanyile jeji ira jiireye gu miyo vano Yehova.> >> Mwa enne aliwa kohovwelelaga mazu a Yehova, aliwa wela dowaga mmavande mwewa nnga mwemo mwawongele Yehova.
Jerobowawu ohomuhiya Mulugu
25Mwene Jerobowawu ohodowaga sakanyeda sidadi ya Sikemu, ilambo ya mmwangoni ya Efarayimi, liye kalaga wewule. Noira enne, ohovenyaga, liye dowa sakanyeda sidadi ya Penuweli. 26Evale liye ohoumbuwelaga mmirimani mwaye ira: <<Ifiyile atu va, aIzarayeli anaatonga miyo anagomela welela wa amwene a muibalini mwa Davi. 27Tchoira malambo a mundulrimu aIzarayeli kazave kadowaga Jeruzalemu ira kavelele mikuto Nyumba ya Yehova. Dera daahiye kadowegeve Jeruzalemu, mmirimani mwewa anaze karome funa jotongiwa na mbwiyiwa Robowawu mwene wa Juda eto kafiyede dipa, kadowe kamuhare liye.>> #12:26-27 aIzarayeli kazave kadowaga Jeruzalemu ira kavelele mikuto Nyumba ya Yehova: Fwanyeya ira Mulugu aatongile ira mikuto datene da aIzarayeli diveleliwege Jeruzalemu. (Detoronomiyo 12:11-14, 16:16; 2 Koronika 7:12,16) Ora yenno ira Jerobowawu na afwaye atene kavelele mukuto nnga mwawongele Mulugu, karomile lupa madilre a ilambo ya waniwa, aliwa dowa volowa ilambo yatonga Robowawu. Jerobowawu aova ira jera jiireyegeve eno, aIzarayeli anofiyeda mulemela Robowawu. Evale liye aova ira anofiyeda dipa, kadowe kamuhare liye. Jerobowawu ira akayena ova ali na mwasa oira liye kamuroromenle Mulugu wenno alumbenle ira akoye umwene waye malringana amuhara liyene bahi. (1 Amwene 11:37-38) 28Noira enne, agaafukile afwaye zelru, liye ohosakanyaga ana ng'ombe ambinli a oru, liye wonga na atu atene eraga: <<Ira nyo mukumegeve uno mudowege Jeruzalemu akoka, tchi goyi ilukulu para nyo. Ing'anani nyo aIzarayeli, amilugu banna kaukumihileni Ijipitu!>>#12:28 Yabure yenna inalingana na yabure yasakanyile mulombwana Arawu. Nione Ezodu 32:4. 29Mwa enne ohotukulaga ng'ombe imohi dowa ihela Beteli, ng'ombe imohiwa dowa ihela Dani.#12:29 Beteli na Dani ali madilre a ilambo yatonga Jerobowawu. 30Yenne yali yotega vamentoni va Yehova mwasiwa atu atene kodowa ante Dani owu hehi ante Beteli ira kadowe katamalele mwana ng'ombe.
31Mwene Jerobowawu ohomanga eto nyumba dovelelamo mikuto mamburo otama ovelela mikuto eto ohasakulra muwari mwa aIzarayeli ale alombwana angasi angasi, aliwa kala anamakuta, kahali a nlogo na Levi. 32Mwa enne ohosakanyaga pwando indimuwa siku nanekumi na tanu, mwedi wanetanu na taru. Pwando yasakanyile liye yali nnga pwando yasakanya akuda Juda, liye velela mikuto vaibuwani. Jejile airilena Beteli wewo wavelela liye mikuto wa ana ng'ombe a oru anno asakanyile liye. Eto Beteli ule ohokana atu aahambihile liye unamakuta ira kalabege mamburo otama asakanyedile liye, mwemo mwaveleliwetcha mikuto. 33Kagakwakwanne malambo kumi na matanu a mwedi wanetanu na taru, siku neno aumbuwenle liye ekave mmirimani mwaye, ohomaruwaga dowa velela mikuto ibuwani yenno yamangile liye Beteli. Mwa enne ohosakanyaga ira Ana Izarayeli kakayena pwando, liye eto ohovelelaga mikuto atumeyaga jonukela vaibuwani.#12:30-33 Yenne yali yotega vamentoni va Yehova: Jerobowawu ohokonda wenda na Mulugu. Tchoira ohoviringaniha jengo nnayi jilukulu: 1. Ohokonda nimburo Mulugu asakunlre liye Jeruzalemu. (Detoronomiyo 12:5; 1 Amwene 8:29, 9:3; 2 Amwene 21:4,7; 2 Koronika 7:12,16)2. Ohakonda anamakuta aasakunlre Mulugu anno kafwanyeya kagali aLevi. (Numero 3:6-10)3. Ohokonda makalelo Mulugu aawandenle liye aIzarayeli ira kamutamalele tchoira Jerobowawu ohosakanya vikwamutu josema agali Mulugu ohakameliha ejo. (Detoronomiyo 5:7-9)4. Liye eto ohopangana malambo ayene omutamalela Mulugu hiya malambo Mulugu awongile liye. (Levitiku 23:34,39,41) Ku wonga Jerobowawu omala tatila upama watene Mulugu afuna liye muwendela. (1 Amwene 11:37-38)
Currently Selected:
1 Amwene 12: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
