1 Amwene 11

Salomawu ohomuhiya Mulugu

1Mwene Salomawu, hiya muhiyanaye wenno anna liye mwana Farawu, ohazivela eto ahiyana amohiwa adjindji a vilambo da unde.#Detoronomiyo 17:17; Ezodu 34:15-16 Ali ahiyana a akuda Mowabe, aAmoni, aEdomu, aSidoni vamohi na aEti, 2malogo anno Yehova awongile liye na Ana Izarayeli ira: <<Nyo kamuza mwaatela ahiyana a malogo anne eto aliwa kiza kaatela ahiminyu mwasiwa aliwa anoholotcha mirima denyu ira mwaaharege amilugu ewa.>>#Detoronomiyo 7:3-4 Mbwenye mwene Salomawu ohogumanela na ahiyana anne muwari moaziveliwetchetcha. 3Ohatela ahiyana 700 ana amwene, eto ohokana amwendaye 300.#11:3 amwendaye amohiwa 300 : Tempu yenno amwendi a mwene kali nnga ahiyanaye mbwenye tchasimbwa rihediwa nnga ahiyanaye amohiwa. Mwa enne ahiyanaye ale kohomuholotcha murima waye. 4Tchoira mulombwana Salomawu aululaga, ahiyanaye ale kohomuholotcha murimaye ira aharege amilugu amohiwa. Mwa enne muhara waye Yehova Mulugu waye kwaali na mmirimani mwaye mwatene. Liye ohiya makalelo anna babaye Davi. 5Mwasiwa Salomawu ohoroma muhara Axitaroti, mulugu wa muhiyana wa akuda Sidoni, na Milikomi wenno unafwanyeya agali mulugu otakaletchetcha wa aAmoni. 6Mwa enne Salomawu ohosakanya jabure vamentoni va Yehova eto kawandile dowanave muhara waye Yehova nnga jairile babaye Davi. 7Salomawu ohodowa mwango unafwanyeya makumelo wa nzuwa wa Jeruzalemu, liye manga nimburo notama na mukuto wa mulugu otakaletchetcha wa akuda Mowabe wenno aitaniwa Kemuji eto ohomanga ibuwa imohiwa para mulugu otakaletchetcha wa aAmoni aitaniwa Moloki. 8Mwa enne ohomanga vibuwa para amilugu a ahiyanaye atene a unde ale, aliwa tumeyagavo jonukela eto velelagavo mikuto wa amilugu ewa.

9Mwa enne Yehova ohotakaleliwa na Salomawu, mwasiwa liye murimaye oholowa, liye muhiya Mulugu wa aIzarayeli wenno amutwanyuwele fendo mbinli. 10Zela nkani wenne, Yehova wanle ohomukameliha ira: <<Kuhare amilugu amohiwa.>> Mbwenye liye kawandile vwelela jejo jamuwandenle Yehova. 11Mwa enne Yehova ohomuwandela Salomawu eraga: <<Voira weyo uhukana makalelo anno eto na mwasa ohovwelela yopangana yaga vamohi na mangano aga anno dauwandenle miyo, miyo nnouwaka umwene unafwanyeya mmandani mwawo ira dinvahe namalaba wawo. 12So mbwenye na mwasa omuzivela babawo Davi, kannairana jejo tchineneva weyo wagaliwo nari. Mbwenye nnaza dimuwake umwene mwanawo, weyo wagakwile. 13Eto kannamuwaka umwene watene. So mbwenye nnomuhiyeda mwanawo nlogo nimohi ira atongege.#11:29-36, 12:16-20 Jatene ejo nnairela na mwasa omuzivela namalaba waga Davi eto na mwasa ozivela Jeruzalemu yenno inafwanyeya yagali sidadi isakunlre miyo.>>

Amwidani a Salomawu

14Mwa enne Yehova ohonvenyiha nkuda Edomu mmohi aitaniwa Hadade, wa muibalini mwa mwene wa Edomu ira akale mwidani mmohi wa Salomawu. 15Makalelo Mulugu anvenyihile liye Hadade ira aze akale mwidani wa Salomawu, iireyile eni: Wanle mwene Davi ahanakwe, liye odowaga agondjiha akuda Edomu. Noira eno, Jowabe musogolrelri mundimuwa wa anyakondo ohovenya, liye dowa akoyaga anyakondo afwaye kakwile. Evale liye ohodowa, roma apa alombwana atene kahanle Edomu. 16Tchoira Jowabe vamohi na nikuru na anyakondo a aIzarayeli nafwanyeyaga na liye kohomalaga medi mitanu na mmohi muwari mwa ilambo ya Edomu ante aliwa fiyeda atolotcha alombwana atene a Edomu. 17Mbwenye tempu yapiwaga akuda Edomu ale, Hadade ohotawaga na alombwana angasi angasi a Edomu anno kali anamalaba a babaye, aliwa dowaga Ijipitu. Tempu yenno Hadade ali mwana muzombwe. 18Aliwa kagavenyihanne ilambo ya Midiyani, kagafiyile pandi ya Parani, kohagumaniha alombwana angasi angasi a Parani, aliwa dowaga Ijipitu fiyeda wa Farawu mwene wa Ijipitu. Mwene Farawu ule ohonvaha Hadade nyumba vamohi na minda eto onvahetcha jodja.

19Hadade ohofwanya mahala vamentoni va mwene Farawu fiyeda mwene Farawu liye mutukula muhiyanaye Tafinesi dibiliye, liye nvaha ira amutele. 20Evale Tafinesi mbalaye ule ohombalela Hadade mwanapongwe aitaniwa Jenubati. Evale Tafinesi mwadi mwene ule ohoroma mulela vande va Farawu evale, liye kalaga vamohi na anapongwe amohiwa a Farawu.

21Mwa enne mulombwana Hadade agavwile Ijipitu wewule ira: <<Eni mwene Davi uhukwa, liye dowa vuma na makolo aye eto Jowabe wenno ali musogolrelri mundimuwa wa anyakondo na liyene uhukwa.>>, ohowongaga na mwene Farawu eraga: <<Nnauvepani mudirumelihe ira diwelele ilambo ya wanihu.>> 22Mbwenye mwene Farawu ohomuwandelaga eraga: <<Kodi inauhalela nni vili we na miyo eni, ante we funaga ira udowe ilambo ya waninyu?>> Evale mulombwana Hadade ohomuwakulaga ira: <<Nari, kinadihalela yengo. So mbwenye nnafuna ira mudirumelihe didowe bahi.>> Evale agadowile, liye roma kala mwidani mmohi wa Salomawu.#11:14,25

23Eto Mulugu ohonvenyiha mutu mmohiwa ira akale mwidani mmohiwa wa Salomawu. Wenno ali Rezomi, mwana Eliyada wenno amutawile mbwiyaye Hadadezeri mwene wa sidadi ya Zoba. 24Fwanyeya ira Davi ahanakwe, ohomutolotcha mwene Hadadezeri na nikuru naye na anyakondo. Evale Rezomi agaonne ira mwene waye ohogondjihiwa, liye ohobalrabanduwa, liye dowa agumaniha alombwana angasi angasi, liye kala musogolrelri wa nikuru na amadjuba. Aliwa kohodowa Damaxiku, aliwa kalaga wewule, aliwa muhambiha Rezomi ule, liye kala mwene. 25Eto liye ali mwidani kamuwanetchana aIzarayeli malambo matene a mwene Salomawu. Hiya goyi yaonihiwa atu na mulombwana Hadade bahi, aIzarayeli kohozuzumihiwa tambe na mulombwana Rezomi ule, mwasiwa liye oaidetcha aIzarayeli eto otongetcha ilambo ya Siriya.

Mulugu omusakulra Jerobowawu ira akale mwene wa malogo kumi

26Eto namalaba mmohi wa Salomawu aitaniwa Jerobowawu mwana Nebati, wa sidadi ya Zereda, ohomurungunuwela mwene Salomawu. Liye ali wa nlogo na Efarayimi. Eto mmaye ali makwele mmohi eni aitaniwa Zeruwa. 27Para liye murungunuwela mwene Salomawu iireyile eni: Mwene Salomawu ohomanga nimburo naitaniwa Milu eto ohomala funga mafulrango a muru wa sidadi ya babaye Davi. 28Fwanyeya ira mulombwana Jerobowawu ali owanda laba mabasa, mwa enne mwene Salomawu agamuonne ira ali muzombwe otchatchuwa omuhambiha ira akale mundimuwa osogolrelra mabasa okanyihediwa kalaba atu a muibalini mwa Joze. 29Fwanyeya ira siku nimohi mulombwana Jerobowawu ohokumaga Jeruzalemu, liye dowaga unde wa sidadi. Agali mundila adowaga, azile nfwanya ali namafiyiheda Ayiya wa ilambo ya Silo agawarile kapa ixa. Fwanyeya ira kagumannegevo ambinlive vahali mutu mmohiwa. 30Evale Ayiya ule ohowungulaga kapa ixa yawarilege liye ile, mala kawula visala kumi na mbinli. 31Mwa enne ohowongaga na Jerobowawu eraga: <<Katukula visala kumi di, mwasiwa unawonga gu Yehova Mulugu wa aIzarayeli ira: <Miyo nnokawula umwene mmandani mwa Salomawu. Nnafuna duvahe weyo ira watongege malogo kumi. 32Mbwenye liye unakana nlogo nimohi bahi na mwasa ozivela wanna miyo na namalaba waga Davi eto na mwasa ozivela unna miyo zela Jeruzalemu, sidadi isakunlre miyo muwari mwa malogo matene a Izarayeli.#11:31-32 Va namafiyiheda unamuwandela Jerobowawu ira: Katukula visala kumi di eto umwene wa Salomawu unakana nlogo nimohi bahi. Sogolro nnofwanya ira mwana Salomawu atonga malogo menli, nlogo nimohi ali nlogo naye nobaliwana na Juda eto nlogo nimohi niwa nali nlogo na Benjami. Nione 12:21-23. 33Mwasiwa Salomawu na aIzarayeli kohodihiya, aliwa kokorelaga amilugu amohiwa a Axitaroti, mulugu wa muhiyana wa akuda Sidoni, vamohi na Kemuji, mulugu wa akuda Mowabe, vamohi na Milikomi, wenno uli mulugu wa aAmoni eto aliwa kifunile wenda ndila daga dedo daavahile miyo, nne kifunile irana yenno inafuna miyo, roma mangano aga na jotonga jaga. Salomawu kafunile dihara miyo na makalelo adiharile babaye Davi. 34Mbwenye kannamuwaka Salomawu umwene watene mmandani mwaye. Miyo nnomusakanya ira liye akale musogolrelri kalawo waye watene na mwasa omuzivela muzari waga Davi wenno damusakunlre miyo eto wenno avwelenle malamulo aga vamohi na mangano aga. 35Mbwenye nnamuwaka umwene mmandani mwa mwanaye. Dagamuwakile, nnouvaha weyo malogo kumi ira waatongege. 36So nnamuhiyeda mwanaye nlogo nimohi ira namalaba waga Davi akayenave wareya vamentoni vaga Jeruzalemu,#11:36 namalaba waga Davi akayenave wareya vamentoni vaga Jeruzalemu : Wareya unawongiwa va ku tapulela mutu okumela muibalini mwa Davi akale mwene. Nione 1 Amwene 15:4. sidadi yenno isakulrile miyo ira katamalelege wewo nzina naga. Wareya uwa, ahimaye anerege kala amwene vamalroni vaye. 37Eto nnoutukula weyo mulombwana Jerobowawu, ukale mwene wa aIzarayeli ira utongege ilambo yatene inafunege we. 38Eto weyo wavwelela jatene jinaurumege miyo eto wakala mutu owenda mundilani mwaga eto wakala mutu oirana jofwanela vamentoni vaga, waharihaga mangano aga vamohi na malamulo aga nnga jairile namalaba waga Davi, miyo nnokala na weyo eto nnouvaha weyo na ahimawo ira mwaatongege aIzarayeli malambo a mukalakala. 39Miyo nnafuna daonihe goyi atu a muibalini mwa Davi na mwasa wa jotega jiwa. Mbwenye goyi yewa kinakala ya mukalakala.> >> 40Salomawu agavwile zela jatene jejile, ohoroma venda jompa mulombwana Jerobowawu. Mbwenye mulombwana Jerobowawu ohotawela Ijipitu, dowa wa mwene wa Ijipitu ule aitaniwa Sizaki. Ohokala Ijipitu wewule fiyeda mwene Salomawu liye kwa.

Kwa wa Salomawu

41Joira jimohi jiwa ja mwene Salomawu, vamohi na mabasa matene alabile liye, vamohi na zelru datene da Salomawu jinafwanyeya jagalrembiwe mulivuruni mwa Istoriya ya Salomawu. 42Eto mwene Salomawu aatongile aIzarayeli atene muJeruzalemu yaka 40. 43Noira enne, Salomawu ohokwa, liye dowa vuma na makolo aye. Evale ohokoyiwa sidadi ya babaye Davi. Eto liye agakwile, mwanaye Robowawu gwahambile umwene vamalroni vaye.

Currently Selected:

1 Amwene 11: iLolo

Highlight

Copy

Compare