1 Koronika 28
28
Davi ohawelruza aIzarayeli vamohi na mwanaye Salomawu ira kakale onvwelela Yehova
1Davi ohaitana andimuwa atene a Izarayeli ira kaze kagumane Jeruzalemu, romana andimuwa a malogo, asogolrelri a makuru a anyakondo a mwene, asogolrelri a anyakondo 1.000, asogolrelri a anyakondo 100, asogolrelri anno kasogolrelra jengo jatene na vinyama jatene jejo jafwanyeya jagali ja mwene vamohi na ahimaye. Ohaitana eto asogolrelri a palasiyo ya mwene, vamohi na anyakondo ovweya na anyakondo atene a kopolo. 2Mwa enne kagagumanne, mwene Davi ohoimelaga vasogolro vewa liye wonga eraga: <<Abalaga eto atwaga, kavuruwanani! Miyo dohokana mmirimani mwaga yofunafuna ira dimange Nyumba ya Yehova ira nihelemo Kaxa ya Yopangana ya Yehova, yenno ili nnga yonyingalihavo manyalo ya Mulugu wehu. Miyo dohomala kozeyela ira dimange. 3Mbwenye Mulugu ohodiwandela ira: <Weyo kunamanga nyumba moriheda nzina naga nari, mwasiwa weyo uli munyakondo eto uhuvuviha sangiri nohokala na masika.> 4Eto Yehova Mulugu wa Izarayeli uhudisakulra vari va abalaga atene ira miyo na ahimaga anabaliwege nikale amwene a Izarayeli kala no kala. Liye umusakunlre Juda kala musogolrelri, muwari mwa nlogo na Juda usakunlre vande va babaga, eto vari va ahima a babaga, liye udiziveliwe miyo ira adihele dikale mwene wa aIzarayeli atene. 5Eto vari va ahimaga adjindji adivahile liye, liye umusakunlre mwanaga Salomawu ira agarati va mpando wa umwene wa Yehova, atongege Izarayeli. 6Liye diwandela ira: <Mwanawo Salomawu gunafuna manga nyumba yaga na ntando nowerewera nyumba yaga,#28:6 ntando nowerewera nyumba yaga, nali nimburo nadowa aIzarayeli ira kamutamalele Yehova. Nione Salmu 100:4 tchoira miyo dihimusakulra ira akale mwanaga eto miyo nnokala babaye. 7Liye avwelelagave malamulo aga na jowelruza jaga na makalelo nnga unavwelela liye siku na peno, miyo nnogarateyiha umwene waye kala no kala.> >> 8Davi ohowongagave eraga: <<Mwa eno, vamentoni va aIzarayeli atene na atu atene a Yehova, na vamentoni va Mulugu wehu unadivwa, miyo nnouwandelani ira muharihege malamulo matene a Yehova Mulugu wenyu ira mukalegeve mwilamboni mwapama emu eto muze mwaahiyede ahiminyu ilambwela ira ikaleve yewa kala no kala. 9Eto weyo mwanaga Salomawu, umuiziwe pama Mulugu wa babawo eto umulabege liye na murimawo watene no funa wawo watene. Tchoira Yehova unaona jatene jili mmirimani mwa mutu uli watene eto uiziwa joumbuwela na jofuna jatene. Weyo wanvenda, liye unorumela ira unfwanye, mbwenye wamuhiya, liye unoukonda kala no kala. 10Kaing'ana, Yehova uhuusakulra ira umange nyumba ira ikale nimburo notchena. Inafwanela ukale wa kopolo eto ulabe mabasa.>>
Davi ohomuwandela mwanaye Salomawu makalelo a nyumba yafuna liye mmangela Yehova
11Davi ohonvaha mwanaye Salomawu jolremba jooniha makalelo kafuna kana Nyumba ya Yehova na makalelo afuna kana alpendara vatando viwa, nyumba dowerewera Nyumba ya Yehova na nyumba mokoya jorayela, nyumba dobandihiwa na ntchihi na Nyumba ya Yehova, na kwartu yosembeselramo jotega. 12Eto ohomuoniha makalelo afuna kana ntando na Nyumba ya Yehova, kwartu datene dowerewera nyumbele, mokoya jorayela ja Nyumba ya Mulugu na mokoya jengo jotchena javeleliwa wa Mulugu. 13Eto ohonvaha mwanaye Salomawu makalelo kafuna laba makuru a anamakuta na aLevi afwiwa na mabasa matene kafuna labiwaga va Nyumba ya Yehova na fwaramento dolabana mabasiwa. 14Ohomuwandela nyemela wa oru wa jengo jatene jafuna sakanyiwa na oru, kada yengo na mabasiwa. Eto ohomuwandela nyemela wa parata wa jengo jatene jafuna sakanyiwa na parata, kada yengo na mabasiwa. 15Ohomuwandela nyemela wa oru osakanyana jogoromeyavo panti ja oru na panti diwa, no nyemela wa parata osakanyana jogoromeyavo panti ja parata na panti diwa na makalelo olabana kada yogoromeyavo panti. 16Eto ohomuwandela nyemela wa oru osakanyana meza da oru dohelavo pawu dedo datapulela ira Yehova uli vamohi na atwaye. Eto ohomuwandela nyemela wa parata osakanyana meza da parata. 17Ohomuwandela nyemela wa oru ohogumanihiwa na yengo imohiwa afuneya para sakanyana magarfu malukulu, mapanela, jaro na mabasiya, kada yengo no nyemela wewa. Eto ohomuwandela nyemela wa parata para sakanyana parato. 18Ohomuwandela eto zela nyemela wa oru ohogumanihiwa na yengo imohiwa afuneya para sakanyana ibuwa yotumeyavo jonukela, na oru afuneya para sakanyana aterelado wa akerubi anno kafuna tapula mapepelo ewa, kakunelana Kaxa ya Yopangana ya Yehova. 19Davi ohowonga eraga: <<Yehova gudiwandenle makalelo matene dilrembile miyo ala zela nyumba inafuna mangiwa na joharela jiwa jatene.>>
20Nomala enne, Davi ohowonga na mwanaye Salomawu eraga: <<Ulimbe kopolo eto ukale olimba murima, ulabe mabasa. Kuove nne kurendjeye, mwasiwa Yehova Mulugu, wenno unafwanyeya agali Mulugu waga unakala na weyo. Liye kaza auhiya nne kaza aunyanyala ante ufiyede mariha mabasa omanga Nyumba ya Yehova. 21Kaing'ana, makuru a anamakuta na aLevi afwiwa kali okozeyene ira kalabe mabasa a Nyumba ya Mulugu. Atu ovivelela eto okana dodolriso ira kalabe mabasa ali matene anokala na weyo. Vamohive vevo, andimuwa na atu atene anavwelelege yengo yenno inafunege we aruma.>>
Currently Selected:
1 Koronika 28: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
