1 Koronika 29
29
Mivaho avelenle Davi vamohi na andimuwa a Izarayeli ira kamangena Nyumba ya Yehova
1Nomala enne, mwene Davi ohowongaga na atu atene eraga: <<Mulugu umusakunlre mwanaga Salomawu eka ira amange nyumbaye. Mbwenye liye unafwanyeya agali muzombwe eto kalemenle jengo jidjindji, eto mabasala ba malukulu, mwasiwa palasiyo inafuna liye manga kahi palasiyo ya mutu nari, tcha Yehova Mulugu. 2Miyo dihilaba na kopolo daga datene, miyo koza fwaramento didjindji dene ira dilabiwena mabasa omanga nyumba ya Mulugu waga. Dihikoza oru, parata, mukuwa, momba na matabwa, mabwe pwi a onikisi, mabwe ofuneyetchetcha, mabwe okana kore didjindji, azulejo, ntundu uli watene wa mabwe ofuneyetchetcha na mabwe a marimore. 3Hiya jatene jikozile miyo para Nyumba Yotchenihiwa, na mwasa ozivela Nyumba ya Mulugu waga inafuna mangiwa, miyo nnokumiha mwa jorayela jaga oru na parata para jimangiwena Nyumba ya Mulugu waga. 4Jinafuna miyo kumiha ti ji: Matonelada 100 a oru wa Ofiri, eto matonelada 240 a parata opiyiwa pama, ira kakunelena matchihi a nyumba. 5Oru nnafuna miyo kumiha, ili ira kasakanyena jengo ja oru eto parata nnafuna miyo kumiha, kasakanyena jengo ja parata na jolabana mabasa matene a amesilri. Nnga bani ukozeyile peno ira azena yovaha inafuna liye velela mofuna mwaye wa Yehova?>>
6Mwa enne, asogolrelri a muibalini, andimuwa a malogo a Izarayeli, asogolrelri a anyakondo 1.000, asogolrelri a anyakondo 100 vamohi na asogolrelri a mabasa a mwene kohovelelaga kada mutu yovelela yaye yaye mofuna mwewa. 7Ira Nyumba ya Mulugu imangiwe, aliwa kohokumiha matonelada 170 a oru, kobiri da ngwindji ngwindji 10.000, matonelada 340 a parata, matonelada 612 a mukuwa na matonelada 3.000 a momba. 8Eto ale kanna mabwe ofuneyetchetcha kohavelela munyumbani yokoyamo ja Yehova. Aing'anela jejo ali mulombwana Jeyeli nkuda Jeresoni. 9Atu atene kohagalalaga na mwasa oira andimuwa ewa kohovelela wa Yehova mofuna mwewa, na murima wewa watene. Na mwene Davi wenne eto ohokana hagalala ulukulu.
Davi ohomutamalela Yehova
10Na mwasa wenne, Davi ohomutamalela Yehova vamentoni va atu atene eraga: <<Otamaleliwa kala no kala akale nyo Yehova Mulugu wa nikolo nehu Izarayeli. 11Nyo Yehova muli wa kopolo, muli mundimuwa, otitimihiwa, owareya eto okana utongi. Jatene jinafwanyeya ilambo ya zulu na ilambo ya vati ti jenyu. Nyo muli Mwene, jatene jinatongiwa na nyo. 12Rayela no rihediwa unakumela wa nyo. Nyo gunatonga jatene jene. Mmandani mwenyu muhukala kopolo na undimuwa. Munowanda muulukuliha eto munowanda nvaha kopolo mutu uli watene. 13Mwa eno, hiyo nnoutamalelani nyo Mulugu wehu eto nnoriheda nzina nenyu notitimihiwa.
14<<Miyo dili ani eto atwaga bani ira hiyo niwande vaha mofuna mwehu jengo jatene eji? Jatene jinakumela wa nyo, so hiyo niirile uwelihedani jengo jejo jalive jenyu na wanle. 15Vamentoni venyu, hiyo nili alendo eto nili atu oza nngave makolo ehu atene. Malambwihu mwilamboni ya vati anakala nnga nfulri, inadediha hiyo ku ukwa bahi. 16Nyo Yehova Mulugu wehu, jorayela jatene eji jivelenle hiyo ira jimangiwena nyumba moriheda nzina nenyu notchena jikumile mmandani mwenyu, eto jatene mwinnya gu nyo. 17Nyo Mulugu waga, miyo dihiiziwa ira munoxixa mirima eto munoaziveliwa atu owongowa mirima. Jatene duuvahileni miyo, divelenle mofuna mwaga eto na murima watene. Mwa eni eto nnoaona mohagalala atwinyu anafwanyeya eva, kavelelaga wa nyo mofuna mwewa. 18Yehova Mulugu wa makolo ehu Abarahamu, Izaki na Izarayeli mulabe mmirimani mwa atwinyu ira kakayenave yofunafuna yenno kala no kala eto musakanye ira kakale ororomeleya wa nyo. 19Eto zela mwanaga Salomawu, munvahe murima watene ovivelela ira awandege koya malamulo enyu, jofuna jenyu na jowelruza jenyu, afiyede manga nyumba yenno disakenle miyo fwaramento diwa.>>
20Nomala enne Davi ohowongaga na atu atene ira: <<Mutamaleni Yehova Mulugu wenyu.>> Evale atene kohomutamalela Yehova, Mulugu wa makolo ewa, aliwa oramiheda miru diwa vati vamentoni va Yehova eto vamentoni va mwene. 21Mmetcheloni muwa, kohovelelaga mikuto wa Yehova eto kohovelelaga mikuto dotumeya da anavinyama ala: Ng'ombe da alombwana 1.000, mabila a alombwana 1.000 na ana mabila 1.000, na yovelela ya jong'wa yenno yadowa vamohi na kada mwanainyama.#29:21 yovelela ya jong'wa yenno yadowa vamohi na kada mwanainyama. Muwari mwa malamulo anafwanyeya Ezodu 29:40-41 vamohi na Numero 15:1-16, yali yofuneya ira kavelele eto jovelela ja jong'wa kavelelaga mwanainyama. Kohovelelaga eto jovelela jidjindji zela aIzarayeli atene. 22Siku nenne aliwa kohodjaga eto kohong'waga mohagalala ulukulu vamentoni va Yehova.
Nomala kohonvaha Salomawu mwana Davi umwene fendo yowelela, aliwa muhambiha kala mwene wewa vamentoni va Yehova. Kohomuhambiha eto mulombwana Zadoki, liye kala namakuta. 23Evale Salomawu ohogaratigi nnga mwene vampandoni va Yehova, vamalroni va babaye Davi. Jaye jomuwendela pama eto atu atene a Izarayeli komuvwelela. 24Andimuwa atene, anyakondo ovweya eto na ahima atene a Davi kohovivelelaga ira kanvwelelege Salomawu. 25Yehova ohomuulukuliha Salomawu na makalelo ohokala a masika vamentoni va aIzarayeli atene eto ohovweyiha umwene waye kwaranya amwene atene katongile Izarayeli liye ahanakale mwene.
Kwa wa Davi
26Fwanyeya Davi mwana Jese ohatonga aIzarayeli atene. 27Liye atongile sidadi ya Eboroni yaka tanu na mbinli. Eto muJeruzalemu atongilemo yaka 33. Gumaniha yaka datene da umwene waye, Davi aatongile aIzarayeli yaka 40. 28Nomala eno Davi ohokwa, agaulunle pama, agadjilevo, agali mutu orayela eto orihediwa. Agakwile, mwanaye Salomawu gwahambile umwene vamalroni vaye.
29Fwanyeya joira ja mwene Davi, joira jaye joroma fiyeda jogomiheda jinafwanyeya jagalrembiwe mulivuruni mwa Joira ja Umwene nilrembiwe na namaona Samuweli na mulivuru na joira ja umwene nilrembiwe na namafiyiheda Nata eto na mulivuruni mwa Joira ja Umwene nilrembiwe na namaona Gadi. 30Muhulrembiwa eto miselu datene dowonga zela umwene waye, kopolo daye datene, jatene jamuireyele na jatene jaireyile Izarayeli na maumwene a vilambo dimohi diwa dowandamana.
Kukala mazu a livuru na 1 Koronika.
Currently Selected:
1 Koronika 29: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
