1 Koronika 27
27
Makuru a anyakondo na asogolrelri ewa
1Ala ba mazina a aIzarayeli, nnga mukalele atu indjiva uwa na asogolrelri a muibalini, asogolrelri a anyakondo 1.000 na asogolrelri a anyakondo 100, na andimuwa ewa anno kamulaba mwene moing'anela makalelo ogawa makuru a anyakondo kalaba motchindjana muwari mwa yaka va kada mwedi nikuru nimohi, amala tchindja mwedi mmohiwa volowa nikuru nimohi. Kada nikuru nakana atu 24.000. 2Mundimuwa wa nikuru noroma aitaniwa Jasobeyamu mwana Zabidiyeli. Nikuru naye nanna atu 24.000 anno kalaba mwedi oroma. 3Liye akumile muibalini mwa Pereji eto ali musogolrelri wa asogolrelri atene a anyakondo. Liye alaba mwedi oroma.
4Mundimuwa wa nikuru na atu kalaba mwedi wanembinli aitaniwa Dodayi, nkuda Awoyi. Omuharela ali mulombwana Mikolote. Nikuru na Dodayi nanna atu 24.000.
5Mundimuwa waneraru wa anyakondo wenno asogolrelra nikuru na mwedi waneraru aitaniwa Benaya mwana namakuta Joyada. Nikuru naye nanna atu 24.000. 6Benaya unawongiwa gwenno ali muwari mwa alombwana 30 a kopolo ale#11:25 eto liye ali musogolrelri wewa. Nikuru naye nasogolrelriwa na mwanaye aitaniwa Amizabade.
7Mundimuwa wanennayi wa nikuru na mwedi wanennayi ali Azayeli wenno ali Jowabe mbalaye. Mwanaye Zebadiya gwahambile vamalroni vaye. Nikuru naye nanna atu 24.000.
8Mundimuwa wanetanu wa nikuru na mwedi wanetanu ali Samute, nkuda Izara. Nikuru naye nanna atu 24.000.
9Mundimuwa wanetanu na mmohi wa nikuru na mwedi wanetanu na mmohi ali mulombwana Ira mwana Ikesi, nkuda Tekowa. Nikuru naye nanna atu 24.000.
10Mundimuwa wanetanu na mbinli wa nikuru na mwedi wanetanu na mbinli ali Helezi nkuda Peloni, okumela muibalini mwa Efarayimi. Nikuru naye nanna atu 24.000.
11Mundimuwa wanetanu na taru wa nikuru na mwedi wanetanu na taru ali Sibekayi nkuda Husati, okumela muibalini mwa Zera. Nikuru naye nanna atu 24.000.
12Mundimuwa wanetanu na nnayi wa nikuru na mwedi wanetanu na nnayi ali Abiyezeri nkuda Anatoti, okumela muibalini mwa Benjami. Nikuru naye nanna atu 24.000.
13Mundimuwa wanekumi wa nikuru na mwedi wanekumi ali Marayi nkuda Netofa, okumela muibalini mwa Zera. Nikuru naye nanna atu 24.000.
14Mundimuwa wanekumi na mmohi wa nikuru na mwedi wanekumi na mmohi ali Benaya nkuda Piratoni, okumela muibalini mwa Efarayimi. Nikuru naye nanna atu 24.000.
15Mundimuwa wanekumi na mbinli wa nikuru na mwedi wanekumi na mbinli ali Helidayi nkuda Netofa, okumela muibalini mwa Otoniyeli. Nikuru naye nanna atu 24.000.
Andimuwa a malogo
16Ala kali asogolrelri a malogo a Izarayeli: Musogolrelri wa nlogo na Rubeni ali Eliyezeri mwana Zikiri. Musogolrelri wa nlogo na Simeyawu ali Sefatiya mwana Maka. 17Musogolrelri wa nlogo na Levi ali Hazabiya mwana Kemuweli. Musogolrelri wa atu a muibalini mwa Arawu ali Zadoki. 18Musogolrelri wa nlogo na Juda ali Eliyu, mmohi mwa abali a Davi. Musogolrelri wa nlogo na Isakari ali Omiri mwana Mikayeli. 19Musogolrelri wa nlogo na Zebuloni ali Isimaya mwana Obadiya. Musogolrelri wa nlogo na Nafitali ali Jerimoti mwana Aziriyeli. 20Musogolrelri wa nlogo na Efarayimi ali Ozeya mwana Azaziya. Musogolrelri wa metadi ya nlogo na Manasesi ali Joweli mwana Pedaya. 21Musogolrelri wa metadi imohiwa ya nlogo na Manasesi yakala Jileyadi ali Idu mwana Zakariya. Musogolrelri wa nlogo na Benjami ali Jaziyeli mwana Abineri. 22Musogolrelri wa nlogo na Dani ali Azareli mwana Jerowawu. Anna bali asogolrelri a malogo a Izarayeli. 23Davi kaakontarile alombwana anno kali kahanakwakwanihe yaka 20. Mwasiwa Yehova oholumbela aindjiviha aIzarayeli ira kafiye nnga nyenyedi da zulu. 24Jowabe wenno mmaye ali Zeruwiya ohoroma akontari atu, mbwenye kafiyedile mala akontari atene. Masiki eno, Yehova ohatonga aIzarayeli na mwasa okontariwa wewule. Fiyeda ira numero niwa kakotarile atu, kanilrembiwe mulivuruni mwa Joira ja mwene Davi.
Atu kasogolrelra jorayela ja Davi
25Azimavete mwana Adiyeli ali musogolrelri oing'anela jorayela ja mwene. Eto Jonata mwana Uziya ali musogolrelri oing'anela ja mwene jafwanyeya mmafora nari sidadi dimohi diwa, tatamo dimohi diwa na nyumba dimohi diwa mwakala aliba ing'anela. 26Mulombwana Eziri mwana Kelube ali musogolrelri oing'anela atu kalima minda. 27Simeyi nkuda Rama ali musogolrelri oing'anela minda da uva. Zabidi nkuda Sifimi ali musogolrelri oing'anela vinyu mwemo mwakoya atu. 28Bali-Anani nkuda Gederi ali musogolrelri oing'anela mitengo da azeti na mitengo da nantambu dafwanyeya ilambo ya mikuma ding'onong'ono. Jowasi ali musogolrelri oing'anela mwakoyiwa azeti. 29Sitarayi nkuda Saromi ali musogolrelri oing'anela ng'ombe dadjihiwetcha Saromi. Safati mwana Adalayi ali musogolrelri oing'anela ng'ombe dadjihiwetcha mudaboni. 30Obili nkuda Jomayili ali musogolrelri oing'anela akamelo. Jediya nkuda Meronoti ali musogolrelri oing'anela aburu. 31Jaziji nkuda Agiri ali musogolrelri oing'anela mabila na mbuzi. Atene anna kali asogolrelri oing'anela jengo ja mwene Davi.
32Jonata wenno ali Davi titiyu waye, ali mutu owelruza, mulombwana wa zelru eto ali namalremba. Jeyeli mwana Akimoni anna mabasa oafundjiha ahima a mwene. 33Ayitofeli ali namawelruza wa mwene. Huzayi nkuda Ariki ali mwene xamwalraye omukamiheda zelru. 34Ayitofeli agakwile, Abiyatare na Joyada mwana Benaya koheliwa ira kakale anamawelruza a mwene. Mulombwana Jowabe ali musogolrelri wa anyakondo a mwene.
Currently Selected:
1 Koronika 27: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
