1 Koronika 26
26
Agwarda a mulango wa Nyumba ya Yehova
1Ala ba mazina a agwarda a va mulango. Muwari mwa akuda Kora kali Meselemiya mwana Kore, wa muibalini mwa Asafe. 2Meselemiya aabanle anapongwe ala: Murandji aitaniwa Zakariya, wanembinli aitaniwa Jediyeli, waneraru aitaniwa Zebadiya, wanennayi aitaniwa Jatiniyeli, 3wanetanu aitaniwa Elamu, wanetanu na mmohi aitaniwa Jowanani, wanetanu na mbinli aitaniwa Eliyowenayi.
4Agwarda a va mulango amohiwa ali Obedi-Edomu na ahimaye. Obedi-Edomu aabanle anapongwe ala: Murandji aitaniwa Semaya, wanembinli aitaniwa Jozabade, waneraru aitaniwa Jowa, wanennayi aitaniwa Sakari, wanetanu aitaniwa Natanayeli, 5wanetanu na mmohi aitaniwa Amiyeli, wanetanu na mbinli aitaniwa Isakari, wanetanu na taru aitaniwa Pewuletayi, (liye anvahile nzina nenne mwasiwa Mulugu ohomureliha Obedi-Edomu). 6Mwanaye Semaya ohabala ahimaye, anno kali asogolrelri a muibalini mwa babiwa. Mwasiwa aliwa kali alombwana a kopolo. 7Semaya aabanle anapongwe ala: Otini, Refayeli, Obedi na Elizabade. Aliwa eto kohakana abaliwa amohiwa, Eliyu na Semakiya anno kali alombwana a kopolo. 8Atene anna kali atu okumela muibalini mwa Obedi-Edomu. Aliwa vamohi na ahimiwa na abaliwa kali atu a kopolo owanda laba mabasa. Atene kali 62.
9Meselemiya ahimaye vamohi na abalaye atene kali 18. Atene kali alombwana a kopolo.
10Agwarda a va mulango amohiwa ali ahima a mulombwana Hosa nkuda Merari ala: Simiri, wenno ahambihiwe akala musogolrelri wa abalaye. Babaye gwamusakunlre liye kala musogolrelri masiki ahalive mwana murandji. 11Mwana wanembinli aitaniwa Hilikiya, waneraru aitaniwa Tebaliya, wanennayi aitaniwa Zakariya. Mulombwana Hosa ahimaye vamohi na abalaye atene kali 13.
12Makuru anna a agwarda a va mulango, kalaba mabasa va mulango mosogolrelriwa na asogolrelri ewa, aliwa kalaba na makalelo nnga kalaba abaliwa muwari mwa Nyumba ya Yehova. 13Aliwa kohosakanya jogu ya ngari muwari mwa maziza ewa, andimuwa na ang'onong'ono, mwa enne kada nikuru nohokana mulango wewa oing'anela. 14Mulombwana Selemiya ohogweliwa ngari ira akale gwarda wa mulango ali pandi ya makumelo wa nzuwa. Nomala kohosakanyaga ngari zela mwanaye Zakariya wenno afwanyeya agali namawelruza wa zelru. Zakariya ule ohogweliwa ngari ira akale gwarda wa mulango ali pandi ya norti. 15Ngari ya gwarda wa mulango ali pandi ya suli yamugwenle Obedi-Edomu. Ahimaye kagweliwe ngari yokala agwarda a nyumba yokoyamo jorayela. 16Supimu na Hosa kagweliwe ngari yokala agwarda a mulango ali pandi ya mavirelo wa nzuwa na mulango wa Salekete ali vakwikwi vene na ndila ya nkuma. Kala wu gwarda, gwarda mmohiwa liye kala ikukuru imohiwa . 17Mulango akala pandi ya makumelo wa nzuwa wakala agwarda atanu na mmohi va kada siku, pandi ya norti wakala annayi va kada siku, pandi ya suli wakala annayi va kada siku, nyumba yokoyamo jorayela wakala agwarda annayi, wu ambinli, wu ambinli. 18Ntando nafwanyeya mavirelo wa nzuwa, wakala agwarda annayi va mulango viwa eto amohiwa ambinli vatando. 19Anna bali makuru a agwarda a va mulango anno kali atu okumela muibalini mwa Kora na Merari.
Agwarda oing'anela jorayela ja Nyumba ya Yehova
20Muwari mwa aLevi namaing'anela wa jorayela ja nyumba ya Mulugu na jengo jimohi javeleliwa wa Mulugu ali mulombwana Ayiya. 21Akuda Jeresoni okumela muibalini mwa Ladani, anno kali asogolrelri a muibalini mwa Ladani ba ala: Jeyeli 22na ahima a Jeyeli kagali Zetani na mbalaye Joweli. Aliwa kanna mabasa oing'anela jorayela ja Nyumba ya Yehova. 23Amohiwa okana mabasa oing'anela jorayela kakuma muibalini mwa Amiramu, Izari, Eboroni na Uziyeli. 24Mmohiwa ali mulombwana Sebuweli wa muibalini mwa Jeresoni mwana Mozeji. Liye ali mundimuwa oing'anela jorayela ja Yehova. 25Sebuweli ule okana ibali na Selomite muwari mwa Reyabiya mwana Eliyezeri. Reyabiya ohombala Jezaya. Jezaya ohombala Jorawu. Jorawu ohombala Zikiri. Zikiri ohombala Selomite. 26Selomite wenno na abalaye kaing'anela jorayela javeleliwe wa Mulugu jejo javelenle mwene Davi, asogolrelri a muibalini, andimuwa a atu 1.000 na andimuwa a atu 100, vamohi na andimuwa a anyakondo. 27Jovelela javelenle atu jile, ti jejo jaawakile atu amwidaniwa kondoni, aliwa dowa velela ira Nyumba ya Yehova isakanyediwe. 28Jovelela jimohi jali jejo javelenle namaona Samuweli, Sawuli mwana Kixi, Abineri mwana Neri na Jowabe mwana Zeruwiya. Jatene javeleliwa jali mmandani mwa Selomite vamohi na abalaye.
Andimuwa osogolrelra ja Mulugu vamohi na anamatonga
29Mulombwana Kenaniya na ahimaye kokana mabasa olremba joireya no atonga aIzarayeli makani kakana atu. Aliwa kali a muibalini mwa Izari. 30Hazabiya vamohi na abalaye kali 1.700 alombwana a kopolo, aliwa kaasogolrelra aIzarayeli kakala mavirelo wa nzuwa wa Jordawu muwari mwa mabasa matene a Yehova na mabasa a mwene. Aliwa kali a muibalini mwa Eboroni. 31Jeriya afwanyeya agali musogolrelri wa atu atene okumela muibalini mwa Eboroni. Davi agatongile yaka 40, kohosakasaka mulistani mwa atu kakumile muibalini mwa Heboroni, evale kohofwanyamo atu a kopolo kakala Jazeri muwari mwa Jileyadi. 32Jeriya ule vamohi na abalaye 2.700 kali asogolrelri a muibalini mwewa. Mwene Davi ohahela kala atu osogolrelra zela ja Mulugu na ja mwene muwari mwa malogo a Rubeni, Gadi eto na metadi ya nlogo na Manasesi.
Currently Selected:
1 Koronika 26: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
