1 Koronika 23
23
1Davi agamanle ulula, aganna yaka didjindji, ohomuhambiha mwanaye Salomawu, liye kala mwene wa Izarayeli.
Davi ohowonga eto zela mabasa a akuda Levi
2Davi ohagumaniha andimuwa atene a aIzarayeli vamohi na anamakuta na aLevi. 3Mwa enne kohakontari aLevi okana yaka 30 dowaga sogolro. Atene kali 38.000. 4Mwene Davi ohasakulramo atu 24.000 ira kaing'anelege mabasa omanga Nyumba ya Yehova. Ohasakulramo eto alombwana amohiwa okwakwana 6.000 ira kakale andimuwa na anamatonga. 5Ohasakulramo eto atu 4.000 ira kakale agwarda a va mulango na amohiwa 4.000 ira kamutamalelege Yehova na joimbana nyumbo jasakanyedile Davi ira jilabege mabasa anno. 6Davi ohagawamo aLevi atene makuru mararu mohara ahima araru a Levi kagali Jeresoni, Kowati na Merari.
7Ahima a mulombwana Jeresoni kali: Ladani na Simeyi. 8Ahima a Ladani kali: Jeyeli wenno ali musogolrelri, Zetani na Joweli. Atene kali araru. 9Ahima a Simeyi kali: Selomite, Haziyeli na Arani. Atene kali araru. Aliwa kali asogolrelri a muibalini mwa Ladani. 10Ahima a Simeyi kali Jahate, Ziza, Jeyusi na Beriya. Anna bali ahima a Simeyi. Atene kali annayi. 11Muwari mwa ahima anna, Jahate ali musogolrelri. Ohareliwa ali Ziza. Fwanyeya Jeyusi na Beriya tchanna ahima adjindjene. Na mwasa wenno aliwa kakontariwa nnga nivande nimohive.
12Ahima a mulombwana Kowati kali: Amiramu, Izari, Eboroni na Uziyeli. Atene kali annayi. 13Ahima a Amiramu kali: Arawu na Mozeji. Arawu ohosakulriwa ira liye vamohi na ahimaye kalabege Nimburo Notchenetchetcha, katumeyege mukuto otumeya vamentoni va Yehova, ira kamulabege eto kaarelihege atu mwa nzina na Yehova kala no kala. 14Zela Mozeji mutu wa Mulugu, ahimaye kakontariwe nnga aLevi a burebure. 15Mozeji aabanle anapongwe ala: Jeresoni na Eliyezeri. 16Jeresoni ambanle mulombwana Sebuweli. Sebuweli ule ali musogolrelri wa akuda Jeresoni. 17Eliyezeri ambanle mwanapongwe mmohi bahi aitaniwa Reyabiya. Reyabiya ule ohakana ahima adjindjene. 18Izari wenno ali mwana wanembinli wa mulombwana Kowati ambanle Selomite. Selomite ule ali musogolrelri wa muibalini mwaye. 19Eboroni wenno ali mwana waneraru wa mulombwana Kowati aabanle anapongwe ala: Murandji baliwa ali Jeriya, liye ali musogolrelri wa abalaye, wanembinli aitaniwa Amariya, waneraru aitaniwa Jahaziyeli eto wanennayi ali Jekameyawu. 20Uziyeli wenno ali mwana wanennayi wa mulombwana Kowati aabanle anapongwe ala: Mika wenno ali musogolrelri, wanembinli ali Isiya.
21Merari aabanle anapongwe ala: Mali na Musi, eto ahima a Mali kali Eliyazari na Kixi. 22Eliyazari akwile eno se mbala mwana wa mwanapongwe. Liye anna ahima a anavihiyana ve. Aliwa kateliwe na apirimwiwa anno kali ahima a mulombwana Kixi. 23Musi aabanle anapongwe ala: Mali, Ederi na Jeremoti. Atene kali araru.
24Anna bali anapongwe a Levi nnga mwakalele atu muibalini mwewa, na asogolrelri a muibalini mwewa nnga mwalrembiwe atu mohara nzina na kada mutu eto nnga mwakontariwe atu mmohi mmohi, atene okana yaka 20 dowaga sogolro. Aliwa kahinda mabasa a va Nyumba ya Yehova. 25Fwanyeya Davi ohowonga eraga: <<Yehova Mulugu wa Izarayeli uhavaha atwaye murendele, liye unakalegeve Jeruzalemu dowagave sogolro. 26Mwa eno kinafuneyegeve ira aLevi katukulege Musasa wa Yehova vamohi na jengo jolabana mabasa a vaMusasani evo.>> 27Mohariha jowonga jogomiheda jawongile Davi, aLevi anno kanna yaka 20 dowa sogolro kohokontariwa. 28ALevi mabasiwa ali akamiheda ahima a Arawu mabasa kalaba atu va Nyumba ya Yehova. Aliwa kohokana mabasa oing'anela va Nyumba ya Yehova, roma vatando na kwartu dimohi diwa da mmambalo. Aliwa eto kohokana mabasa otcheniha jengo jotchena eto na mabasa amohiwa a va Nyumba ya Mulugu. 29Aliwa eto kohokana mabasa osakanya pawu dotchenihiwa dedo nnatapulela ira Yehova uli vamohi na atwaye, utu wa tirigu otchileya pama para yovelela ya jodja, pawu dohosakanyiwana leverina, yovelela ya pawu dowotcha na yovelela ya utu wa tirigu ogumanihiwa na azeti, kohokana eto mabasa opima nyemela no indjiva wa jovelela javeleliwa muNyumba ya Yehova. 30Eto kohokana mabasa omutamalela no mutitimiha Yehova malambo matene na mabebehi na tchiguwo 31eto tempu ili yatene inaveleliwa mukuto otumeya wa Yehova wa siku na sabado na mukuto wa mwedi muxa vamohi na pwando dorumiwa na Yehova dimohi diwa nnga munawonga malamulo zela malambo anne.#23:31 nnga munawonga malamulo zela malambo anne. Zela malamulo a mikuto dafuna veleliwaga siku na Sabado nari siku na mwedi muxa na pwando dimohi diwa, nione Numero 28:9-23, 29:1-40. ALevi kairegenave eno vamentoni va Yehova. 32Na makalelo anne, akuda Levi kohovahiwa mabasa oing'anela Musasa Ogumanamo, Nimburo Notchena eto no akamiheda abaliwa a muibalini mwa Arawu anno kali anamakuta a va Nyumba ya Yehova.
Currently Selected:
1 Koronika 23: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
