1 Koronika 22
22
Davi ohogumaniha fwaramento domangana Nyumba ya Yehova
1Mwa enne Davi ohowonga ira: <<Nyumba ya Yehova Mulugu inoza ikale evano vamohi na ibuwa ya mukuto otumeya wa Izarayeli.>> 2Davi oharuma atu ira kaagumanihe aliba za anno kakala mwilamboni mwa Izarayeli. Evale liye ohasakulramo amesilri ogwada mabwe ira kamangiwena Nyumba ya Mulugu. 3Eto Davi ohogumaniha momba dohokala da masika ira kasakanyena peregu vamohi na doburadixa da misuwo dilukulu. Ohogumaniha eto mukuwa mudjindjene ohowanda pimiwa. 4Ohogumaniha eto viga da seduru dohokontareya, mwasiwa akuda Sidoni na akuda Tiru kohomuzelana Davi viga da seduru dohokala da masika. 5Davi agumanihetcha jatene ejo moumbuwela ira: <<Mwanaga Salomawu gu muzombwene eto kanarome mangiha jokala ha jeji. Nyumba unafuna liye mmangela Yehova inafuna ikale yotitimiheya, yovweya eto yoteteliwa mwilamboni yatene ya vati. Na mwasa wenno inafwanela divayele gumaniha fwaramento domangana nyumba yenno.>> Mwa enne Davi ahanakwe, ohovayela gumaniha fwaramento didjindji dene.
6Nomala enne ohomuitanaga mwanaye Salomawu, liye muruma ira amange Nyumba ya Yehova, Mulugu wa Izarayeli. 7Davi ohomuwandela mwanaye Salomawu eraga: <<Mwanaga, miyo dohokana funafuna ira dimange nyumba ira nzina na Yehova Mulugu waga nirihediwe. 8Mbwenye mazu a Yehova kohozaga wa miyo ira: <Weyo uhuvuviha sangiri nohokala na masika eto uhuwana kondo didjindji. Na mwasa wenno, weyo kunamanga nyumba ira nzina naga nirihediwe, mwasiwa uhuvuviha sangiri nohokala na masika mwilamboni vamentoni vaga.> 9Evale Mulugu ohopangana na miyo eraga: <Weyo unombala mwana unafuna kala mutu wa murendele. Miyo nnosakanya ira liye akayena murendele na amwidanaye atene anafwanyeya mwatene mwene. Liye nzina naye unaitaniwege Salomawu,#22:9 Na iEberewu nzina na Salomawu nnavweya nnga murendele. tchoira muwari mwa utongi waye miyo nnoavaha aIzarayeli murendele no pwaseya. 10Gu liyene unafuna manga nyumba ira nzina naga nirihediwe. Miyo nnokala babaye, liye unokala mwanaga. Miyo nnoavenyiha ahimaye ira katongege umwene wa Izarayeli kala no kala.> >> 11Davi ohowongagave na Salomawu eraga: <<Mwa eno mwanaga, Yehova akale na weyo ira jatene juwendele pama eto uwande manga Nyumba ya Yehova Mulugu wawo, nnga mwemo muwongele liye zela weyo. 12Yehova Mulugu wawo, akale wenno unafuna uvaha zelru no onelramo, ira wakala mwene wa Izarayeli, utongege mohara malamulo aye. 13Weyo waharihamo mangano na jotonga jatene Yehova anvahile liye Mozeji ira aawandele aIzarayeli, jatene jinerege uwendela pama. Ukale wa kopolo, ulimbe murima, kuove eto kurendjeye. 14Mwa mabasa malukulu, dihigumaniha jatene jeji ira Nyumba ya Yehova imangiwe: Dihigumaniha kwaranya matonelada 3.400 a oru, eto matonelada okwaranya 34.000 a parata, dihigumaniha eto mukuwa na momba dohopimeya. Dihigumaniha eto viga na mabwe. Weyo eto inafwanela uwendjede johalela jiwa. 15Weyo eto uhakana anamalaba oindjiva: Atu ogwada mabwe, amesilri omanga nyumba, anamasema na atu ohowanda kontareya oiziwa laba mabasa ali matene olabana 16oru, parata, mukuwa na momba. Kavenya, urome laba. Yehova akale na weyo!>>
17Davi eto oharuma andimuwa atene a Izarayeli ira kamukamihede mwanaye Salomawu. 18Liye kwi: <<Na ibaribari Yehova Mulugu wenyu uli na nyo eto uhuvahani murendele pandi datene dene. Liye uhavaha mmandani mwaga atu kakala mwilamboni emuno, eni ilambwela inatongiwa na Yehova vamohi na atwaye. 19Mwa eno nvendeni Yehova Mulugu wenyu na murima wenyu eto na muzimu wenyu. Murome manga Nyumba ya Yehova ira muhelemo Kaxa ya Yopangana ya Yehova na jengo jimohi jotchenihiwa, jikale muwari mwa nyumba yenno inafuna mangiwa ira nzina na Yehova nirihediwe.>>
Currently Selected:
1 Koronika 22: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
