1 Koronika 21
21
Mulugu ohotakaleliwa na Davi na mwasa oakontari atu
1Satana ohofuna joatatamulela makani aIzarayeli, mwa enne ohomunyenga Davi ira aakontari aIzarayeli.#21:1 aakontari aIzarayeli: Nione 2 Samuweli 24:1 na rodape uli evo. Fwanyeya ira Mulugu ohomurumeliha Satana ira amunyenge Davi. Davi ira arome akontari atwaye atene, yakala nnga liye aanyindela atu adjindji anna liye adowaga kondoni hiya Mulugu. 2Mwa enne Davi ohomuwandelaga Jowabe na asogolrelri amohiwa a anyakondo, liye ira: <<Venyani mudowe, mwaakontari aIzarayeli kumela ilambo ya Beriseba fiyeda ilambo ya Dani.#21:2 Kuma ilambo ya Beriseba fiyeda ilambo ya Dani ku wonga ilambo yatene mwali aIzarayeli. Amala eno muze mudiwandele indjiva uwa ira diiziwe.>> 3Evale Jowabe ohomuwakulaga eraga: <<Yehova akale wenno unafuna aindjiviha atwaye fendo 100. Kodi atu atene anna kahi anamalaba enyu mbwiyeni so mwene? Nnga mwasiwa gwa nni mbwiyeni, nyo funaga irana jokala ha ejo? Mwasiwa gwa nni nyo funaga irana yengo yoategiha aIzarayeli?>> 4Mbwenye mwene ule ohomukanyihedagave Jowabe ira airena. Evale Jowabe ohomaruwa, liye dowa wendawenda ilambo yatene ya Izarayeli, liye akontarigi atu owanda wana, nomala liye welela Jeruzalemu. 5Evale Jowabe ohomuwandelaga mwene Davi indjiva wa atu atene. Muwari mwa aIzarayeli atene, alombwana owanda wana na supada kali okwakwana 1.100.000 eto muwari mwa akuda Juda atene, alombwana owanda wana kondo na supada kali 470.000. 6Jowabe aakontarigi atu, liye kaakontarile atu a nlogo na Levi na atu a nlogo na Benjami, mwasiwa nlamulo na mwene nne nali notakala vamentoni vaye.
7Fwanyeya Mulugu na liyene kaziveliwe. Na mwasa wenne, ohatonga aIzarayeli. 8Mwa enne Davi ohowongaga na Mulugu eraga: <<Miyo dihitega valukulu na mwasa oirana jengo jokala ha eji. Mwa eno nnouvepani mudilevelele yotega yaga miyo namalaba wenyu! Tchoira dihisakanya ja uzimora.>> 9Evale Yehova ohowongaga na Gadi, wenno ali namaona wa Davi, eraga: 10<<Udowe wamuwandele Davi wire: <Yehova gunawonga ira: <<Miyo nnafuna diwonge jengo taru jabure. Usakulre muwari mwa jengo taru ji ira miyo duirele yenno inasakulre we!>> > >> 11Evale Gadi ohodowaga wonga na Davi, liye ira: <<Yehova unawonga ira usakulre inafuna we, mwa jengo taru ji: 12Vivire yaka taru da ndala, owu hehi umale medi miraru amwidanawo kaugondjihaga na supada, owu malambo mararu motongiwa na supada na Yehova, ku wonga mwilamboni mukale itukwa muwari mwa malambo mararu, Mungelro wa Yehova aatolotchaga atu mwilamboni mwatene mwa Izarayeli. Kawonga tchineneva inafuna miyo damuwakule wenno udirumile.>> 13Evale Davi ohomuwakulaga Gadi, liye ira: <<Miyo dili mmakatamihoni malukulu. Nnosakulra gwela mmandani mwa Yehova, mwasiwa liye gwa tangaranga dilukulu. Kannafuna ira digwele mmandani mwa atu.>>
14Mwa enne Yehova ohorumaga itukwa wa aIzarayeli, evale kohokwaga alombwana okwakwana 70.000. 15Evale Mulugu ohomuruma Mungelro waye ira atolotche sidadi ya Jeruzalemu. Mbwenye mungelro ule afunaga tolotcha, Yehova ohotchindjaga youmbuwela yenne, liye wonga na mungelro otolotcha ule eraga: <<Kahiya, ikwakwana!>> Tempu yenne mungelro ule afwanyeya vakwikwive na nimburo nobubudavo jalo na mulombwana Arawuna nkuda Jebuzi. 16Davi ohovenyihaga meso, liye muona Mungelro wa Yehova ule agali muzulu muzulu, supada naye nagali noreya nene mmandani mwaye agasurumihele Jeruzalemu. Evale Davi na andimuwa a Izarayeli, kohowaraga masakwi, aliwa kokora kaoramihaga kove diwa ante fiyiha vati. 17Evale Davi ohowonga na Mulugu ira: <<Kodi kahi miyo urumile ira atu kakontariwe? Gu miyo utegile, usakanyile yabure. Nnga mabila ala kasakanyile yengo nni? Aa, Yehova Mulugu waga, muditonge miyene na atu a vande va babaga, hiya atolotcha atwinyu.>>
Davi ohomanga ibuwa
18Nomala enne, Mungelro wa Yehova ohomuruma Gadi ira amuwandele Davi ira amange ibuwa ya mukuto ya Yehova va nimburo nobubudavo jalo na mulombwana Arawuna nkuda Jebuzi. 19Evale Davi ohodowa wewule, movwelela mazu amuwandenle Gadi mwa nzina na Yehova. 20Mwa tempu yenne, mulombwana Arawuna afwanyeya abubudaga tirigu. Evale agarungunuwile, ohomuonaga mungelro. Agamuonne enne, liye vamohi na ahimaye annayi kohovitalaga. 21Davi afiyaga vali Arawuna vale, Arawuna ohoing'anaga, liye muona Davi azaga. Evale ohokumelela va nimburo nobubudavo jalo nne, liye mukokorela Davi, aoramihaga kove yaye ante fiyiha vati. 22Evale Davi ohowonga na Arawuna eraga: <<Miyo nnafuna ira udigulihede nimburo nawo nobubudavo jalo ni na peresu yokwakwanela, kamuvungulewo. Nnafuna dimangevo ibuwa ya mukuto ya Yehova ira ubure wenna uli vari va atu umale.>> 23Evale Arawuna ohowongaga na Davi ira: <<Katukulani, nikale nenyu, mbwiyeni so mwene. Musakanyevo yenno munafuna nyo. Eto miyo nnouvahani ng'ombe di ira musakanyena mukuto otumeya, nnouvahani jimiri jobubudana tirigu ji ira jikale kuni diwa, eto nnouvahani tirigu ula para yovelela ya jodja. Jatene ejo miyo nnouvahani.>> 24Mbwenye mwene Davi ohomuwandelaga Arawuna kwi: <<Nari. Miyo nnafuna dibabihe gula jatene eji na kobiri datene dokwakwanela. Tchoira miyo kannavelela wa Yehova yenno ili yawo. Eto miyo kannavelela mikuto dotumeya dedo divahiwe miyo wasayi.>> 25Mwa enne Davi ohompagalri mulombwana Arawuna wandamelana kilu 7 da oru mogula nimburo nne. 26Noira enne, Davi ohomangaga vevale ibuwa ya mukuto wa Yehova eto ohovelelaga mikuto dotumeya na jovelela ja murendele. Davi ohonvepaga Yehova, mwa enne Yehova ohorumelaga yovepa yaye moruma munlo kumela zulu, za tumeya mikuto dali vaibuwani vale. 27Evale Yehova ohomuruma mungelro ira asolede supada nne munimbazini mwaye, liye vwelela.
28Davi vaonne liye ira Yehova ohomuwakula yolobela yaye va nimburo nobubudavo jalo na Arawuna nkuda Jebuzi nne, ohoromaga velela mikuto vevale. 29Tempu yenne, Musasa wa Yehova wenno Mozeji asakanyile liye muisalesaleni, na ibuwa ya mukuto otumeya jafwanyeya nimburo notama novelela mikuto na Jibeyawu. 30Fwanyeya siku nenne na mwasa oova supada na Mungelro wa Yehova ule, Davi kawandile dowa wewule nfuka Mulugu zela yafuna liye ira.
Currently Selected:
1 Koronika 21: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
