1 Koronika 19
19
Davi ohagondjiha akuda Amoni na akuda Siriya
1Vagavirile malambo, Nasi mwene wa akuda Amoni ohokwa. Agakwile, mwanaye Anumi ohokala mwene vamalroni vaye. 2Evale Davi ohoumbuwelaga ira: Miyo nnafuna dimuirele upama mulombwana Anumi mwana Nasi, mwasiwa babaye ohodiirela upama. Evale Davi oharumaga aliba milanyo ira kadowe kamutondole Anumi na mwasa wa ukwa wa babaye. 3Mbwenye anamalaba a Davi ale kagafiyile, andimuwa a akuda Amoni kohomuwandelaga mwene Anumi keraga: <<Kodi munaumbuwela ira Davi unamuriheda babinyu moaruma atwala ira kaze katondole? Mwasa waarumele liye kahi wenno nari! Davi waarumile atwala nnga aliba wendelela ira kawendelele ilambwela, kamala kaze kanitolotche.>> 4Mwa enne, Anumi ohahindaga anamalaba a Davi ale, liye asata ndevu, eto ohogwadaga jowara jiwa gomeliha mmwinini, nomala liye aruma ira kadowege. 5Mwa enne kohokala atu kamaruwile aliwa dowa muwandela Davi jatene jaaireyele alombwanale. Evale mwene Davi agawandeliwe zela nyaswa undimuwa wanna atwale, oharumaga atu eraga: <<Mudowe mwaawandele aliwa ira musidadi muno kifiyemo. Kakale Jeriko fiyeda ndevu diwa difiyede ulukula akoka. Dagamanle ulukula nyo podi welela uno.>>
6Akuda Amoni kagaonne ira eni nihivitotela mwasa oira Davi aniidege, mulombwana Anumi na aAmoni afwaye kohokumiha kilu 34.000 da parata, aliwa dowa alugarina aaterelado a kondo na anyakondo owenda na kavalo a akuda Mezopotamiya, aSiriya, aMaka na akuda Zoba. 7Kohaalugari aaterelado okwakwana 32.000 na aliba wendiha aaterelado ale, eto kohomugula mwene wa Maka na anyakondwaye, aliwa za kunga misasa diwa sogolro wa Medeba. Akuda Amoni na aliwene kohokumaga musidadi mwakala atu, aliwa gumanela vamohive ira kadowe kawane. 8Davi agavwile enne, ohomurumaga Jowabe na anyakondo atene a kopolo ira kadowe kawane na aliwa. 9Evale akuda Amoni kohomaruwa aliwa dowa vikunga va mulango wa sidadi, eto amwene anno kazile kamiheda ale kavikungile pandi imohiwa, nimburo eni mwahalive mitengo.
10Jowabe agaonne ira sogolro waye wohokala nikuru na anyakondo a amwidani eto mundulri mwaye mohokala amohiwa ovitanda ira kawane na liye, ohasakulramo anyakondo oiziwa wana pama a Izarayeli, liye ahela sogolro wewo wafwanyeya anyakondo a Siriya. 11Anyakondo amohiwa ohala liye ohonvahedaga mbalaye Abizayi eto liye atanda moing'ana pandi wali aAmoni. 12Evale Jowabe ohowongaga na Abizayi eraga: <<Muwari mowana, akuda Siriya kakala a kopolo dikwaranya miyo, weyo uze udikamihede. Eto akuda Amoni kakala a kopolo ukwaranya weyo, miyo nnoza duukamihede. 13Inafwanela ukale wa kopolo! Niwane molimba murima na mwasa wa atwihu eto na mwasa wa sidadi da Mulugu wehu, eto Yehova airena yengo yenno ili yapama vamentoni vaye.>> 14Mwa enne, Jowabe vamohi na anyakondo aye kohodowa tatamula kondo na akuda Siriya, evale akuda Siriya ale kohotawaga vamentoni vaye. 15Akuda Amoni kagaonne ira akuda Siriya anatawa, na aliwene kohomutawaga Abizayi wenno ali Jowabe mbalaye, aliwa dowa volowa musidadi. Evale Jowabe ohowelelaga Jeruzalemu.
16Akuda Siriya kagaonne ira nihigondjihiwa na aIzarayeli, koharuma aliba milanyo ira kadowe kaaitane akuda Siriya amohiwa kakala pandi imohiwa ya muhindje Eufarati. Atu kaitanihiwe ale, kasogolrelriwa na mulombwana Sofaki, wenno ali musogolrelri wa anyakondo wa mwene Hadadezeri. 17Davi agawandeliwe zela ejile, ohagumaniha anyakondo a aIzarayeli atene, aliwa dowa lambuwa muhindje Jordawu, liye atanda anyakondwaye ale ira karome wana na akuda Siriya. Evale Davi amalaga atanda anyakondwaye ale, akuda Siriya ale kohoromaga wana na liye. 18Evale akuda Siriya ale kohoroma atawaga aIzarayeli. Davi na anyakondwaye koaharaga, aliwa apa alombwana owendiha aaterelado a kondo okwakwana 7.000 a akuda Siriya vamohi na alombwana 40.000 owenda na mendo. Eto mulombwana Davi ohompa Sofaki wenno ali musogolrelri wa anyakondo. 19Amwene katongiwa na Hadadezeri kagaonne ira kohogondjihiwa na aIzarayeli, kohosakanya nipangano nowandana na Davi, aliwa roma mulaba. Mwa enne aAsiriya ale tchawelenle akamiheda akuda Amoni akoka.
Currently Selected:
1 Koronika 19: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
