1 Koronika 18
18
Davi ohowana kondo eto ohagondjiha amwidanaye
1Nomala enne, Davi ohowanaga na aFilistewu liye agondjiha. Agaagondjihile enne, ohoromaga tonga sidadi ya Gate na tatamo darungunuwile sidadi ile vamalroni va aFilistewu. 2Eto Davi ohagondjiha akuda Mowabe, aliwa roma tongiwaga na liye, eto kompagalretcha misoko.
3Davi eto ohomugondjiha Hadadezeri mwene wa Zoba, agali wandamelana Hamate adowaga weliheda matongelo aye ilambo ya vakwikwi na muhindje Eufarati.#18:3 adowaga weliheda matongelo aye: Va inorutcha onelramo akala mutu unawongiwa gu Davi owu gu Hadadezeri. Mbwenye inaiziweya tchoira kagawanile, amugondjihile nfwaye ali Davi. 4Davi ohomuwakaga Hadadezeri ule aaterelado 1.000, atu 7.000 owenda na kavalo na alombwana 20.000 owenda na mendo. Evale Davi ohotukula kavalo 100 dotutumula aaterelado a kondoni ira dikale daye, kavalo dimohi dohala liye dirangaliha. 5Evale akuda Siriya kakala Damaxiku kohozaga ira kamukamihede Hadadezeri mwene wa Zoba ule. Mbwenye muwari mwa akuda Siriya kazile ale, Davi ohapaga 22.000. 6Davi agaagondjihile, ohosakanyaga mabazi a anyakondo aye sidadi ya Damaxiku muwari mwa ilambo ya Siriya. Evale akuda Siriya kohokala anamalaba a Davi, eto kompagalretcha misoko. Eto Yehova omukamiheda mwene Davi ira awandege agondjiha amwidanaye mwatene mwawana liye. 7Davi agamugondjihile mwene Hadadezeri ule, ohawakaga anamalaba a Hadadezeri ale defeza da oru dedo dawendetchana atu, liye dowagana Jeruzalemu. 8Ohotukulaga eto mukuwa oindjivetchetcha afwanyeya sidadi ya Tibate na Kumu sidadi datongiwa na Hadadezeri. Mukuwa atukunle Davi ule, gwenno Salomawu asakannyena liye tanki mohela mahindje, mambozo vamohi na jengo ja mukuwa jejo jalabana atu muNyumba ya Yehova.
9Mwene wa sidadi ya Hamate wenno aitaniwa Toyi, agavwile ira Davi uhugondjiha nikuru natene na anyakondo a Hadadezeri mwene wa Zoba, 10ohomurumaga mwanaye mmohi aitaniwa Hadorawu ira adowe amulondjele Davi eto amutetele zela mabasa alabile liye na mwasa owana na mwene Hadadezeri fiyeda mugondjiha. Tchoira Hadadezeri na mulombwana Toyi mundulri mwaza atu keretcha wana. Mwene Toyi ule amurumaga mwanaye, ohonvahedaga jengo ja oru, ja parata na ja mukuwa ira adowe anvahe Davi. 11Evale mwene Davi agatukunle jengo jile, ohovelelaga wa Yehova nnga jairilena liye parata na oru, jejo jaawakile liye atu a malogo amohi, malogo a akuda Edomu, akuda Mowabe, akuda Amoni, aFilistewu na aAmaleki.
12Fwanyeya mwa tempu yenne, Abizayi mwana Zeruwiya, ohapa akuda Edomu okwakwana 18.000 ndabo na Mwinnyu. 13Davi agagondjihile, osakanyaga mabazi a anyakondo aye muwari mwa ilambo ya Edomu. Evale akuda Edomu atene kohokala anamalaba a Davi. Eto Yehova omukamiheda mwene Davi ira awandege agondjiha amwidanaye mwatene mwadowa liye wana.
Andimuwa kalaba muumweneni mwa Davi
14Mwene Davi oatongetcha aIzarayeli atene. Muwari motonga, otonga mwa ibaribari eto oasogolrelra mokwakwanela atwaye atene. 15Musogolrelri waye wa anyakondo aitaniwa Jowabe wenno mmaye ali Zeruwiya. Eto maliba lremba joira ja guverno ali Jozafa mwana Ailude. 16Eto Zadoki mwana Ayitube na Abimeleki mwana Abiyatare kali anamakuta, mulombwana Sawuza ali namalremba. 17Benaya mwana Joyada ali musogolrelri wa aKereti vamohi na aPeleti,#18:17 aKereti vamohi na aPeleti kafwanyeya kagali agwarda a Davi. Afwase tchali aIzarayeli. (Ezekiyeli 25:16; Sofoniya 2:5) eto fwanyeya ira ahima a Davi kali andimuwa muwari mwa umwene wa Davi.
Currently Selected:
1 Koronika 18: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
