1 Koronika 13
13
Doweliwa wa Kaxa ya Yopangana ilambo ya Kiriyati-Jeyarimi
1Davi ohafukaga zelru asogolrelri a anyakondo 1.000 eto na asogolrelri a anyakondo 100 na andimuwa atene. 2Nomala enne Davi ohawandelaga atu atene a Izarayeli eraga: <<Akala munaona ira ili pama, eto akala tchi yofuna ya Yehova Mulugu wehu, naarumeni mobaranya aliba milanyo kadowe wa abalihu amohi anakala vilambo datene da Izarayeli na anamakuta vamohi na aLevi afwiwa anno anakala sidadi dewa na mamburo owandamela odjihamo jifuwo jiwa ira kaze kagumanele na hiyo. 3Ili ira nidoweleni Kaxa ya Yopangana ya Mulugu wehu, nizena ira ikalege vari vehu akoka. Mwasiwa tempu yatonga Sawuli hiyo kanailabetchana.>> 4Agawongile enne, atu atene kohorumelaga, tchoira atene kaonne ira liye ohowonga yengo yapama.
5Noira enne Davi ohagumaniha aIzarayeli atene kumela muhindje Siyori wa Ijipitu dowagave fiyeda madilre a Lebo-Hamate pandi ya Norti, ira kadowele Kaxa ya Mulugu ilambo ya Kiriyati-Jeyarimi. 6Mwa enne Davi na aIzarayeli atene kohodowaga Baala (tchi imohive nowonga Kiriyati-Jeyarimi) ilambo ya Juda ira kawelihewo Kaxa ya Yopangana ya Mulugu, wenno unaitaniwa Yehova, wenno unakala vampandoni vaye vari va akerubi. Tchi Kaxa ya Yopangana yenno inaitaniwa na nzina naye. 7Aliwa kohoitukulaga kaxa ya Mulugu ile vande va Abinadabe, aliwa ihela muatereladoni muxa.#13:7 aliwa ihela muatereladoni muxa: Tukula Kaxa ya Yopangana ya Yehova na aterelado ali zelru da atu. Mulugu mbwenye ohowonga ira Kaxa ya Yopangana itukuliwege mmandani na jimiri. Nione Ezodu 25:14; Numero 7:6,9. Awendiha ng'ombe dedo datutumula aterelado ule ali mulombwana Uza na Ayiyo. 8Mwa enne Davi vamohi na aIzarayeli atene kohagalalaga vamentoni va Mulugu kaimbaga eto kainaga momutamalela Mulugu. Aliwa koimbaga arpa, lira, makotcho, joimbana jinakala nnga parato na palraza.
9Kagafiyile nimburo nobubudavo jalo na mulombwana mmohi eriwa Kidomu, ng'ombe dedo datutumula aterelado ule dohogwagwaduwaga. Evale mulombwana Uza ohotapulaga ndanda naye, liye hideda Kaxa ya Mulugu ile ira yahamorele vati. 10Na mwasa wenne, Yehova ohokana takaleliwa wohokala wa masika zela mulombwana Uza, liye mporotcha na mwasa otapula ndanda naye hindana Kaxa ya Yopangana.#13:10 liye mporotcha na mwasa otapula ndanda naye hindana Kaxa ya Yopangana. Mulugu ohawandela aliba tukula jengo jotchena ira: <<Nyo mwatukulaga Kaxele kamuhindege, mwasiwa mwahinda, munokwa.>> So aliwa kahinda jimiri jotukulana jiwa jile, hiya Kaxele. Nione Ezodu 25:14; Numero 4:15, 7:6,9. Mulugu ohompa mulombwana Uza mwasiwa kaali funa wa Mulugu ira aliwa kahele Kaxele vazulu va aterelado otutumuliwa na ng'ombe. Evale mulombwana Uza ule ohokwaga vevale vamentoni va Mulugu. 11Mwa enne Davi ohotakaleliwaga na mwasa oira Yehova ohompa mulombwana Uza. Na mwasa wenne, ohovahaga nimburo nenne nzina na Pereji-Uza [ku wonga Tongiwa wa Uza]. Fiyeda peno nimburo nenne nnaitaniwa na nzina neno. 12Evale Davi ohomuovaga Mulugu siku nenne. Muwari moova ohowongaga eraga: <<Nnga miyo nnawande avi tukula Kaxa ya Mulugu ila ira ikalege na miyo?>> 13Na mwasa wenne, Davi kaatukunle Kaxa ya Yopangana ile adowana sidadi ya Davi. Mbwenye adowilege ihiya vande va mulombwana mmohi aitaniwa Obedi-Edomu, nkuda Gate. 14Mwa enne Kaxa ya Mulugu ile yohomala medi miraru yagali vande va mulombwana Obedi-Edomu evale. Noira enne, Yehova ohomureliha mulombwana Obedi-Edomu ule vamohi na atu atene a vande vaye na jengo jatene janna liye.
Currently Selected:
1 Koronika 13: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
