Jabuura 144
144
Jabuura 144
1Jabuura Daawda
Yettoore woodanii Joomiraaɗo, laatiiɗo tefaare am,
ekintinoowo kam no njaalortoomi,
kolloowo kam no tappirammi wayɓe.
2Kanko woni giɗo am, moolorde am,
cuuroowo kam, dannoowo kam e baasi,
wawaade am nde cuuɗortoomi.
Kanko waɗata de yimɓe am na ɗowtanoo kam.
3Yaa Joomiraaɗo, ɓii-Aadama wo moy,
sakko kakkilanaa ɗum?
Ɗume neɗɗo laatii, sakko taykoɗaa ɗum?
4Tagaaɗo na nanndi e foofaango,
balɗe muuɗum na laatii hono ɗoogi paltotooki.
5Yaa Joomiraaɗo, feertu kammu de njippoɗaa,
meemaa baamle de cuurki wuurtoo e majje.
6Neldu maƴƴe maaɗa cankita ɓe,
fiɗu ɓe kure faa ɓe caakoo.
7Foortu junngo maaɗa gilla dow kammu de ndannaa kam.
Kisinaa kam e diyeele lugguɗe.
Teetam e juuɗe yananɓe,
8ɓe kunnduɗe muɓɓen keewi fewre
ɓe hunayeere muɓɓen laatii jammba.
9Yaa Laamɗo, mi yimante jimol kesol,
mi hoɗante hoddu ndu gaaci sappo.
10Wo aan hokkata kaanankooɓe jaalorgal.
Aan hisinta maccuɗo maaɗa Daawda e kaafaahi mbaroohi.
11Hisinam, ndannaa kam e juuɗe yananɓe,
ɓe kunnduɗe muɓɓen keewi fewre,
ɓe hunayeere muɓɓen laatii jammba.
12Ndeen ɓiɓɓe amin worɓe nga'an hono leɗɗe bagge, jaawuɗe hayaade.
Ɓiɓɓe amin rewɓe du, hono bimmbeeje cehaaɗe ŋarɗinirɗe laamordu.
13Beembe amin keewan, kebbinte kujje feere feere.
Cogge amin ɓeydorto ujunaaje ujunaaje,
na keewi ley durduɗe amin.
14Na'i amin ɓeydoto,
kokuuji amin njulataake,
nanngeede yaaree leydi njanandi timman,
bojji du, nanataake ley gure amin.
15Barke woodanii lenyol keɓungol ɗuum fuu!
Barke woodanii yimɓe ɓe Joomiraaɗo laatii Laamɗo muɓɓen!
Currently Selected:
Jabuura 144: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
