Jabuura 119
119
Jabuura 119
א Alef #119:1 Ley Jabuura oo, diidi binndi jeetati fuu wo ƴi'e Ibraninkoore gootal fuɗɗirta gilla go'aɓal א Alef faa yotto noogay e ɗiɗaɓal ת Tav.
1Barke woodanii ɓe ngalaa feloore,
tokkuɓe Tawreeta Joomiraaɗo.
2Barke woodanii ɗowtantooɓe jamirooje makko,
filortooɓe mo e ɓerɗe muɓɓen fuu ɓeen.
3Ɓe ngaɗataa ko boni,
iɓe ndewi laawi makko.
4A hokkii jamirooje maaɗa
faa ɗe ɗowtanee goonga e goonga.
5Wallam mi wuurda no haaniri
faa mi ɗowtanoo jamirooje maaɗa,
6ndeen mi semtataa,
si miɗo haybana ko njamirɗaa ɗuum.
7Mi yettirte e ɓernde laaɓunde,
e janngude sariyaaji maaɗa ponnditiiɗi.
8Mi jogitoto jamirooje maaɗa,
taa yoppam lay lay!
ב Bet
9Noy jokolle waawiri wuurdude e laaɓal?
Sey nde haybani konngol maaɗa.
10Mi filorake ma e ɓernde am fuu,
taa accu mi sela laawol, mi woɗɗoo jamirooje maaɗa.
11Miɗo resi konngol maaɗa ley ɓernde am,
faa taa mi waɗa hakke yeeso maaɗa.
12Barke woodanii ma, yaa Joomiraaɗo!
Jannginam sariyaaji maaɗa.
13Toni am na ndursitoo
sariyaaji konngol maaɗa fuu.
14Mi heɓii seyo ley ɗowtanaade jamirooje maaɗa,
hono keɓuɗo jawdi ɗuundi.
15Mi dursitoo sariyaaji maaɗa.
Wooɗi du, mi taykoto laawi maaɗa.
16Miɗo weltoroo sariyaaji maaɗa,
mi yeggitataa konnguli maaɗa.
ג Gimel
17Waɗanam ko wooɗi, miin maccuɗo maaɗa,
faa mi wuura de mi tiigoo konngol maaɗa.
18Omtu gite am, faa mi yi'a
mbooɗirka Tawreeta maaɗa.
19Min wo mi beero ley adunaaru,
taa suuɗam jamirooje maaɗa.
20Yonki am na heewi muuyɗe
ɗowtanaade jamirooje maaɗa wakkati fuu.
21Aɗa felɓa mawnitiiɓe huɗaaɓe,
tottitiiɓe mboɗɗii jamirooje maaɗa ɓeen.
22Senndam e jennooje e huyfere,
sabo miɗo ɗowtanoo ko njamirɗaa.
23Fay si ardiiɓe lenyi njooɗii kaali mbonka dow am,
miin maccuɗo maaɗa kaa, miɗo dursitoo sariyaaji maaɗa.
24Jamirooje maaɗa na laatanii kam ko weli,
iɗe laatii tindinooje kam.
ד Dalet
25Inan miɗo waalii e leydi ley sollaare.
Wuurnam fodde konngol maaɗa.
26Mi hollii ma ko ngaɗumi fuu, de njaabiɗaa kam,
ekintinam jamirooje maaɗa.
27Wallam mi hakkilana sariyaaji maaɗa
faa mi dursitoo golleeji maaɗa kaayniiɗi.
28Mettorgal wullinii kam,
semmbinɗinir ɓernde am e konngol maaɗa.
29Woɗɗinam laawol fewre
de kokkaa kam moƴƴere Tawreeta maaɗa.
30Mi suɓake laawol goonga,
miɗo ɗowtanoo sariyaaji maaɗa.
31Miɗo haɓɓondiri ɓernde am e jamirooje maaɗa.
Yaa Joomiraaɗo, wallam taa mi semta.
32Miɗo dogga dow laawol jamirooje maaɗa
sabo a yaajinii faamu am.
ה He
33Yaa Joomiraaɗo, hollam laawol jamirooje maaɗa
faa mi tiigoo ɗe faa abada.
34Hokkam hakkillo faa mi tiigoroo Tawreeta maaɗa,
mi ɗowtanoo ɗum e ɓernde am fuu.
35Rewnam laawol jamirooje maaɗa
sabo iɗe mbeli kam.
36Fooɗir muuyɗe ɓernde am to jamirooje maaɗa
taa keɓal jawdi haɓɓa kam hakkillo.
37Tottintin gite am ko laatii fewre fuu,
de mbuurniraa kam e konngol maaɗa.
38Tabintinanam, miin maccuɗo maaɗa,
moƴƴere nde podaniɗaa hulooɓe ma ndeen.
39Woɗɗinam e semteende nde kulammi,
sabo sariyaaji maaɗa wo lobbi.
40Goonga, miɗo haajaa jamirooje maaɗa sanne,
wuurniram e fonnditaare maaɗa.
ו Waw
41Yaa Joomiraaɗo, waɗu hinney maaɗa jippoo dow am.
Mi heɓa kisindam maaɗa fodde ko aadiɗaa.
42Ndeen mi waawan jaabaade jennoowo kam,
sabo miɗo hoolii konngol maaɗa.
43Taa ittu goonga e hunnduko am abada,
sabo miɗo heɗii kiite maaɗa.
44Mi ɗowtanto Tawreeta maaɗa wakkati fuu
faa abada, abadin.
45Mi wuurdan e hakkillo fukkiingo
sabo miɗo filoo rewude laawi maaɗa.
46Mi haalan haala jamirooje maaɗa yeeso kaanankooɓe,
mi semtataa.
47Mi weltorto jamirooje maaɗa
ɗe korsinmi ɗeen.
48Mi ɓantan juuɗe am mi teddina jamirooje maaɗa ɗe njiɗumi ɗeen.
Mi miiloto dow sariyaaji maaɗa.
ז Zayin
49Miccitoɗaa konngol ngol kaaldunoɗaa e maccuɗo maaɗa,
konngol laataniingol kam jikke ngool.
50Ingol laatii baaltinoowol ɓernde am wakkati tiiɗalla,
sabo wo kanngol wuurnata kam.
51Mawnitiiɓe na mbarda kam jalnorgal,
ammaa mi wosaaki Tawreeta maaɗa.
52Miɗo miccitoo kiite maaɗa arandeeje, yaa Joomiraaɗo,
iɗe mbaaltina ɓernde am.
53Dukkuru huɓɓooru nanngii kam saabe bonɓe,
yoppooɓe Tawreeta maaɗa ɓeen.
54Jamirooje maaɗa laatake yimreeji am
ley duuniyaaru ndu laatiimi beero e muuɗum.
55Miɗo miccitoo innde maaɗa ley jemma, yaa Joomiraaɗo,
faa mi ɗowtanoo Tawreeta maaɗa.
56Ɗowtanaade jamirooje maaɗa,
laatii halal am.
ח Het
57Yaa Joomiraaɗo, mi wi'ii:
Ɗowtanaade konngol maaɗa woni ko njeyumi waɗude.
58Miɗo filoo moƴƴere maaɗa e ɓernde am fuu,
waɗanam hinney fodde konngol maaɗa.
59Miɗo hakkilana laawol am,
ndelle miɗo ɗowtanoo jamirooje maaɗa.
60Miɗo haroo, mi hanndataako e
ɗowtanaade jamirooje maaɗa.
61Ɓoggi bonɓe kaɓɓii kam,
e noon fuu mi yeggitataa Tawreeta maaɗa.
62Miɗo ummoo hakkunde jemma faa mi teddine
saabe fonnditaare anniyaaji maaɗa.
63Miɗo laatii yigoo hulooɓe ma
e ɗowtantooɓe jamirooje maaɗa fuu.
64Hinney maaɗa heewii ley adunaaru, yaa Joomiraaɗo!
Jannginam sariyaaji maaɗa!
ט Tet
65A waɗanii maccuɗo maaɗa ko wooɗi,
fodde konngol maaɗa, yaa Joomiraaɗo.
66Ekintinam hakkilantaaku e anndal,
sabo miɗo hoolii jamirooje maaɗa.
67Fadde mettorgal ɓernde hewtaade kam, mi wosakeno laawol.
Joonin miɗo tiigii jamirooje maaɗa.
68Wo a lobbo, a moƴƴuɗo,
ekintinam sariyaaji maaɗa.
69Mawnitiiɓe tuunnirii kam e pene muɓɓen,
ammaa miin kaa, miɗo ɗowtoranoo jamirooje maaɗa e ɓernde am fuu.
70Ɓerɗe maɓɓe mbaatii, maatataa faa'e katin,
ammaa miin kaa, Tawreeta maaɗa woni njuumndi am.
71Torra kaan laatanake kam ko wooɗi,
sabo wallii kam e ekitaade sariyaaji maaɗa.
72 Tawreeta ƴuuruɗo e hunnduko maaɗa
na ɓurani kam kujje kaŋŋe e cardi ujunaaje.
י Yod
73Juuɗe maaɗa tagii kam, cemmbinɗini kam.
Hokkaram hakkillo faa mi ekitoroo jamirooje maaɗa.
74Hulooɓe ma na nji'a kam de na ceyoo,
sabo miɗo woodi jikke e konngol maaɗa.
75Miɗo anndi ko kiite maaɗa wo ponnditiiɗe, yaa Joomiraaɗo,
wo ley moƴƴere maaɗa cemtinirɗaa kam.
76Hinney maaɗa laatoo ko deƴƴinta kam
hono no podoraninoɗaa maccuɗo maaɗa noon.
77Hollam yurmeende maaɗa faa mi wuura,
sabo Tawreeta maaɗa na weli kam.
78Semteende huura mawnitiiɓe dilooɓe kam dow ɓolum ɓeen.
Miin kaa, miɗo dursitoo jamirooje maaɗa.
79Waɗu hulooɓe ma njeccoo ɗo am
annduɓe jamirooje maaɗa ɓeen.
80Wallam mi ɗowtoranoo sariya maaɗa e ɓernde am fuu,
taa mi semta.
כ Kaf
81Semmbe am re'ii e heɗaade kisindam maaɗa.
Miɗo yowi jikke am e konngol maaɗa.
82Gite am lokkiɗii e heɗaade aadi maaɗa.
Miɗo ƴamitoo faa ndeye ndeƴƴintaa kam.
83Mi yoorii hono sumalle dekaaɗo dow henaango,
ammaa mi yeggitaay jamirooje maaɗa.
84Ɓalɗe foti ɗum ɓooyiranta maccuɗo maaɗa?
Faa ndey carotoɗaa torrooɓe kam ɓeen?
85Mawnitiiɓe mbasii lugge faa mi saama,
noon ɓe mbonkorii Tawreeta maaɗa.
86Jamirooje maaɗa fuu na kolla a koolniiɗo.
Mi torreteeɗo dow ɓolum, hisinam!
87Mi laatake lokkiɗinɗo, ɓadiiɗo liɓeede,
ammaa mi yoppaay jamirooje maaɗa.
88Wuurnam, saabe hinney maaɗa,
faa mi ɗowtanoo ko hunnduko maaɗa wi'i.
ל Lamed
89Yaa Joomiraaɗo,
konngol maaɗa tabitan dow kammuuli faa abada.
90A koolniiɗo jamaanuuji faa e jamaanuuji.
Aan tagi leydi de tabintini ndi.
91Wo saabe sariyaaji maaɗa de huunde fuu tabiti faa warde hannden,
sabo adunaaru fuu na gollane.
92Si Tawreeta maaɗa laataakino ko weli ɓernde am fu,
hannden tawan mi halkiino saabe torraaji.
93Abada, mi yeggitataa laawi maaɗa,
sabo aɗa wuurnira kam saabe majji.
94Miɗo laatii jeyaaɗo maaɗa, hisinam,
sabo mi filake rewude laawi maaɗa.
95Bonɓe na kaajaa halkude kam,
ammaa miin kaa miɗo hakkilana jamirooje maaɗa.
96Mi yi'ii ko hiɓɓi fuu na woodi happa,
ammaa jamirooje maaɗa walaa timmoode.
מ Mem
97Miɗo horsini Tawreeta maaɗa lobbum.
Miɗo miiloo ɗum wakkati fuu.
98Jamirooje maaɗa na hokka kam hakkillo ɓurngo wayɓe kam.
Miɗo resi ngo ley ɓernde am wakkati fuu.
99Miɗo ɓuri jannginooɓe kam ɓeen fuu paamal,
sabo wo jamirooje maaɗa ɗeen miilotoomi.
100Miɗo jogii anndal ɓurngal nayeeɓe,
sabo miɗo ɗowtanoo sariyaaji maaɗa.
101Mi yoppii laawi bonɓe
faa mi tiigoo konngol maaɗa.
102Mi tottitaaki sariyaaji maaɗa,
sabo wo aan janngini kam.
103Jamirooje maaɗa na mbeli ɓernde am
faa ɓuri njuumndi ley hunnduko am.
104Sariyaaji maaɗa kokkii kam paamal.
Saabe ɗuum de miɗo wanyi laawi fewre fuu.
נ Nun
105Konngol maaɗa na laatii fitilla ɗowoowo kam,
na ngol laatii jayngol dow laawol am.
106Mi hunake, mi ɗowtanto sariyaaji maaɗa ponnditiiɗi,
wooɗi du mi wuurdan e majji.
107Mi torraama sanne, yaa Joomiraaɗo.
Wuurnam saabe konngol maaɗa.
108Yaa Joomiraaɗo, jaɓu sadaka jettooje hunnduko am,
ekintinam sariyaaji maaɗa.
109Miɗo wondi e torra wakkati fuu,
ammaa mi yeggitataa Tawreeta maaɗa.
110Bonɓe na pukkinana kam tuugol,
ammaa mi woɗɗataako jamirooje maaɗa.
111Sariyaaji maaɗa na laatanii kam ndonngu faa abada,
iɗi laatii seyo ɓernde am.
112Mi wattii hakkillo am e ɗowtanaade jamirooje maaɗa
abada abaadin.
ס Samek
113Miɗo wanyi neɗɗo mo ɓerɗe ɗiɗi,
ammaa miɗo yiɗi Tawreeta maaɗa.
114Aan woni suuɗorde am e wawaade am.
Miɗo heɗii konngol maaɗa.
115Mboɗɗee kam, onon bonɓe,
faa mi jogitoo jamirooje Laamɗo!
116Wallam fodde ko mbi'uɗaa, faa mi wuura,
taa accu jikke am laatoo semteende.
117Wallam faa mi hisa
de mi ɗowtanoo jamirooje maaɗa wakkati fuu.
118A riiwii wosiiɓe jamirooje maaɗa fuu,
sabo dabareeji maɓɓe fuu wo jammba tan.
119Aɗa fiɗɗa bonɓe ley duuniyaaru hono mbuuwdi.
Wo saabe ɗuum de miɗo yiɗi sariyaaji maaɗa.
120Ɓanndu am na hulii, na diwna yeeso maaɗa.
Miɗo hula kiite maaɗa.
ע Ayin
121Mi waɗii ko dartii ley fonnditaare.
Taa wattam e juuɗe torrooɓe kam.
122Suuram, miin maccuɗo maaɗa,
taa mawnitiiɓe torra kam.
123Gite am lokkiɗii e heɗaade kisindam maaɗa,
fodde fonnditaare maaɗa.
124Waɗanam ko wooɗi fodde hinney maaɗa, miin maccuɗo maaɗa,
de ekintinaa kam sariyaaji maaɗa.
125Miin, mi maccuɗo maaɗa, hokkaram hakkillo,
faa mi anndira sariyaaji maaɗa.
126Yonii ko Joomiraaɗo hiitoo,
sabo Tawreeta maaɗa oon bonnaama.
127Wo saabe ɗuum de miɗo yiɗi jamirooje maaɗa,
faa ɓuri kaŋŋe ɓurɗo laaɓude.
128Saabe ɗuum de miɗo ndaardi sariyaaji maaɗa fuu wo ponnditiiɗi.
Miɗo wanyi laawi fewre fuu.
פ Pe
129Ko tilsinɗaa waɗee fuu na leeɓi,
miin du, miɗo rewi ɗum.
130Anndude konngol maaɗa na hokka jayngol,
ingol hokka ɓe ngalaa anndal hakkillo.
131Miɗo omti hunnduko am,
miɗo heppi yarude jamirooje maaɗa.
132Waylita ndaaram de ngaɗanaa kam hinney,
fodde no mboowirɗaa waɗande yiɗuɓe innde maaɗa noon.
133Semmbinɗinir koyɗe am e konngol maaɗa,
taa accu bone fay gooto jaaltoo kam.
134Dannam e torraaji ɓiɓɓe-Aadama,
faa mi ɗowtanoo jamirooje maaɗa.
135Waɗu yeeso maaɗa yaynana maccuɗo maaɗa.
Jannginam sariyaaji maaɗa.
136Gonɗi mbubbii e gite am,
sabo Tawreeta maaɗa ɗowtanaaka.
צ Sade
137Wo a ponnditiiɗo, yaa Joomiraaɗo,
sarijaaji maaɗa du wo dartiiɗi.
138A winndirii jamirooje e fonnditaare
e hoolnaare hiɓɓunde.
139Yidde nde ngoodanmaami ndeen huɓɓii e am
sabo haɓdiiɓe am njeggitii konnguli maaɗa.
140Konngol maaɗa wo koolniingol,
wooɗi maccuɗo maaɗa du na horsini ngol.
141Mi laatake pooƴuɗo jawniiɗo,
ammaa e noon fuu mi yeggitaay jamirooje maaɗa.
142Fonnditaare maaɗa wo duumiinde.
Tawreeta maaɗa du, wo goongaajo.
143Ɓillaare e mettorgal nanngii kam,
ammaa jamirooje maaɗa ngoni seyo am.
144Jamirooje maaɗa wo fonnditaare duumiinde.
Hokkaram paamal faa mi heɓa mi wuura.
ק Kof
145Mi noddii ma e ɓernde am fuu, jaabam yaa Joomiraaɗo.
Mi ɗowtanto jamirooje maaɗa.
146Mi noddii ma, hisinam,
faa mi ɗowtanoo jamirooje maaɗa.
147Miɗo ummoo gilla fajiri, miɗo nodde mballaa kam.
Miɗo hoolii konnguli maaɗa.
148Miɗo hejja gilla weetaay,
faa mi dursitoo konngol maaɗa.
149Hettinanam fodde hinney maaɗa.
Yaa Joomiraaɗo, wuurnam katin, fodde anniyaaji maaɗa.
150Ɓe dabareeji bonɗi ɓeen ɓattake kam.
Ɓe mboɗɗake Tawreeta maaɗa.
151Ammaa, aan, aɗa ɓadii kam, yaa Joomiraaɗo.
Wooɗi jamirooje maaɗa fuu wo goongaaje.
152Miɗo anndi gilla ko ɓooyi
ko a hokkii jamirooje maaɗa faa laatoo duumiiɗe.
ר Res
153Ndaaru no njurminoriimi de ndannaa kam,
sabo mi yeggitaay Tawreeta maaɗa.
154Jinnganam de kaɓanaa kam.
Wuurnam saabe konngol maaɗa.
155Kisindam na woɗɗi e bonɓe,
sabo pilaaki rewude sariyaaji maaɗa.
156Yaa Joomiraaɗo, yurmeende maaɗa na mawni.
Wuurnam fodde anniyaaji maaɗa.
157Torrooɓe kam e haɓdiiɓe am na ɗuuɗi,
ammaa mi wosaaki jamirooje maaɗa.
158Miɗo ndaarda jammbuuɓe ɓeen e kafay,
sabo ɓe ɗowtanaaki konngol maaɗa.
159Ndaaru no njiɗirmi sariyaaji maaɗa.
Yaa Joomiraaɗo, wuurnam fodde hinney maaɗa.
160Ɗaɗol konngol maaɗa wo goonga.
Ko fonnditaare maaɗa anniyii fu duumoto.
ש Sin
161Laamiiɓe torrii kam dow ɓolum,
ammaa wosaade konngol maaɗa tan ɓernde am hulata.
162Miɗo weltoroo haala maaɗa
hono keɓuɗo jawdi mawndi ley wolde.
163Miɗo wanyi fewre, miɗo hutii ɗum.
Wo Tawreeta maaɗa njiɗumi.
164Mi manii ma kile jeɗɗi ley nyalaande
saabe sariyaaji maaɗa ponnditiiɗi.
165Jam mawɗo na woodani yiɗuɓe Tawreeta maaɗa,
fay gootum waawaa fergude ɓe.
166Yaa Joomiraaɗo, miɗo heɗii kisindam to maaɗa.
Miɗo ɗowtanoo jamirooje maaɗa.
167Mi tiigake sariyaaji maaɗa,
wooɗi du miɗo yiɗi ɗi sanne.
168Mi tokkii sariyaaji maaɗa e jamirooje maaɗa,
sabo laawi am fuu na ngoni yeeso maaɗa.
ת Taf
169Yaa Joomiraaɗo, accu wullaango am hewtoo faa nokkuure maaɗa.
Hokkaram paamal fodde konngol maaɗa.
170Accu du'aaw am yottoo faa joonde maaɗa.
Dannam fodde konngol maaɗa.
171Accu toni hunnduko am njette,
sabo aɗa ekintina kam sariyaaji maaɗa.
172Accu ɗemngal am yimana konngol maaɗa,
sabo jamirooje maaɗa fuu wo ponnditiiɗi.
173Foortu junngo maaɗa de mballaa kam,
sabo mi suɓake sariyaaji maaɗa.
174Yaa Joomiraaɗo, miɗo heɗii kisindam to maaɗa.
Tawreeta maaɗa na laatii seyo am.
175Accu mi wuura faa mi mane,
de kiite maaɗa ngara mballa kam.
176Miɗo yiiloo hono mbaala lallunga,
waru fila maccuɗo maaɗa,
sabo mi yeggitaay jamirooje maaɗa.
Currently Selected:
Jabuura 119: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
