Esaaya 55
55
Noddaango Joomiraaɗo
1Onon ɗomɗuɓe fuu, ngaree to diyeele!
Fay mo walaa ceede!
Ngaree, coodee de nyaamon!
Ngaree, coodee inaboojam e kosam,
tawa on njoɓay ceede, on njoɓay faa'e!
2Ko saabii de oɗon mbonnina ceede dow ko wanaa nyaamdu?
Ko saabii de oɗon tampana ko haarnataa?
Ndelle, kettinanee kam, faa nyaamon ko wooɗi,
de mbeltoroɗon nyaamduuji belɗi.
3Piɗɗee noppi mooɗon de ngaron to am.
Kettindee faa mbuuron.
Mi haɓɓidan e mooɗon amaana duumotooɗo,
amaana hinney mo podaninoomi Daawda oon.
4Inan mi waɗii o laatanoo kam seedee yeeso lenyi.
Mi waɗii o laatoo laamiiɗo hakkunde lenyi.
5A noddan lenyol ngol a anndaano,
de lenyol ngol a anndaano doggira to maaɗa
saabe Joomiraaɗo, Laamɗo maaɗa, Ceniiɗo Israa'iila,
kokkoowo ma teddeengal oon.
6Tewtee Joomiraaɗo gilla na waawi yiiteede.
Noddee mo gilla imo ɓadii.
7Bonɗo yoppa laawol muuɗum bonngol ngool.
Gaɗoowo ko boni yoppa miilooji muuɗum bonɗi ɗiin,
de yeccoo to Joomiraaɗo jurmotooɗo ɗum.
O yeccoo to Laamɗo meeɗen jiɗɗo yaafaade oon.
8Sabo miilooji am nganaa miilooji mooɗon.
Laawi mooɗon du nganaa laawi am.
Noon Joomiraaɗo wi'i.
9Sabo hono no kammu woɗɗorii e leydi noon,
noon laawi am mboɗɗondiri e laawi mooɗon.
Miilooji am du noon toowtondiri e miilooji mooɗon.
10No ƴoonde e malmalluuje njipportoo dow kammu
de njeccataako tawa coofinay leydi,
punnay de rimni ndi,
kokkay aawooɓe aawdiiri,
e dafaaɗo du nguurey noon,
11wo noon du konngol burtiingol e hunnduko am ngool gollirta.
Ngol yeccataako to am ɓolum,
si wanaa nde ngol yottini muuyɗe am,
nde ngol tabintini ko nelumi ngol yottina ɗuum.
12Goonga, on mburtodoto e seyo,
de ɗowireɗon e jam.
Baamle e tile fuu pekkitoto jaleeɗe yeeso mooɗon.
Leɗɗe gese fuu kellondiran juuɗe.
13Leɗɗe sipire puɗan lunnde tuppe.
Leɗɗe miiri du, loomta lunnde nyakkaɓe.
Ɗum laatanto Joomiraaɗo innde,
maande duumotoonde,
tabitoore faa abada.
Currently Selected:
Esaaya 55: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
