Esaaya 54
54
Urusaliima hisinte
1Aan debbo dimaro mo rimayno abada,
Ilinora e seyo!
Aan mo anndaano naawalla ŋatawere,
herkita jaleeɗe!
Sabo ɓiɓɓe debbo joppanooɗo ɓuran ɓiɓɓe ɓaŋaaɗo ɗuuɗde.
Noon Joomiraaɗo wi'i.
2Yaajin hukum maaɗa,
weɗɗitin gude maaɗa,
taa taggu ɗe!
Foortu ɓoggi maaɗa,
cemmbinɗinaa tonteeje maaɗa!
3Sabo a layiran nano e nyaamo fuu.
Ƴuwdi maa teetan leyɗe lenyi
de jooɗoo ley galluuje laatinooɗe bille.
4Taa hulu, sabo a semtataa.
Taa wemmba, sabo a hersataa.
A yeggitan semteende surbaaku maaɗa.
A miccitataako semteende maayreede gora ndeen katin.
5Sabo taguɗo ma oon woni gora,
innde makko wo Joomiraaɗo Jom Kammu e Leydi.
Dimɗinoowo ma oon wo Ceniiɗo Israa'iila.
Imo inndiree Laamɗo adunaaru fuu.
6Sabo Joomiraaɗo na noddite
hono debbo ceeranooɗo mo ɓernde mettunde.
Yalla giɗo gilla njokollaaku na waawi yoppeede naa?
Noon Laamɗo maaɗa wi'i.
7Mi yoppiino ma wakkati seeɗa,
ammaa e yurmeende mawnde njaɓɓortoomi ma.
8Ley tikkere mawnde, mi tottitakeno ma wakkati seeɗa.
Ammaa saabe hinney am de mi ndaardete yurmeende nde timmataa faa abada.
Noon Joomiraaɗo dimɗinoowo ma oon wi'i.
9Ɗum laatanto kam hono wakkati jamaanu Nuuhu,
nde kuninoomi ko ilam tuufaanu hurrataa adunaaru katin ndeen.
Hono noon kunoriimi mi ɓernantaa ma katin.
Mi felɓataa ma katin.
10Fay si baamle ndilli,
de tile du cottiti,
hinney am heddodoto e maaɗa.
Amaana am gaddoowo jam oon du dimmbataako.
Noon Joomiraaɗo jurmotooɗo ma oon wi'i.
Haala Urusaliima ley ko waroyta
11Aan jurminiiɗo, mo kenkenam tappi,
aan mo walaa fuu baaltinoowo ɓernde muuɗum,
inan, mi nyiɓtorte e kaaƴe ŋarɗuɗe jalbooje,
de mi waɗira joƴƴinirɗe maaɗa e kaaƴe dime bulabulaaje.
12Mi waɗiran bimmbeeje maaɗa e kaaƴe dime boɗeeje,
dammbuɗe maaɗa du e kaaƴe korsuɗe.
Mi hebbiniran kokuuji maaɗa e kaaƴe dime.
13Ɓiɓɓe maaɗa fuu laatoto taalibaaɓe Joomiraaɗo.
Ɓe njooɗoto e jam kiɓɓuɗo.
14Fonnditaare semmbinɗinte.
Torra woɗɗoto e maaɗa.
A maatataa kulol,
wooɗi ko hulɓinta fuu ɓattataako ma katin.
15Si goɗɗo haɓdii e maaɗa fu, ɗum ƴuuray to am.
Kaajaaɗo haɓdude e maaɗa fuu, saaman yeeso maaɗa.
16Miin tagi bahillo puufoowo ƴulɓe kuɓɓooje
faa waɗira kaɓitirgal no haajoraa.
Wo miin du tagi kalkoowo faa halka ngal.
17Kaɓitirgal fuu gaɗaangal faa haɓdiree e maaɗa, heɓataa wune.
Ɗemngal fuu ummaniingal hiitaade ma, a jaaloto ɗum.
Wo ɗuum woni ndonngu maccuɓe Joomiraaɗo.
Ɗuum woni ngeɗu ƴuuranoowu ɓe to am.
Noon Joomiraaɗo wi'i.
Currently Selected:
Esaaya 54: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
