Popular Bible Verses from Esaaya 54

Share

Kaɓitirgal fuu gaɗaangal faa haɓdiree e maaɗa, heɓataa wune. Ɗemngal fuu ummaniingal hiitaade ma, a jaaloto ɗum. Wo ɗuum woni ndonngu maccuɓe Joomiraaɗo. Ɗuum woni ngeɗu ƴuuranoowu ɓe to am. Noon Joomiraaɗo wi'i.

Fay si baamle ndilli, de tile du cottiti, hinney am heddodoto e maaɗa. Amaana am gaddoowo jam oon du dimmbataako. Noon Joomiraaɗo jurmotooɗo ma oon wi'i.

Taa hulu, sabo a semtataa. Taa wemmba, sabo a hersataa. A yeggitan semteende surbaaku maaɗa. A miccitataako semteende maayreede gora ndeen katin.

Sabo taguɗo ma oon woni gora, innde makko wo Joomiraaɗo Jom Kammu e Leydi. Dimɗinoowo ma oon wo Ceniiɗo Israa'iila. Imo inndiree Laamɗo adunaaru fuu.

Yaajin hukum maaɗa, weɗɗitin gude maaɗa, taa taggu ɗe! Foortu ɓoggi maaɗa, cemmbinɗinaa tonteeje maaɗa!

Ɓiɓɓe maaɗa fuu laatoto taalibaaɓe Joomiraaɗo. Ɓe njooɗoto e jam kiɓɓuɗo.

Ley tikkere mawnde, mi tottitakeno ma wakkati seeɗa. Ammaa saabe hinney am de mi ndaardete yurmeende nde timmataa faa abada. Noon Joomiraaɗo dimɗinoowo ma oon wi'i.

Mi yoppiino ma wakkati seeɗa, ammaa e yurmeende mawnde njaɓɓortoomi ma.

Ɗum laatanto kam hono wakkati jamaanu Nuuhu, nde kuninoomi ko ilam tuufaanu hurrataa adunaaru katin ndeen. Hono noon kunoriimi mi ɓernantaa ma katin. Mi felɓataa ma katin.

Mi waɗiran bimmbeeje maaɗa e kaaƴe dime boɗeeje, dammbuɗe maaɗa du e kaaƴe korsuɗe. Mi hebbiniran kokuuji maaɗa e kaaƴe dime.