Esaaya 34
34
No Joomiraaɗo jukkortoo yimɓe Edom
1Ɓattee, onon lenyi faa nanon.
Piɗɗee noppi mooɗon, onon yimɓe leyɗe!
Leydi e ko woni e muuɗum fuu hettinoo.
Duuniyaaru e ko tawaa e muuɗum fuu nana.
2Sabo tikkere Joomiraaɗo saaman dow lenyi ɗiin fuu.
Mone makko jippoto dow konunkooɓe muɓɓen fuu.
O halkan ɓe, o watta ɓe e juuɗe ittooɓe yonkiiji.
3Waraaɓe ɓeen paɗɗete e leydi,
ɓalli muɓɓen luuɓan,
ƴiiƴam muɓɓen wubban dow baamle.
4Annooraaji kammu ɗiin fuu caaman de nyola.
Kammu taggaama hono daago.
Koode muuɗum fuu caamii
hono no haako inaboohi maa ƴibbi yo'orko saamirta noon.
5Sabo Joomiraaɗo wi'i:
Kaafaahi am ɗomɗitii dow kammu.
Inan ki jippoto dow leydi Edom,
dow lenyol ngol kuniimi mi halkan ngool.
6Kaafaahi Joomiraaɗo na suloroo ƴiiƴam,
iki haari ɓelle e ƴiiƴam jawɗi e damɗi pamari e ɓelle ɓooƴe jawɗi
sabo Joomiraaɗo waɗanaama sadaka kirsamaari ley wuro Bosora,
yimɓe ɗuuɗɓe kalkaama ley leydi Edom.
7Ga'i ladde e kalahali e pucci caamidan nde wootere.
Leydi maɓɓe sulorto ƴiiƴam.
Leydi maɓɓe soofan nebam ɓelle.
8Sabo wo nde nyalaande yomnitagol Joomiraaɗo.
Wo nde hitaande yoɓtanagol galluure Siyona
9Ndiyam gooruuji Edom laatoto taari takkoori.
Sollaare muuɗum laatoto sitti.
Leydi makko laatoo hono taari kuɓɓaandi,
10ndi yiite muuɗum nyifataa jemma e nyalooma fuu,
ndi cuurki muuɗum ummotoo faa abada.
Ɗum laatoto winnde faa waɗa jamaanuuji.
Fay gooto faltataako toon faa abada abaadin.
11Nde laatoto nokkuure ciilal e huunyaare.
Ngooƴaare e daawuwal ngonan toon.
Joomiraaɗo fonndiran nokkuure ndeen e ɓoggol faa halka nde.
12Mawɓe laamu kokkataa goɗɗo kufune laamu katin.
Hooreeɓe maɓɓe ɓeen fuu tawataake.
13Tuppe mawnan ley cuuɗi laamorɗi,
nyakaɓe e gi'e puɗan ley kokuuji maɓɓe deenirɗi.
Nde laatoto nokkuure ɓoosaaji ladde e waancorde ndawuuji.
14Muusuuji ladde kawran e leeɗi.
Damɗi be'i noddondiran toon.
Ginnaaru jemma du hoɗan toon.
15Wo toon mboddi waɗata suudu muuɗum,
toon ndi lobotoo, ndi unndoo,
ndi tonnya de ndi reena ɓikkoy mayri.
Ɗoon du jigaaje kawritinta,
ngel hem fuu e banndum.
16Pilee ley dewtere Joomiraaɗo de njanngon.
Ndaaba fay ngoota nyakataa,
fay gootel hunngataako jaado muuɗum.
Sabo wo hunnduko Joomiraaɗo yamiri ɗum.
Wo foofaango makko du hawrondinta ɗi.
17Wo kanko waɗi cumnal dow majji.
Wo junngo makko fecciri leydi ndiin e ɓoggi ponndirɗi.
Kulle ɗeen njeytan ndi faa abada,
ndi laatoto nokkuure majji ley jamaanuuji fuu.
Currently Selected:
Esaaya 34: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
