Esaaya 33
33
No kalkoowo halkirtee
1Bone woodanii ma, aan kalkoowo de halkaaka,
aan jammbotooɗo de jammbaaka.
Nde timminoyɗaa halkude ndeen, a halkete.
Nde timminoyɗaa jammbaade ndeen, a jammbete.
2Yaa Joomiraaɗo, yurma min,
sabo miɗen njowi jikke amin dow maaɗa!
Laatanoɗaa min semmbe subaka fuu
de kisinaa min wakkati torra.
3Nde lenyi nani iido daande maaɗa ndeen fu, ndoggan.
Nde ummiɗaa fu, lenyi ɗiin cankitoto.
4Yimɓe na ɓoɓta jawdi mooɗon hono no baɓɓatti ɓoɓtirtee noon.
Ɓe kumoto dow majjum hono no baɓɓatti kumortoo ngesa noon.
5Joomiraaɗo wo toowɗo,
sabo imo jooɗii faa dow kammuuli.
Imo hebbina Siyona dartaare e fonnditaare.
6O hokkan on joonde e jam.
Hakkillo e anndal wo jawdi kisinoori.
Kulol Joomiraaɗo laatanoo on jawdi korsundi.
Joomiraaɗo ummoto
7Inan sordaasiiɓe semmbiɗinɓe na mbulla yaasin,
nelaaɓe ngadda jam ɓeen na mboya bojji cattuɗi.
8Laawi laatake bille,
walaa fuu faltotooɓe dow majji katin.
Amaana bonnaama,
galluuje kuyfinaama,
fay gooto yaagataake.
9Leydi ndiin na wondi e mettorgal, na ɗayla,
Liban semtii, waatii,
Saron laatake ladde yoornde,
Basan e Karmel fuu na ola.
10Joomiraaɗo wi'i:
Joonin mi ummoto,
joonin mi ummoto mi daroo,
joonin innde am toownete.
11Oɗon ndima huɗo,
oɗon ɓeyna nyaande.
Foofaango mooɗon laatoto hono yiite nyaamoowe on.
12Yiite nyaaman lenyi keddiiɗi ɗiin faa laatoo ndoondi.
Ɓe nga'an hono gi'e coppaaɗe de mbulaa e yiite.
13Onon woɗɗuɓe, kettinee ko ngaɗumi!
Onon ɓadiiɓe, kiinyee baawɗe am!
14Waɗooɓe hakke na ngondi e kulol ley Siyona.
Diwngol nanngii yedduɓe Laamɗo ɓeen.
Iɓe mbi'ondira:
Moy e meeɗen waawi jooɗaade ley yiite nyaamoowe ngee?
Moy e meeɗen waawi jooɗaade dow ƴulɓe ɗe nyifataa ɗee?
15Buurduɗo e laaɓal de na haala ndartiika,
na saloo nyaamude jammba,
na yiila juuɗe taa jaɓa ko haanaa,
na ommba noppi muuɗum taa nana haalaaji war-hooreeji,
na mumna gite muuɗum taa yi'a ko boni,
16neɗɗo oon jooɗoto dow nokkuure toownde,
tefaaje cemmbiɗinɗe laatoto suuɗorde muuɗum.
O hokkete nyaamdu,
ndiyam du nyakataa mo.
No Urusaliima hisinirtee
17Gite mooɗon nji'an kaananke e woodde muuɗum.
Ɗe nji'an muuynaare leydi ndiin e njaajeefi muuɗum fuu.
18A miccitoto ko kulannoɗaa de mbi'a:
Toy binndannooɗo oon woni?
Toy jaɓannooɗo ceede lampo oon woni?
Toy ndaaranannooɗo cuuɗi deenirɗi oon woni?
19A yi'ataa yimɓe mawtiniiɓe ɓeen katin,
yimɓe ɓe haala muɓɓen tiiɗi nanude,
ɓe ɗemle melmeltooje ɗe yimɓe nanataa haala muɓɓen ɓeen.
20Ndaaru Siyona, galluure to ngaɗannoɗen iidiiji meeɗen ndeen!
Gite maaɗa nji'an Urusaliima, nokkuure jooɗiinde e jam,
to hukum mo huuncataake,
mo tonteeje muuɗum ɗoofataake,
mo ɓoggi muuɗum kaɓɓitataake katin.
21Wo ɗoon Joomiraaɗo hollitata en teddeengal muuɗum.
Ɗoon laatoto nokkuure nde gooruuji jaajuɗi e jaaye mawɗe,
ammaa laanaaji ndiyam keɓataa naatude ɗi,
laanaaji ndiyam mawɗi keɓataa feƴƴitinde ɗi.
22Sabo Joomiraaɗo woni carantooɗo en,
Joomiraaɗo woni dawranoowo en,
Joomiraaɗo woni kaananke meeɗen,
wo kanko woni dannoowo en.
23Aan Siyona, galluure laatiinde hono laana ndiyam,
ɓoggi maaɗa kaɓɓitaama.
Ɗi tiigaaki tiigorgal lefol maaɗa.
Lefol waawaa haɓɓeede e majjum katin.
Ammaa fay e noon yimɓe maaɗa njeɗondiran jawdi ɗuuɗundi teetaandi ley konu.
Fay bonnguuɓe keɓan ngeɗu muɓɓen.
24Jooɗiiɗo Urusaliima fay gooto wi'ataa:
Mi walaa cellal!
Yimɓe galluure ndeen njaafante hakkeeji muɓɓen.
Currently Selected:
Esaaya 33: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
