Esaaya 2
2
Lenyi adunaaru fuu ndoggiran Urusaliima
1Konngol Esaaya, ɓii Amot dow ko yi'i dow Yahuuda e Urusaliima.
2Wakkati warowan nde waamnde Suudu Joomiraaɗo laatotoo ɓurnde baamle fuu toowude.
Nde toowan ɓura tile keddiiɗe fuu.
Lenyi adunaaru fuu ndoggiran to mayre.
3Yimɓe ɗuuɗɓe njahan toon na mbi'a:
Ngaree ƴeenyen dow waamnde Joomiraaɗo,
to Suudu Laamɗo Yaakuuba woni toon.
O jannginan en laabi makko,
faa ndewen jamirooje makko.
Sabo ekintinol ƴuuran e Siyona,
de konngol Joomiraaɗo wurtoo e Urusaliima.
4O laatoto carotooɗo hakkunde lenyi.
O waddan nantiral hakkunde yimɓe ɗuuɗɓe.
Ɓe kooƴowan kaafaaje maɓɓe ɓe ngaɗa jale,
de ɓe tafa labbe maɓɓe ɓe ngaɗa bawli.
Lenyol fuu haɓdataa e lenyol gonngol katin.
Waɗude konu ekitataake katin.
5Onon yimɓe Yaakuuba,
ngaree faa mbuuren ley jayngol Joomiraaɗo.
Haala nyalaande Joomiraaɗo, nyannde kiite
6Si goonga Joomiraaɗo, a yoppii lenyol maaɗa, suudu Yaakuuba!
Sabo iɓe keewi ngakkiiji yimɓe lettugal.
Iɓe ngollida e ginnaaji hono Filistiyankooɓe.
Iɓe kawta e yananɓe.
7Leydi makko na heewi kaŋŋe e cardi.
Jawdi makko waawaa hiiseede.
Leydi makko na woodi pucci ɗuuɗɗi.
Torkooji makko ngalaa happa.
8Leydi makko na heewi tooruuji.
Toon yimɓe na kofoo yeeso ko juuɗe muɓɓen tagi,
yeeso ko kolli muɓɓen tami.
9Ɓii-Aadama turete,
tagaaɗo leeƴinte.
Taa yaafa hakkeeji maɓɓe.
10Naatee ley lohooji kaaƴe!
Cuuɗee ley sollaare,
to woɗɗidi e tikkere Joomiraaɗo,
to toowtidi e jayngol teddeengal makko.
11Mawnitaare ɓii-Aadama leeƴinte.
Ɓettaare tagaaɗo jippinte.
Joomiraaɗo tan teddintee nyannde ndeen.
12Sabo wo nde nyalaande nde Joomiraaɗo Jom Kammu e Leydi
ummantoo mawnitiiɓe e ɓettiiɓe
de tura ɓe manngu becce fuu.
13O ummanto leɗɗe seddere leydi Liban toowɗe sanne ɗeen fuu,
e leɗɗe Basan mawɗe ɗeen du.
14O ummanto baamle toowɗe
e tile toowɗe ɗeen fuu.
15O ummanto cuuɗi toowɗi deenirɗi
e kokuuji cemmbinaaɗi ɗiin fuu.
16O ummanto laanaaji ndiyam ɗi leydi Tarsis,
e batooji tiiɗɗi coggu ɗiin fuu.
17Mawnitaare yimɓe leeƴinte.
Ɓettaare muɓɓen jippinte.
Joomiraaɗo tan teddintee nyannde ndeen.
18Tooruuji fuu lallan nde wootere.
19Yimɓe naatan ley lohooji kaaƴe
e ley reedu leydi faa cuuɗoo tikkere Joomiraaɗo,
e jayngol darja muuɗum,
wakkati ummowii faa saroo duuniyaaru ndeen.
20Nyannde ndeen, ɓiɓɓe Aadama kooƴan tooruuji muɓɓen ɗiin paɗɗana doomi e bilwilɗi.
Ɗum woni tooruuji gaɗiraaɗi cardi e gaɗiraaɗi kaŋŋe,
ɗi ɓe ciiwunoo faa ɓe cujida yeeso muɓɓen ɗiin.
21Ɓe naatowan ley lohooji kaaƴe,
e nder pecci tunte mawɗe,
faa ɓe cuuɗoo tikkere Joomiraaɗo
e jayngol darja muuɗum
wakkati ummowii faa dimmba duuniyaaru ndeen.
22Ndelle accee ɓii-Aadama,
sabo yonki muuɗum na laatii foofaango wooto tan.
Ɗume o foti?
Currently Selected:
Esaaya 2: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
