Esaaya 1
1
1Holleede Esaaya, ɓii Amot ko yi'i dow Yahuuda e Urusaliima wakkati jamaanu Ujjiya e Yotam e Akas e Esekiya, kaanankooɓe Yahuuda.
No Israa'iila muurtirani Joomiraaɗo
2Kammuuli, kettinee!
Leydi, fiɗɗu noppi maaɗa!
Wo Joomiraaɗo haalata!
Mi bammbii sukaaɓe mi mawninii ɗum'en,
ammaa ɓeen kaa muurtanii kam.
3Ngaari na anndi joomum,
araawa na anndi akalawal to joomiiga nyaamnata nga,
ammaa Israa'iila kaa, anndaa fay gootum,
yimɓe am ɓeen ngalaa paamal.
Ko moƴƴi fuu walaa ley Yahuuda katin
4Bone woodanii on, onon lenyol hakkewol,
yimɓe heewɓe junuubaaji,
jamaare waɗooɓe ko boni,
ɓe ɓiɓɓe muɓɓen laatii majjuɓe!
Ɓe njoppii ɗowtanaade Joomiraaɗo,
ɓe mbonkake Ceniiɗo Israa'iila oon,
ɓe mbosake laawol.
5Yalla toy piyeteɗon katin,
onon ɓeydooɓe muurtere?
Hoore na heewi ɓuuye mawɗe,
ɓernde na heewi mettorgal.
6Gilla dow hoore faa yottii njaaɓirdi koyɗe
nokku fuu walaa ɗo honndu duɗɗa,
fuu wo nawnallaaji, ɓuuye mawɗe,
e ceeki ɓanndu ɗi cawraaka,
lootaaka, piilaaka, ɗabbiraaka e nebam.
7Leydi mooɗon laatake winnde,
galluuje mooɗon mbulaama,
yananɓe nyaamii barke gese mooɗon yeeso mon.
Leydi mon ndiin laatake hono ko wayɓe mburgini faa laatii winnde.
8 Siyona surbaajo#1:8 Siyona surbaajo na fiirta yimɓe Urusaliima. oon heddake kam tan,
hono cuurel huɗo ley ngesa inabooje,
hono tenndeyel gomma hakkunde ngesa yogooji,
hono galluure nde wayɓe piilii.
9Si Joomiraaɗo Jom Kammu e Leydi
heddayno seeɗa e meeɗen fu,
en laatotono hono Sodoma,
en nanndanno e Gomora.
10Kettinee konngol Joomiraaɗo, onon mawɓe Sodoma.
Kakkilanee ekintinooje Laamɗo meeɗen, onon yimɓe Gomora!
11Joomiraaɗo ƴamii wi'i:
Ɗume ngaɗammi sadakaaji mooɗon ɗuuɗɗi ɗiin?
Mi haarii sadakaaji jawɗi bulaaɗi e ɓelle ga'i payɗi.
Mi haajaaka ƴiiƴam ga'i e jawɗi e damɗi fuu katin.
12Nde ngaroton faa kollitoɗon yeeso am ndeen,
moy ɗaɓɓi on njaaɓon ley galle am?
13Accitee waddande kam sadakaaji ɓoli!
Uurngol majji na laatanii kam ko nyiddinii!
Iidiiji mon darorɗe lewru e nyalaaɗe powteteeɗe
e kawrite mon mawɗe hakkeeje ɗeen fuu na laatanii kam ko metti yi'ude.
14Miɗo wanyi iidiiji mooɗon darorɗe lewru e kawrite mooɗon mawɗe ɗeen fuu.
Iɗum laatanii kam teddorgal,
mi somi ronndaade ɗum!
15Nde ɓantuɗon juuɗe faa ngaɗon du'aaw fu,
miɗo sudda gite am.
Fay si ɗuuɗnuɗon haalaaji ley du'aaw, mi hettintaako.
Juuɗe mooɗon na keewi ƴiiƴam.
16Lootee, laaɓinee ko'e mooɗon.
Pottinee ngakkiiji mon bonɗi ɗiin fuu yeeso am.
Celee waɗude ko boni.
17Ekitee waɗude ko wooɗi,
pilee fonnditaare,
cuuree torreteeɗo,
ngaɗanee atiime sariya dartiiɗo,
njinnganee debbo maayraaɗo gorum.
18Joomiraaɗo wi'i ngaree faa kaalden.
Fay si hakkeeji mooɗon na mbojjiri hono arahari,
ɗi ndawnan far hono haabu.
Si ɗi mbojjii hono ɓikkoy ƴoonde du,
ɗi ndawnan hono leeɓi baali.
19Si on njaɓii hettinaade fu,
on nyaaman ko ɓuri wooɗude ley leydi ndii.
20Si on calake, on njoornii ko'e mooɗon du,
wo kaafaahi nyaamata on.
Noon Joomiraaɗo wi'i.
21Noy galluure hoolninoonde ndeen laatorii jeenoore?
Kayre laatinoonde galluure fonnditiinde,
to dartaare njooɗinoo.
Nde laatake nokkuure waɗooɓe war-hoore!
22Buuɗi maaɗa laatake tuundi cardi.
Inaboojam maaɗa saɓɓitake hono ndiyam.
23Kaanankooɓe maaɗa laatake muurtuɓe,
suurooɓe wuyɓe.
Ɓe fuu ɓe yiɗuɓe jaɓude njeenaari faa cuuɗa goonga.
Iɓe ndoggana njoɓdi ko ɓe ngaɗi.
Ɓe carantaako atiime goonga.
Ɓe njinngantaa debbo maayraaɗo gorum.
24Saabe ɗuum de inan ko Joomiraaɗo, Laamɗo Jom kammu e Leydi,
Jom semmbe mo Israa'iila oon wi'i:
Kaari! Mi waɗan haɓdiiɓe am ko kaajaami.
Mi yoɓtoto wayɓe kam ɓeen.
25Mi foortan junngo dow maaɗa, aan Urusaliima.
Mi laaɓiniran cardi maaɗa e kaata.
Mi ittan tuundi maaɗa fuu.
26Mi hokkete sarotooɓe heyɓe hono ɓe arande.
Mi waddante tinndinooɓe hono ɓe ngoodunoɗaa gilla puɗɗam.
Caggal ɗuum a noddirte Galluure fonnditaare, Wuro hoolniingo.
27Siyona dannirte sariya dartiiɗo.
Si wonɓe ley mayre tuubii fu, laaɓinirte sariya dartiiɗo.
28Ammaa muurtuɓe e waɗooɓe hakkeeji fuu kalkete.
Yoppuɓe Joomiraaɗo ɓeen fuu lallan.
29Ndeen leɗɗe mawɗe ɗe cakkanton ɗeen laatanto on semteende.
On cemtiran sardiŋeeji mon ɗi cuɓinoɗon ɗiin.
30On nanndan e lekki mawki ki haako muuɗum olata.
On nga'an hono sardiŋe kokkinɗo.
31Gorko jom semmbe laatoto hono kuɗel gomma.
Golle makko nga'an hono fettere yiite.
Kanko e golle makko fuu ɓe mbulan,
de tawa fay gooto walaa nyifoowo yiite ngeen.
Currently Selected:
Esaaya 1: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
