Esaaya 16
16
No yimɓe Mo'ab ŋaarorii ballal Urusaliima
1Neldee kaananke leydi ndiin njawdiri mbaggiri.
Ƴuuron Sela, tokkon ladde yoornde faa
njottoɗon waamnde Siyona.
2Rewɓe Mo'ab cankitoto dow daande gooruwol Arnon
hono pooli diiwaaɗi e cuuɗi muɓɓen.
3Ɓe ŋaarii Urusaliima ɓe mbi'i:
Tinndin min, adu anniya,
feertu ɗoogi maaɗa hakkunde naange hono ley jemma.
Suuɗu dogguɓe leydi muɓɓen.
Taa suurtu waruɓe cuuɗii to maaɗa!
4Accu dogguɓe leydi Mo'ab njooɗoo to maaɗa.
Laatanoɗaa ɓe suuɗorde saabe kalkoowo!
Sikke walaa, kalkoowo min oon lallan.
Halkere ndeen timman.
Torroowo oon dillan e leydi amin.
5Ndeen jooɗorgal laamu Daawda semmbiɗan saabe fonnditaare.
Gorko ponnditiiɗo jooɗoto ley suudu muuɗum,
carotooɗo carortooɗo goonga e laaɓal.
Haala bullaali dow Mo'ab
6Min nanii haala mawnitaare Mo'abinkooɓe mawnde ndeen,
ɓettaare wittitiinde e manngu becce maɓɓe
e mantallaaji maɓɓe ɓoli ɗiin.
7Saabe ɗuum de Mo'abinkooɓe na mbullana ko'e muɓɓen.
Ɓe fuu ɓe kawritii iɓe mbulla.
Iɓe uuma saabe hungaade tame inabooje joornaaɗe ɗe Kir-Hareset.
8Sabo gese Hesbon kalkii.
Hooreeɓe lenyi coppii leɗɗe inabooje lobbe ɗe Sibima
peertinooɗe faa hewti Yajer faa uddowii e ladde yoornde.
Licce majje na kewtannoo faa too maayo.
9Saabe ɗuum de miɗo wullida e yimɓe Yajer
dow ko hewtii ngese inabooje Sibima ɗuum.
Miɗo soonira on e gonɗi am, onon Hesbon e Eleyale.
Sabo ilinaali mooɗon wakkati ɓorugol inabooje e tayri gese ɗiin timmii.
10Seyo e mbelɗum ndillii ley gese.
Ilinaali e jaleeɗe nanataake ley gese inabooje katin.
Ɓoosoowo inabooje ɓoosataa ɓoy ley ɓoosirde katin.
Mi nyifii welwelo wakkati tayri.
11Saabe ɗuum de ɓernde am na diwnana Mo'ab hono ɓoggi geegineeru.
Ɓanndu am na diwnana Kir-Hares.
12Mo'abinkooɓe njahan dow cakkirɗe faa ŋaarorowoo e semmbe.
Ɓe naatan cuuɗi dewal maɓɓe,
ɓe ngaɗa du'aaw ammaa ɓe keɓataa faa'e.
13Wo konngol ngol Joomiraaɗo honngi dow Mo'ab gilla ko ɓooyi. 14Ammaa joonin Joomiraaɗo haalii, wi'ii:
Ley duuɓi tati, fodde duuɓi ɗi golloowo joɓeteeɗo gollata, teddeengal Mo'ab saaman, huyfinte. Fay ko ɓe laatii ujunaaje ujunaaje ɗuum fuu, ko hedditotoo e maɓɓe laatoto ko yawnii, ko walaa nafaa.
Currently Selected:
Esaaya 16: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
