Esaaya 17
17
Annabaaku dow Damas
1Annabaaku dow Damas:
Galluure Damas laatataako huɓeere katin,
nde laatoto winnde, joorde keltanɗe.
2Galluuje Aro'er njoppaama,
ɗe laatake durduɗe cogge baali.
Kulle na pukkoo toon, fay gooto wemmbitataa ɗe.
3Galluuje cemmbiɗinɗe lallan ley Efrayim.
Laamu Damas e ko heddii e Aram fuu caaman
hono no teddeengal Israa'iilankooɓe saamiri noon.
Noon Joomiraaɗo Jom Kammu e Leydi oon wi'i.
Ko hedditotoo e laamu Israa'iila
4Nyannde ndeen teddeengal Yaakuuba ɓeeɓan.
Ɓellere teewu makko ndeen du lallan.
5Ɗum laatoto hono no alkama ɓoɓtirtee wakkati tayri,
hono no junngo ba'oo wa'irta butaali,
hono no cammeeje kawrondinirtee
ley naɗɗol Refayinkooɓe noon.
6Ko suɓtintee tan heddotoo
hono ko hedditotoo si lekki jaytun sammaama,
de ɓiɓɓe jaytun ɗiɗi maa tati na keddii faa seɓtoodu,
nay maa joy dow licce dimooje.
Noon Joomiraaɗo, Laamɗo Israa'iila wi'i.
Haala timmoode tooruuji
7Nyannde ndeen ɓii-Aadama yowan jikke muuɗum dow taguɗo ɗum.
Gite muuɗum ndaaran Ceniiɗo Israa'iila oon.
8O yowataa jikke makko dow cakkirɗe ɗe juuɗe makko ngaɗi.
O hoolataako ko kolli makko tami ɗuum katin.
Ɗum woni bimmbeeje Asera e cakkirɗe urdiiji.
9Nyannde ndeen galluuje maaɗa cemmbiɗinɗe ɗeen njoppete
hono no lenyi njoppirnoo cukkuri e ceɓtooli baamle yeeso Israa'iilankooɓe
de fuu laatoo nokkuuje jeewniiɗe.
10Sabo a yeggitii Laamɗo, kisinoowo maaɗa.
A miccitaaki tefaare reenorde maaɗa ndeen.
Saabe ɗuum de aɗa aawa leɗɗe belɗe.
Aɗa tiiroo e leydi leɗɗe janane.
11Nyannde tiiriɗaa ɗe ndeen, aɗa mawnina ɗe.
Gilla subaka oon ɗe puɗɗii finndude.
Ammaa tayri ndiin lallii nyannde nyawu fini,
wooɗi nyawu nguun du, waawaa daɗeede.
No haɓdiiɓe ndiiwiraa ley jemma gooto
12Kaari! Wo ɗum olko lenyi ɗuuɗɗi,
riggaango hono ngo maayooji,
duko yimɓe ɗuuɗɓe hono iido diyeele ƴoorotooɗe,
13kuuɓaali yimɓe nannduɗi e iido maayo manngo.
Ammaa Joomiraaɗo na felɓa ɓe de iɓe nduuya faa ɓe mboɗɗoo
hono nyaande nde henndu baamle ruuyni.
Iɓe mbilgitoo hono huɗohal gomma kal duluuru dillidi.
14Si futuro yottake fu, wo kulol manngol,
fadde e weetude, faa'e heddaaki.
Ɗuum woni ko hewtotoo yanooɓe jawdi meeɗen,
kanjum woni ndonngu honooɓe en ɓeen.
Currently Selected:
Esaaya 17: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
