Esaaya 11
11
Haala laamoriiɗo jam, mo lenyol Daawda
1Hono no wilitere yaltirta dow rubilde noon,
noon suka yaltirta e suudu Yesa.
2Ruuhu Joomiraaɗo wondan e makko.
Ruuhu hakkillo e paamal,
Ruuhu tindinoore e baawɗe,
Ruuhu anndal e kulol Joomiraaɗo.
3O seyorto hulugol Joomiraaɗo.
O sarortaako e jiile yitere,
o hiitortaako fodde ko yimɓe mbi'ata.
4O sarorto talkaaɓe e fonnditaare.
O hiitorto torreteeɓe ley leydi ndiin e laaɓal.
O fiyiran leydi ndiin konngol makko hono sawru.
Henndu hunnduko makko halkan bonɗo.
5Fonnditaare laatoto kaɓɓorgol seega makko
de hoolnaare laatoo kaɓɓorgol makko.
6Suundu wondan e ɓii mbaalu.
Cirgu fukkoto ɗakkol ɓii mbe'a.
Ɓii-nagge e ɓii laddeeru kawtan nyaamrugal,
Ɓiɗɗo gorko pamaro duran ɗi.
7Nagge e ursu kawtan durdude.
Ɓiɓɓe majji pukkodoto ley nokkuure wootere.
Laddeeru e ngaari fuu nyaaman huɗo.
8Ɓinngel entaangel fijiran luuro ngoola.
Suka pamaro wattan junngo muuɗum ley luuro foosikere.
9Ko boni waɗataa, fay gootum halkataa katin
dow waamnde am seniinde ndeen fuu.
Sabo annduɓe Joomiraaɗo keewan e duuniyaaru
hono no diyeele kebbinirta maayo noon.
Maande gartol Israa'iilankooɓe nannganooɓe
10Nyannde ndeen laatiiɗo ɗaɗol Yesa oon daranto yimɓe adunaaru hono maande,
lenyi piloto mo,
teddeengal wonan dow nokkuure makko.
11Nyannde ndeen, Joomiraaɗo foortan junngo muuɗum katin
faa hisina yimɓe muuɗum heddiiɓe ley leydi Asuura e ndi Misira
e Patoros e Kuus e Elam e Sineyar e Hamat
e ley leyɗe boɗɗuɗe gonɗe hakkunde maayooji.
12O darnanan lenyi maande.
O hawrondinan Israa'iilankooɓe riiwanooɓe.
O wartira yimɓe Yahuuda sankitanooɓe tatteeji adunaaru nay ɗiin fuu.
13Kiram Efrayim accitan.
Haɓdiiɓe Yahuuda piɗɗete.
Efrayim hirataa Yahuuda katin,
Yahuuda du haɓdataa e Efrayim katin.
14Ɓe kawritan ɓe kona baamle Filistiyankooɓe gorgaaje.
Ɓe teeta jawdi yimɓe lettugal.
Ɓe njaaloo leyɗe Edom e Mo'ab
de ɓe ndawrana Amoninkooɓe.
15Joomiraaɗo waɗan maayo Maaliya ngoon re'a.
O yiilan junngo makko dow maayo Efrat
de o fuufira ngo e semmbe.
O feccan ngo, ngo laatoo calɗi jeɗɗi,
faa yimɓe njaaɓira ley maggo e paɗe muɓɓen.
16Hedditiiɓe e lenyol makko keɓan laawol,
heddiiɓe leydi Asuura du keɓan hootude
hono no Israa'iilankooɓe keɓirnoo
nyannde wurtagol muɓɓen leydi Misira noon.
Currently Selected:
Esaaya 11: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
