Fuɗɗoode 48

No Yaakuuba barkiniri Efrayim e Manasa

1Balɗe njehi ngarti, Yuusufi wi'aa bammum sellaa. Ndelle o yaadi e ɓiɓɓe makko ɗiɗo, Manasa e Efrayim.

2Yaakuuba haalanaa: «Inan ɓiya Yuusufi warii faa yi'e». Israa'iila tinnitii, ummii, jooɗii dow daɗɗo muuɗum. 3Yaakuuba wi'i Yuusufi:

— Laamɗo Jom Baawɗe ɓanganii kam Luus ley leydi Kanaana. O barkini kam, 4o wi'i kam:

«Mi hokkete ɓeyngu, mi yaajinan suudu maa, mi ɗuuɗinan lenyol maa faa ngol laatoo siyiiji yimɓe heewɓe. Caggal ma, mi hokkan ƴuwdi maa leydi ndii, ɓe njeyta ndi faa abada.» 5Joonin le, Efrayim e Manasa, ɓiɓɓe maa ɗiɗo ɓe keɓuɗaa ley leydi Misira gilla mi waraay to maa ɓeen laatoto ɓe njeymi hono ɓiɓɓe am Ruben e Simeyon noon. 6Ammaa ɓiɓɓe ɓe keɓuɗaa caggal maɓɓe ɓeen, wo aan jeyi. Ɓe ndonan leydi dow innde mawniraaɓe maɓɓe Efrayim e Manasa. 7Miin kaa, nde ƴuurunoomi Padan-Aram ndeen, Rahiina inna ma maayii e juuɗe am dow laawol leydi Kanaana. Ɗum waɗii fadde amin e yottaade Efrata. Mooɓumi mo dow laawol Efrata toon, ɗuum woni Baytilaama.

8Israa'iila yi'i ɓiɓɓe Yuusufi ɓeen de wi'i:

— Ɓee wo ɓeye?

9Yuusufi jaabii bammum, wi'i:

— Ɓe wo ɓiɓɓe am, ɓe Laamɗo hokki kam ɗo.

O jaabii, o wi'i:

— Ɓattin ɓe faa mi barkina ɓe.

10Tawi o naywii faa gite makko cuddii. Nde Yuusufi ɓattinnoo ɓe o ndeen, o mumilii ɓe, o muccii ɓe. 11Caggal ɗuum, Israa'iila wi'i Yuusufi:

— Mi miilaayno yalla mi yi'an yeeso maa katin, de inan Laamɗo waɗii faa mi yi'ii ɓeyngu maa du.

12Yuusufi itti ɓe dow koppi muuɗum, hofii, de hippi yeeso muuɗum e leydi.

13Ndeen Yuusufi nanngi ɓe ɓe ɗiɗo fuu, Efrayim e junngo muuɗum nyaamo, faro nano Israa'iila, Manasa du e junngo muuɗum nano, faro nyaamo Israa'iila. O ɓattini ɓe Israa'iila. 14Israa'iila foorti junngo mum nyaamo, yowi dow hoore Efrayim, fay ko oon laatii minyiiwo ɗuum fuu, nano muuɗum ngoon du dow hoore Manasa. O falondiri juuɗe makko dow ko'e maɓɓe sabo Manasa woni mawniiwo. 15O barkini Yuusufi e ƴuwdi muuɗum, o wi'i:

— Laamɗo mo baabiraaɓe am Ibrahiima e Isiyaaka njokkunoo oon, reenii kam ley nguurndam am fuu. 16Maleyka kisinɗo kam e sii torra fuu, barkina sukaaɓe ɓee. Innde am e innde saaraaɓe am Ibrahiima e Isiyaaka, keddoo saabe maɓɓe. Ɓe ɗuuɗa faa ɓe keewa ley adunaaru. 17Nde Yuusufi yiinoo bammum yowii junngo mum nyaamo dow hoore Efrayim fu, mettaa. O nanngi ngo faa o itta dow hoore Efrayim, o yowa ngo dow hoore Manasa.

18Yuusufi wi'i bammum:

— Wanaa noon baaba, sabo o woni afo. Yowu nyaamo maa dow hoore makko.

19Baabiiko salii, wi'i:

— Miɗo anndi ɗum Yuusufi, miɗo anndi ɗum. Kanko du o laatoto lenyol, o laatoto du tedduɗo. Ammaa minyiiko oon ɓuran mo teddeengal, ƴuwdi muuɗum du laatoto lenyi keewɗi.

20Nyannde ndeen o barkinii ɓe, o wi'i:

— Saabe mooɗon yimɓe Israa'iila ndu'oto, mbi'a:

«Laamɗo waɗe hono Efrayim e Manasa»!

Noon Yaakuuba ardiniri Efrayim dow Manasa.

21Israa'iila wi'i Yuusufi:

— Inan miɗo maaya. Ammaa Laamɗo wondan e mooɗon, o yeccinan on leydi baabiraaɓe mooɗon. 22Katin du mi hokkii ma leydi Sikem, ngeɗu ɓurngu sakiraaɓe maa, wo ndi leydi Amorinkooɓe ndi teetirmi kaafaahi e laanyal am.

Currently Selected:

Fuɗɗoode 48: FBF

Highlight

Copy

Compare