Wurtagol 1
1
No Israa'iilankooɓe laatorii maccuɓe ley leydi Misira
1Inan inɗe ɓiɓɓe Israa'iila naadduɓe e Yaakuuba leydi Misira: 2Ruben e Simeyon e Lewi e Yahuuda 3e Isakar e Jabulon e Benyamin 4e Dan e Naftali e Gad e Aser. Mono e maɓɓe fuu yaadi e koreeji muuɗum. 5Ƴuwdi Yaakuuba wo yimɓe 70. Tawi Yuusufi kaa ina woni leydi Misira. 6Caggal ɗuum, Yuusufi e sakiraaɓe muuɗum e yimɓe jamaanu muuɗum ɓeen fuu maayi. 7Yimɓe Israa'iila ndimi, ɗuuɗi sanne. Ɓe ɓeydii, ɓe ɗuuɗi sanne, semmbe maɓɓe du ɓeydii. Ɓe keewi e leydi ndiin fuu.
8Wakkati oon kaananke goɗɗo mo anndaano Yuusufi laamii leydi Misira. 9O wi'i yimɓe makko:
— Inan yimɓe Israa'iila wo lenyol ɓurngol lenyol meeɗen ɗuuɗude e semmbe. 10Ndelle, ina haani kakkilen, ngaɗen dabare faa kaɗen ɓe ɓeydaade katin. Sabo si en kaɓdii e wayɓe men fu, iɓe mbaawi heedande ɓeen, ɓe kaɓda e meeɗen de ɓe ndilla leydi meeɗen.
11Ndeen yimɓe Misira cuɓii hooreeɓe golleeji tiiɗɗi faa ngollina Israa'iilankooɓe golleeji naawɗi. Israa'iilankooɓe ngaɗaa nyiɓani Fira'awna kuɓeeje desirɗe nguurey, ɗeen ngoni Pitom e Ramses. 12Ammaa no Misirankooɓe tampiniri ɓe fu, wo noon ɓe ɓeydorii ɗuuɗude, noon du ɓe ɓeydorii sankitaade. Saabe ɗuum de Israa'iilankooɓe mbemmbi Misirankooɓe sanne. 13Ndeen yimɓe Misira ngollini Israa'iilankooɓe golleeji maccungaaku. 14Ɓe mettiniri nguurndam muɓɓen e golleeji tiiɗɗi. Ɓe ndoolɗi Israa'iilankooɓe ngaɗa loope e peraaje e golleeji gese, e sii golle tiiɗɗe fuu.
15Fira'awna kaananke Misira haaldi e rewɓe rimtinooɓe deekiraaɓe Ibraninkooɓe ɓeen. Gooto maɓɓe ina wi'ee Sifira, gooto du Puwa. 16O wi'i ɓe:
— Nde ndimtinɗon rewɓe Ibraninkooɓe fu, ndaaron wooɗa, si wo ɓiɗɗo gorko fu, mbaron ɗum, si wo ɓiɗɗo debbo, accon ɗum wuura. 17Ammaa rimtinooɓe ɓeen wo hulooɓe Laamɗo. Ɓe ngaɗaay ko kaananke Misira oon wi'i ɓe ɗuum. Ɓe acci cukaloy ngoroy kooy mbuuri. 18Ndeen kaananke Misira oon noddi ɓe, ƴami:
— Ko waɗi ngaɗuɗon nii? On accii cukaloy ngoroy kooy na mbuuri?
19Rimtinooɓe ɓeen njaabii Fira'awna, mbi'i:
— Rewɓe Ibraninkooɓe nganaa hono rewɓe Misirankooɓe. Wo ɓe rewɓe semmbiɗinɓe. Ndimu tiiɗaa ɓe sanne. Wo ɓe ndiman gilla dimtinoowo yottaaki.
20Laamɗo barkini rimtinooɓe ɓeen. Yimɓe Israa'iila ɓeydii heewude, ngaɗi semmbe du. 21Saabe ko rewɓe rimtinooɓe ɓeen kuli Laamɗo ɗuum, Laamɗo hokki ɓe ƴuwdi. 22Wooɗi Fira'awna yamiri yimɓe muuɗum fuu, wi'i:
— Ɓii Ibraninkeejo gorko dimaaɗo hakkunde mooɗon fu, paɗɗon ɗum ley maayo Nil, ammaa accon cukaloy ndewoy kooy kaa mbuura.
Currently Selected:
Wurtagol 1: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
