Wurtagol 2

Haala rimeede Muusaa

1Gorko gomma jeyaaɗo e ƴuwdi Lewi ɓaŋi debbo ley lenyol muuɗum. 2Debbo oon reedi, rimi ɓinngel gorel. Nde o yi'unoo no ngel foti ŋarɗude fu, o suuɗi ngel faa waɗi lebbi tati. 3Caggal ɗuum, o ronki suuɗude ngel. Ndeen o hooƴi hanndeere ciidi, o takki ɗum ɗakke e taari. O watti ɓinngel ngeel ley toon. O yehi o joƴƴini hanndeere ndeen ley soɗorko daande maayo Nil. 4Mawniingel debbo ina darii to toowti faa ndaara noy ɗum laatortoo. 5Caggal ɗuum, ɓii Fira'awna debbo wari maayo toon faa lootoo. Horɓe muuɗum ina mbaanconoo ɗakkol daande maayo ngoon. O yi'i hanndeere ndeen ley soɗorko. O neli korɗo makko ada nde wadda. 6Nde o omtunoo nde fu, o tawi cukalel gorel na woya. O yurmii ngel, o wi'i:

— Wo ɓinngel Ibraninkooɓe.

7Ndeen mawniigel debbo wari wi'i mo:

— Yalla mi yaha mi filanowe musinninoowo ngel hakkunde rewɓe Ibraninkooɓe naa?

8Ɓii Fira'awna oon jaabii mo, wi'i:

— Ayyo, Yahu.

O yehi o noddowi inna cukalel ngeel. 9Ndeen ɓii Fira'awna wi'i debbo oon:

— Hooƴu cukalel ngeel tiigoɗaa ngel aɗa musinnina ngel, mi yoɓete.

Debbo oon hooƴi ngel, na ngel musina ɗum. 10Nde ngel mawnunoo fu, o wartiri ngel to ɓii Fira'awna debbo oon, de waɗi ngel ɓiyum. O inndiri ngel Muusaa#2:10 Muusaa, innde nde na fiirta «Ittaaɗo ley».. O wi'i:

— Saabe mi ittii ngel ley ndiyam.

No Muusaa doggiri yehi leydi Madiyan

11Nde Muusaa mawnunoo fu, wurtii nyannde gomma, yehi to yimɓe lenyol muuɗum. O yi'i golleeji tiiɗɗi ɗi ɓe ngollintee. Ndeen o yi'i Misiranke gomma ina fiya banndiiko Ibraninkeejo. 12Muusaa yeeƴii ndaari tatteeji fuu, yi'aay fay gooto. Ndeen tappi Misiranke oon, o wari ɗum. O suuɗi ɗum ley njaareendi. 13Jaangoore majjum, o wurtii katin, o yi'i Ibraninkooɓe ɗiɗo na kaɓda. O ƴami toonyiiɗo oon o wi'i:

— Ko waɗi aɗa fiya bannda?

14Oon jaabii o wi'i:

— Moy waɗi ma ardiiɗo e carotooɗo min? Yalla wo warude kam hono no mbarduɗaa Misiranke oon noon anniyiɗaa naa?

Ndeen Muusaa huli, wi'itii:

— Ndelle, goonga kabaaru oon annditaama!

15Fira'awna e hoorem humpitaa kabaaru oon, de filii warude Muusaa. Ndeen Muusaa doggi Fira'awna, yehi jooɗowii leydi Madiyan. Ley leydi ndiin, o yottii o jooɗii ɗakkol ɓunndu. 16Tawi almaami Madiyan ina woodi sukaaɓe rewɓe njeɗɗo. Ɓeen ngari faa ƴooga kebbina akalaaje, njarna dammuuli baaba muɓɓen. 17Ammaa durooɓe woɓɓe ngari ndiiwi ɗum'en. Ndeen Muusaa ummii walli ɓe, yarnani ɓe dammuuli maɓɓe. 18Nde ɓe njeccinoo to Rewel baabiiɓe fu, ƴami ɓe wi'i:

— Noy waɗi de ngartuɗon law hannden?

19Ɓe njaabii ɓe mbi'i:

— Misiranke gomma danni min e juuɗe durooɓe. Katin du o safi, o yarnani min dammuuli amin.

20O ƴami sukaaɓe makko rewɓe ɓeen o wi'i:

— Toy gorko oon woni? Ko waɗi njoppuɗon o toon? Njehee noddowee o, o wara, o nyaamda e meeɗen.

21Muusaa jaɓi jooɗaade ley ɓaade gorko oon. Oon hokki mo ɓiyum debbo inndirteeɗo Sifoora o ɓaŋi. 22Debbo oon rimani mo ɓiɗɗo gorko. Muusaa inndiri ɗum Gersom (ɗum woni beero), sabo o wi'itake: «Miin wo mi beero ley leydi njananndi».

23Caggal duuɓi keewɗi, kaananke Misira oon maayi. Yimɓe Israa'iila na uuma na mboya ley maccungaaku muɓɓen. Wullitagol maɓɓe saabe maccungaaku nguun njottii faa to Laamɗo. 24Laamɗo nani uumaali maɓɓe, siwtori amaana muuɗum mo waddunoo e Ibrahiima e Isiyaaka e Yaakuuba. 25Laamɗo ndaari Israa'iilankooɓe, faami ko hewtii ɗum'en.

Currently Selected:

Wurtagol 2: FBF

Highlight

Copy

Compare