Rud Nuarin-tas alupas 1.
Nuarin-tas alupas 1.
1 Et apan an pece Moab a Elimelek vai numlaig has, et mas eahki aien. 4 Erau leh ehgarau irai ilpu takata Moab a Meelon im Kilion, ja erau pah mas arau. 6 Et wat adumoij pan an pece o un a Neomai, 8 et acaiji ohwat ehgai ohwat halav atamaig o un aien, va eru jim, ahced yin arau. 14 Et udei yin a Orpa, ja et apol iran a Rud um ahced yin. 19 Erau yetpam Bedlehem arau, eris aiheuc upene vai rau natimi.
1IS eteuc numlaig has an pece an nopan iyehki eris esjilid a ilpu atimi tas alep. Is apan a nup u Bedlehem-juta is ethi par amen an pece Moab, im lep ehgan, im ohwat halav atamaig o un.
2Nidai natimi iyehki Elimelek, im nidai ehgan Neomai, im nidai ohwat halav atamaig o un, nan, Meelon im Kilion, nup Efrata, tak idan Bedlehem-juta. Eris yetpan an pece Moab ara, um amen eahki.
3Is um mas a Elimelek natamnyu Neomai; is echim amen aien im ohwat halav atamaig o un.
4Erus leh ohwat ehgarau arau irai ilpu takata Moab; nidan is ethi Orpa, im nidan is eche Rud: eris amen eahki ara is idivaig inmesese is ten.
5Erus emesmas arau, nan, Meelon im Kilion; is echim amen a intakata iyehki vai natamnyu un im ohwat halav atamaig o un.
6Is atidai aien im ohwat ehgai ohwat halav atamaig o un, mika yi udei inpece Moab aien: is idim atahaijeg aien an pece Moab mika, is aiheuc vai ilpu atimi o un a Ihova um alupai ra nitai caig.
7Is ahes aien an nuarin iyehki is amen iran aien, im lep ohwat ehgai ohwat halav atamaig o un; ehtijis atga ahtaij an nefalaig par lep apan an pece Juta.
8Is tas a Neomai ehele ohwat ehgai ohwat halav atamaig o un, um ika, Arumu adumoij pan iraili eom u ohwat risimirau aijaurau: etmu aiheuc vai caurau a Ihova yi idivaig arus aiheuc vai ohwat atimi emesmas erahki aijaurau, im lep vai nyak.
9Etmu ika a Ihova arupu amen upene aijaurau irai imnim u ohwat atamnyu unyimirau. Is aijumnyi rau aien; erus taig alupas arau.
10Erus ika ehelen arau, Ecrupu idim ahced euc aijumrau, um apan ehele ilpu atimi ehpan iram.
11Is ika a Neomai, Ak ohwat halav atahig unyak, arumu adumoij pan aijaurau: arupu ahced nyak aijaurau vanhe? era idim eti lep eteuc a ilpu halav atamaig unyak an nipjinetgak, mika arupu leh rau aijaurau ohwat atamnyu unyimirau.
12Arumu lep adumoij aijaurau, ak ohwat halav atahig unyak, um atga unyimirau; inyi eti lep eteuc natamnyu unyak, ek efatimi ainyak. El ek ika ainyak, Et emda inliinmopok ainyak, el et lep amen ehelek a natamnyu unyak an nepig inpig, el ek lep apos ilpu halav atamaig unyak ainyak;
13et ehka vai caurau naitgai rau vaig, um yetpan an nopan iyehki erupu alupas arau; et ehka vai caurau naitgai rau vaig, um eti leh natamnyu unyimirau: maiya, ak ohwat halav atahig unyak; et ohocred alupas inliinmopok ainyak vai caurau, et ehtipidaig pam nyak nikmai Ihova.
14Erus lep taig alupas arau: is aijumnyi risi natamnyu un a Orpa, um adumoij pan ehele ilpu atimi ehpan iran; ja is apol iran a Rud.
15Is ika aien, Almoi, et adumoij pan a etwam ehele ilpu atimi ehpan iran, im ilpu atua o un: namu adumoij pan aiek, um apitac etwam.
16Is um ika a Rud, Jim asaig ehelek aiek mika ki udei euc ainyak, um adumoij, um eti apitac euc: ekpu idim apan ainyak an nuarin inig an apan iran aiek; ekpu lep asjeuc ainyak an nuarin inig an asjeuc iran aiek: erupu ilpu atimi ehpan irak a ilpu atimi ehpan iram, etpu Atua unyak a Atua unyum:
17ekpu mas ainyak an nuarin inig an mas iran aiek, uhpu lep atelmoi nyak an nuarin iyehki: etmu aru alupas irak a Ihova, el et atiakoai caijau tah nitai, inmas ache.
18Is wat almoi aien mika is imiisjis emda aien par ahced yin, is eti lep tas ehelen aien.
19Erus ehras atga arau um yetpan Bedlehem. Erus wat yetpan Bedlehem arau, is eliaujai inliinmopoi atimi asega an maliyum naico vai rau, eris ika ara, Neomai mun igki, ka oʼo?
20Is ika ehele ra aien, Jim anvi nidak aijaua par ika Neomai (Nimiacitak), jam anvi nidak par ika, Mera (Nohocred): nikavaig, is atijai irak nohocred alupas Aien et emda acen aien.
21Kis wat apan ainyak, kis atimi ikni itai ainyak; et mun imiadumoij pam nyak a Ihova, ja ek ihkin natimi ainyak: eka a uri aijaua par anvi nidak par ika Neomai? is idim imiasuol nyak a Ihova, is lep atijai nohocred irak Aien et emda acen aien.
22Is idim uco, is adumoij a Neomai, is lep ahced yin a Rud nup u Moab, ehgai inhalav atamaig o un, is udei inpece Moab aien: erus yetpan Bedlehem arau an nopan atupun par eldei barle.
Currently Selected:
Rud Nuarin-tas alupas 1.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)