Rud Nuarin-tas alupas 2.
Nuarin-tas alupas 2.
1 Et asjapicnaig nohwai barle irai umai Boas a Rud. 4 Et wat ato yin a Boas, 8 et aiheuc vai yin aien. 18 Et apos pan aien ehele Neomai nitai inig et leh aien.
1IS eteuc a natimi ehpan irai natamnyu Neomai is ethi, is atimi ikni itai alupas aien, um mapoi Elimelek, nidan Boas.
2Is ika a Rud nup u Moab ehele Neomai, Ekmu apan ainyak umai natimi inig etpu aiheuc vai nyak aien, um asjapicnaig nohwai barle er udei. Is um ika ehelen aien, Apan aiek, ak inhal unyak.
3Is atga o un aien, um apan, um apitac ilpu atimi eldei barle, um asjapicnaig barle inig eris udei: is tup apan aien an nuarin umai Boas, is mapoi Elimelek aien.
4Is ahes Bedlehem a Boas, um apan, um ika ehele ilpu atimi eldei barle, Etmu amen ehelemia a Ihova. Eris ika ehelen ara, Etmu aiheuc vai euc a Ihova.
5Is ika a Boas ehele naheca o un is aminjinaig ilpu atimi eldei barle aien, Intakata takuras u di nigki?
6Is tas a naheca aminjinaig ilpu atimi eldei barle, um ika, Et up u Moab intakata takuras inigki, is udei inpece Moab aien, um ahced Neomai:
7is ika aien, Aiheuc vai nyak aiek, mika ki apitac irai ilpu atimi eldei barle ainyak irai uhud irai barle, um asjapicnaig inig eri udei ara: et mun ham aien an nuhialeg, um amen um yetpam an nopan inig, et mun lep atumop tintin anliin neom uriicai aien.
8Is tas a Boas ehele Rud, um ika, Namu atahaijeg intas unyak aiek, ak inhal unyak, um jim apan an taka uarin um asjapicnaig barle er udei, um jim ahes igcaki, jam amen upene igcaki ehele ilpu atahig unyak:
9namu almoi nuarin umak inig aiek era eldei barle iran ara, um apitac ra: ek mun idim acaiji ilpu takuras ainyak va eri jim ubli euc ara; nau wit lep ahvig wai aiek, apan um umwig irai ipjiitai era mun athun wai iran a ilpu takuras.
10Is eropse an nesganimtan aien um atpuse an nobohtan, um ika ehelen, Et echamecha na mun aiheuc vai nyak aiek um aktaktai nyak? ja ek takata an taka uarin ainyak.
11Is tas a Boas, um ika ehelen, Ek ato upene ainyak nedo asega inig as ago aiek vai risi natamnyu unyum, is wat mas a natamnyu unyum, um imihum pam an nopan inig: as lep udei etmam aiek im risum, im inpece inig eris apos euc iran, um apam ehele nup uran pece inig as eti upyi ato ra aiek.
12Etmu aru nedo unyum a Ihova, etmu lep alupai euc nimtan esjilid a Ihova Atua u nup Isreel, aien aigki nai hami aiek um asgeig iran, mika yi aminjinaig euc aien.
13Is ika aien, Ak natimi alupas unyak, namu aiheuc vai nyak aiek; nikavaig, na mun ago emda inliinmopok aiek, um tas updak ehele naheca atahig unyum, ja ek eti idivaig ilpu aheca atahig unyum ainyak.
14Eris wat hag ara, is ika ehelen a Boas, Namu apam igcaki aiek um caig nitai caig, um atise nuarin nitai caig unyum irai vinecar. Is ateuc ehele ilpu atimi eldei barle aien: is alaan pakinne a Boas eris ahen, is caig aien um geije iran, um eti atahni.
15Is wat atidai aien um apan par asjapicnaig barle eris udei, is tas a Boas ehele ilpu takuras o un, um ika, Etmu asjapicnaig barle er udei aien irai uhud irai barle, um jim atuh yin:
16akumu lep atladwise tah barle irai ikmamia aijaua vai yin, um udei imi yin, mika yi asjapicnaig aien, um jim acaiji yin.
17Is idim uco, is asjapicnaig barle aien eris udei uman um yetpan an jupura, um auud barle inig is asjapicnaig aien: is idivaig ifa is ethi irai barle.
18Is ahelwei aien um apan an maliyum: is ehvaig aien ehele risi natamnyu un barle inig is asjapicnaig aien: is lep ahyausei nitai caig iyehki aien is geije iran aien jam eti atahni, um alupai yin.
19Is tas ehelen a risi natamnyu un, um ika, Na mun asjapicnaig barle er udei eda aiek inpig? na mun auritai aiek eda? naaurinig vai yin et mun aktaktai euc aien. Is aniv ehele risi natamnyu un aien natimi iyehki is auritai ehelen aien, um ika, Nidai natimi inig ek mun auritai ehelen ainyak inpig, nan, Boas.
20Is ika a Neomai ehele ehgai inhalav atamaig o un, Etmu aiheuc vai yin a Ihova va naiheuc o un vai ilpu atimi emesmas im lep ilpu atimi umumoh. Is ika ehelen a Neomai, Et atimi ehpan iraijau a natimi iyehki, et idim ethi irai ilpu atimi ehpan iraijau esjilid aien.
21Is ika a Rud nup u Moab, Et mun lep ika ehelek aien, Namu amen ubutpotet ehele ilpu atimi eldei unyak aiek, um imihum pan an nopan iyehki erupu eldei ehni korn asega unyak ara.
22Is ika a Neomai ehele Rud ehgai inhalav atamaig o un, Ak inhal unyak, et upene vai euc napan vaig ehele ilpu aheca atahig o un, va uhpu jim ecet euc an taka uarin.
23Is idim uco, is apol aien irai ilpu atahig u Boas um asjapicnaig barle im hwiit eris udei, um imihum pan an nopan iyehki eris eldei ehni; is lep amen aien ehele risi natamnyu un.
Currently Selected:
Rud Nuarin-tas alupas 2.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)