Ilpu Atimi Tas Alep Nuarin-tas alupas 21.
Nuarin-tas alupas 21.
1 Era ehtigtaig natimi mika eris auahas ilpu mapoi Benjamin. 8 Era auahas nup u Jebes-cileat ara, um lucsei ilpu atahig is for huntret (400) mika eri ehgai atimi. 16 Era ika ara eri arop irai ilpu atahig iji ig era adekdekjai ara Sailo.
1ERIS asig yi aktit intas a nup Isreel an maliyum Mispi, um ika, Inyi eti alupai inhalav atahig o un tah iraija imi tah irai ilpu mapoi Benjamin ehgan.
2Eris ahtag pam natimi an neom u Atua, um amen eahki um yetpan an jupura an nuhup u Atua, um aunyauwaig, um ehtigtaig alupas;
3um ika, Ak Ihova Atua u nup Isreel, et echamecha va nitai inigki an pece Isreel, mika et atiih nelcau et ethi an pece Isreel an nopan inig?
4Is wat lahlah an tak apnyin, eris atidai natimi an nuhihialeg, um actaig natau eahki, um ahlap irai iji itai ahlap atnamud im niji itai ahlap va nigpa.
5Eris ika a nup Isreel, Natimi iji ig yek eda irai elcau asega u nup Isreel, eris eti ahtag pam ara va nasjapicnaig an nuhup u Ihova? Vaig inig nikavaig, eris asig yi aktit intas alupas ara vai ra sji igki eris eti yetpam Mispi ara an nuhup u Ihova, um ika, Uhmu idim atgei ra.
6Eris adumoij an liinmopora a nup Isreel vai ilpu etwara ilpu mapoi Benjamin, um ika, Eh mun atipagki nup uran nelcau et ethi an pece Isreel an nopan inig.
7Intupu evago akaija vai ilpu ehgai ra sji igki era eled ara, vaig inig nikavaig, inta mun asig yi aktit intas vai Ihova akaija, mika ti jim alupai ra irai ilpu halav atahig uja akaija ehgara?
8Eris ika ara, Natimi iji ig yek eda irai elcau asega u nup Isreel eris eti ahtag pam ara an maliyum Mispi an nuhup u Ihova? ja is eti ham tah irai up uran maliyum Jebes-cileat an nuarin amen u atimi asjapicnaig.
9Eris idim esvi atimi ara, ja is eti eteuc tah eahki irai up uran maliyum Jebes-cileat.
10Eris abraig pan ilpu atimi emda acen is twelv dausant (12,000) a ilpu atimi asjapicnaig, um tas alep ehele ra, um ika, Akumu apan aijaua, um ati nedoa, um atgei nup uran maliyum Jebes-cileat, im lep ilpu takata im ilpu hal ura.
11Akumu ago nedo inigki aijaua, nikavaig, Auahas ehni ilpu atamaig asega, im ilpu takata asega eris amen ara ehele ilpu atamaig; jam aminjinaig ilpu atahig asega.
12Eris ecet ara irai up u Jebes-cileat ilpu atahig is for huntret, eris eti amen ara ehelen tah natamaig: eris imiapan ra an nuarin amen iran u atimi Sailo, inmaliyum inig et eteuc an pece Kenan.
13Eris abraig pan hal atimi a ilpu atimi asjapicnaig asega, mika eri tas ehele ilpu mapoi Benjamin iji ig eris amen an mun nij Rimmon, um imiacaij ra an tas igpa.
14Eris adumoij pan a ilpu mapoi Benjamin an nopan iyehki; eris lep alupai ra ilpu ehgara eris imiaras ra irai up u Jebes-cileat: ja eris eti elpat vai ra ara sji ehki.
15Eris adumoij an liinmopora natimi vai ilpu mapoi Benjamin, vaig inig nikavaig, is auahas nup uran nelcau is ethi an pece Isreel a Ihova.
16Eris ika a ilpu atimi alupas u atimi asjapicnaig, Intupu evago akaija vai ilpu ehgai ilpu atimi era eled ara, vaig inig nikavaig, eh mun auahas ehni ilpu takata an pece Benjamin.
17Eris ika ara, Eris idim ika ti aiheuc vai ilpu mapoi Benjamin iji ig akaija eris eled ara, va eri jim auahas ehni nup uran nelcau et ethi an pece Isreel.
18Ja et itap vai caija par alupai ra ilpu halav atahig uja ehgara: vaig inig nikavaig, era mun asig yi aktit intas a nup Isreel, um ika, Uhmu ahlaijai yin et alupai tah nup u Benjamin ehgan aien.
19Ja eris ika ara, Era idim asjapicnaig natimi an nuhup u Ihova irai iji mesese an maliyum Sailo, an nuarin et ethi an nahaijin Bedel inig et ahes narutu iran, an nahaijin nefalaig et ahes irai Bedel um yetpan Sikem an ridjai o un, im lep an nahaijin Lebona inig et ahes nuritoga iran.
20Va nitai inigki eris tas ara ehele ilpu mapoi Benjamin, um ika, Akumu apan aijaua um atpaijinaig irai okoro vaine;
21um easpan, ja el era apam a ilpu atahig Sailo par adekdekjai jipe, aku wit ecet ra aijaua, fi auroauro aijaua asega, um ahes irai okoro vaine, um arop irai ilpu atahig Sailo ehgamia, athi um athi ehni, um apan an pece Benjamin.
22Ja eru wit apam ehelema a ilpu etmara, ka ilpu atamaig ira ra, par asan tas ehti, ecrupu ika ehele ra aijama, Akumu aiheuc vai ra aijaua vai cama: vaig inig nikavaig, ecris eti imiaras ilpu ehgara an nedoa aijama, athi um athi ehni: akis idim eti alupai ra aijaua an nopan inig, mika aki leh neruvaig.
23Eris ago nedo inigki a ilpu mapoi Benjamin, eris lucsei ilpu ehgara ara asega, athi um athi ehni, eris arop irai ra sji igki ara eris akekdekjai jipe ara: eris lep adumoij pan ara irai umara, um actaig niji maliyum ura, um amen iran.
24Eris ahes eahki a nup Isreel asega an nopan iyehki; um apan irai iji elcau ura, im lep irai iji eteuc ura; eris idim ahes eahki ara asega, um apan irai umara, athi um athi ehni.
25An nopan iyehki is eti eteuc tah natimarid an pece Isreel: eris ago nedo inigki is upene ira ra natimi asega, athi um athi ehni.
Currently Selected:
Ilpu Atimi Tas Alep Nuarin-tas alupas 21.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)