Numera Nuarin-tas alupas 8.
Nuarin-tas alupas 8.
1 Nedo ura par atni lamp. 5 Nati vaig u ilpu mapoi Livai. 23 Niji mesese ira ra im nopan u nauritai ura.
1IS tas a Ihova ehele Moses, um ika,
2Namu tas aiek ehele Eron, um ika ehelen, Nau wit atni lamp aiek, etmu ere lamp et seven an nuarin uhup u nitai atijai incap alahala iran.
3Is ago is uce a Eron; is atni lamp iji ehki aien an nuarin uhup u nitai atijai incap alahala iran, is idivaig is asaig a Ihova ehele Moses.
4Eris ago nitai atijai incap alahala iran irai colt ipjin, is lep colt ipjin inhus o un, im intisian: is ago nitai atijai incap alahala iran aien, is idivaig nitai asjaaicnaig is ehvaig a Ihova ehele Moses.
5Is tas a Ihova ehele Moses, um ika,
6Namu iknipagki ilpu mapoi Livai aiek irai up Isreel, um ago adicinadicin ra.
7Ago adicinadicin ra an nedo inigki: Ohai ra irai wai er upene vaig, erumu lep ucsei nohura asega ara, um yiri apelumai ura, um ago adicinadicin ra.
8Erumu lep leh kurimatau atamaig takuras ara, im nitai ahlap an nitai caig, nikavaig, flaur upene er aplamod an narakei, im lep kurimatau atamaig takuras et eche par itai ahlap va nedo has.
9Ja par imiapan ilpu mapoi Livai an nuhup u neom er asjapicnaig o un: um lep asjapicnaig nup Isreel asega:
10namu imiapan ilpu mapoi Livai aiek an nuhup u Ihova: erumu lep ikni nikmara ijinies irai ilpu mapoi Livai a nup Isreel:
11etmu lep ikni ilpu mapoi Livai a Eron an nuhup u Ihova, nitai ahlap u nup Isreel, mika eri auanaheca u Ihova ara.
12Erumu ikni ikmara a ilpu mapoi Livai ijinies irai kurimatau erahki: uhmu ahlap iran yi ethi nitai ahlap va nedo has, im lep iran yi ethi nitai ahlap atnamud vai Ihova, par adahpoi nedo has u ilpu mapoi Livai.
13Namu ikni ilpu mapoi Livai aiek an nuhup u Eron im lep an nuhup a ilpu hal o un, um ikni ra par itai ahlap vai Ihova.
14Namu iknipagki ilpu mapoi Livai aiek et uce irai up Isreel: erupu unyak a ilpu mapoi Livai.
15Ja erumu apan a ilpu mapoi Livai um auanaheca an neom er asjapicnaig o un: namu ago adicinadicin ra aiek, um ikni ra par itai ahlap.
16Eris idim ikni ra imi nyak irai up Isreel; kis lep lucsei ra ainyak, par isjeupigmoig ra sji igki er uhup um apos ra, inmeto asega marom irai up Isreel.
17Era unyak a inmeto asega irai up Isreel, natimi im niji itai eklim edo irai pece: kis imiitap ra ainyak vai nyak an nadiat iyehki kis auud inmeto asega ainyak an pece Ijipt.
18Kis lep lucsei ilpu mapoi Livai ainyak par isjeupigmoig inmeto asega irai up Isreel.
19Kis tup ahtai ilpu mapoi Livai ainyak imi Eron im ilpu hal o un irai up Isreel, par auanaheca u nup Isreel an neom er asjapicnaig o un, um ahlap va nup Isreel: vai yi jim yetpam inmas irai up Isreel, Eru wit apan an nuarin itap a nup Isreel.
20Eris ago irai ilpu mapoi Livai a Moses im Eron, im nup Isreel asega, is idivaig intas asega u Ihova ehele Moses vai ilpu mapoi Livai, eris idim ago ira ra a nup Isreel.
21Eris ago upene ilpu mapoi Livai, eris lep yiri apelumai ura ara; ja is ikni ra a Eron par itai ahlap an nuhup u Ihova; is lep ahlap vai ra a Eron mika eri upene ara.
22Ja eris par apan a ilpu mapoi Livai par ago nauritai ura an neom er asjapicnaig o un an nuhup u Eron, im lep an nuhup u ilpu hal o un: eris ago irai ilpu mapoi Livai is idivaig intas o Ihova ehele Moses.
23Is tas a Ihova ehele Moses, um ika,
24Intas alep vai ilpu mapoi Livai nigki: erumu apan natimi iji ig et eteuc inmesese et twente faiv ira ra um eled, um aminjinaig nauritai an neom er asjapicnaig o un:
25Erumu lep udei nauritai iran ara etu wit eteuc inmesese et fifte ira ra, um eti lep auritai:
26ja erumu auanaheca ara ehele ilpu etwara an neom er asjapicnaig o un, um aminjinaig itai, jam eti auritai. Inyi uce vai ilpu mapoi Livai im nauanaheca ura.
Currently Selected:
Numera Nuarin-tas alupas 8.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)