Numera Nuarin-tas alupas 9.
Nuarin-tas alupas 9.
1 Et aketo a Atua um tas alep mika eri aminjinaig nasjapicnaig u nahtaregdei atimi. 6 Er ati nahtaregdei atimi sekunt va atimi eris auahas nitap ura im natimi an taka uarin. 15 Et asjaaicnaig irai up Isreel napat mika eri atga im lep mika eri atumop.
1IS tas a Ihova ehele Moses an namasacen Saine, an mohoc uhup an mesese sekunt an nahes ura an pece Ijipt, um ika,
2Erumu aminjinaig nasjapicnaig va nahtaregdei atimi a nup Isreel an nopan eris ati.
3Akumu aminjinaig aijaua an nopan eris ati, an mohoc inigki an nadiat fortiind an jupura: akumu aminjinaig aijaua et idivaig intas alep asega vaig, im nedo asega iran.
4Is tas a Moses ehele nup Isreel, mika eri aminjinaig nasjapicnaig va nahtaregdei atimi ara.
5Eris aminjinaig nasjapicnaig iyehki ara an mohoc uhup an nadiat fortiind an jupura an namasacen Saine: eris ago niji itai asega a nup Isreel, is asaig a Ihova ehele Moses.
6Eris has hal atimi va nohun natimi mas is ethi, is ehka vai ra naminjinaig vaig nahtaregdei atimi an nadiat iyehki: eris apan ara an nuhup u Moses, im lep an nuhup u Eron an nadiat iyehki:
7eris ika ehelen natimi iji ehki, Ecra mun auahas nitap unyima aijama va nohun natimi mas: er a uri par atapnes cama, mika ecri jim ahlap aijama Vai Ihova an nitai ahlap pan irai up Isreel an nopan eris ati?
8Is ika a Moses ehele ra, Eklim erop, ekpu atahaijeg intas o Ihova ainyak vai caua.
9Is tas a Ihova ehele Moses, um ika,
10Namu tas aiek ehele nup Isreel, um ika, El et auahas nitap o un tah caua ka tah ilpu mapomia va nohun natimi mas, ka atga an taka uarin, etmu aminjinaig nahtaregdei atimi va Ihova aien.
11Erumu aminjinaig ara an mohoc sekunt an nadiat fortiind an jupura, um caig pan ira areto et ti leven iran im inceslum acen.
12Erumu jim udei tah nuarin ara um yetpan an nuhialeg um jim asvi tah neduon: erumu aminjinaig nahtaregdei atimi ara et idivaig nedo asega iran.
13Ja natimi inig et upene aien, um eti atga an taka uarin, jam eti aminjinaig nahtaregdei atimi, uhmu atipagki natimi inig ehele ilpu atimi o un: etpu amen nedo has irai natimi inig, va nedo o un, nikavaig, is eti imiapam nitai ahlap vai Ihova aien an nopan eris ati.
14El et amen ehelemia tah natimi an taka pece, um ika yi aminjinaig nahtaregdei atimi vai Ihova; etmu ago aien et idivaig intas alep vai nasjapicnaig iyehki im lep idivaig nedo iran: inyi tup ethi ache intas alep va atimi an taka pece, im lep nup uran pece.
15Is ataluopni neom itap napat an nadiat iyehki eris athai neom itap, nikavaig, neom atga is amen intas alep iran: is wat jupura is amen ijinies an neom itap nitai is idivaig incap um yetpan an nuhialeg.
16Is lep uce irai iji adiat: is ataluopni neom itap napat an nadiat, im nitai is idivaig incap an nepig.
17Eris atipagki napat ijinies an neom itap, ja eris par atga a nup Isreel: eris lep athai eom atga ura a nup Isreel an nuarin is amen napat iran.
18Eris atga a nup Isreel vai intas o Ihova, eris lep atumop ara vai intas o Ihova: eris atumop ara iraili eom atga ura an namen asega u napat ijinies an neom itap.
19Is wat amen napat ijinies an neom itap ira adiat is ahinag, eris imiaiji intas o Ihova a nup Isreel, um eti atga.
20Is wat lep amen napat ijinies an neom itap ira adiat is eti elpat; eris amen iraili eom atga ura ara vai intas o Ihova, eris lep atga ara vai intas o Ihova.
21Is wat lep amen napat an jupura um yetpan an nuhialeg, el eris atipagki napat, an nuhialeg eris atga ara: eris wat atipagki napat an nadiat ka an nepig eris atga ara.
22El is amen aktit napat ijinies an neom itap ira adiat is ero, ka inmohoc is ethi, ka inmesese is ethi, eris amen a nup Isreel iraili eom atga ura ara, um eti atga: ja eris wat atipagki napat eris atga ara.
23Eris amen iraili eom atga ura ara vai intas o Ihova, eris lep atga ara vai intas o Ihova: eris imiaiji intas o Ihova ara, is idivaig is asaig a Ihova irai Moses.
Currently Selected:
Numera Nuarin-tas alupas 9.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)