Josua Nuarin-tas alupas 20.
Nuarin-tas alupas 20.
1 Et tas alep vaig a Atua. 7 era lep ikni a ilpu mapoi Isreel niji maliyum, et siks, mika eri ahapan iran a ilpu atimi atgei atmas jam et i ethetiknaig.
1IS tas a Ihova ehele Josua, um ika,
2Namu tas ehele nup Isreel aiek, um ika, Akumu aniv niji maliyum aijaua, par ahapan iran, kis tas vaig ehelemia ainyak irai Moses:
3va etpu ahapan eahki a natimi inig et atgei atmas aien, jam eti ethetiknaig, um eti aktaktai: uhpu amen upene eahki va natimi eijeijei natmas.
4Etpu aiji an neucse nirahed an maliyum a natimi inig et ahapan aien an tah irai maliyum iji igki, um asuptecnaig nedo o un ehele ilpu atimi alupas an maliyum iyehki, ja erupu leh pam yin an maliyum ara, um alupai yin nuarin amen iran, va etpu amen ehele ra aien.
5El et apitac yin a natimi eijeijei natmas, eri eti atcijaig natimi atgei atmas imi yin; vaig inig nikavaig, is auud etwan aien jam eti ethetiknaig, um eti upyi edemda vai yin.
6Etpu amen aien an maliyum iyehki, um imihum pan an nopan iyehki etpu aiji aien an nuhup u ilpu atimi tas alep vai yin, um lep an nopan iyehki etpu mas a natimi esjilid an nahlap an nopan iyehki: ja etpu adumoij pan an maliyum o un a natimi atgei atmas, im lep an nimnim o un, an maliyum iyehki is ahes iran aien.
7Eris aniv Ketes ara, an lolan nedoon Naftalai an pece Calili, im Sikem an lolan nedoon Ifreem, im Kirjad-arba, tak idan Hibron, an lolan nedoon Juta.
8Im lep an nahaijin Jortan igcapan ubutpotet pan Jeriko an ridjai o un, eris aniv Biser ara an namasacen, an nuarin marara u ilpu mapoi Ruben, im Remod an pece Cileat u ilpu mapoi Cat, im Colan an pece Besan u ilpu mapoi Manasi.
9Eris aniv inmaliyum iji igki vai ilpu mapoi Isreel asega, im lep nup urai taka uarin era amen ehele ra ara, mika yi ahapan eahki a natimi inig et atgei atmas aien jam eti ethetiknaig, um eti mas va nikmai natimi eijeijei natmas, um imihum pan an nopan iyehki etpu aiji aien an nuhup u ilpu atimi tas alep.
Currently Selected:
Josua Nuarin-tas alupas 20.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)