Josua Nuarin-tas alupas 17.
Nuarin-tas alupas 17.
1 Inpece u ilpu mapoi Manasi. 7 Niji ehni iran. 12 Era eti ahlo pan nupu Kenan ara. 14 Era leh inpece et eche a ilpu mapoi Josef.
1Et lep eteuc nuarin nobohtan vai ilpu mapoi Manasi; is halav atamaig inmeto u Josef aien; nikavaig, vai Mekir marom inhalav atamaig inmeto u Manasi, etmai Cileat: is eucsupo a Cileat, va nitai inigki is leh Cileat im Besan aien.
2Is lep eteuc nuarin nobohtan vai nahaiji ilpu mapoi Manasi et idivaig ilpu eteuc ira ra; vai ilpu mapoi Ahiiser, im ilpu mapoi Hilek, im ilpu mapoi Asriel, im ilpu mapoi Sikem, im ilpu mapoi Hifer, im ilpu mapoi Semaita: eris ilpu halav atamaig u Manasi inhal u Josef ara sji igki is idivaig ilpu eteuc ira ra.
3Ja eris eti eteuc a ilpu halav atamaig u Silofehat inhal u Hifer, inhal u Cileat, inhal u Mekir, inhal u Manasi, ilpu halav atahig ache: nidai ilpu halav atahig o un ji igki, nan, Mela, im Noa, im Hocla, im Milka, im Tirsa.
4Eris apan ara an nuhup u Eliesar natimi ahlap, im Josua inhal u Nun, im ilpu atimi alupas esjilid, um ika, Is asaig a Ihova ehele Moses mika yi alupai cama nuarin nobohtan pan irai ilpu atimi ehpan irama. Va nitai inigki eris alupai ra nuarin nobohtan pan irai ilpu etwai etmara is idivaig is asaig a Ihova.
5Eris leh nuarin nobohtan is ten a ilpu mapoi Manasi, im lep inpece Cileat im Besan, an nahaijin Jortan igcapan;
6eris idim leh nuarin nobohtan imi ra a ilpu mapoi atahig u Manasi pan irai ilpu mapoi atamaig o un: eris lep leh inpece Cileat nahaiji ilpu mapoi atamaig u Manasi.
7Is ahes nahaijin pece u ilpu mapoi Manasi irai Eser um yetpan Mikmeda, ubutpotet pan Sikem; is lep apan an nahaijin an matan um yetpan an nuarin amen u nup En-tappua.
8Eris leh inpece Tappua a ilpu mapoi Manasi: ja era ohuun inmaliyum Tappua an nahaijin pece u ilpu mapoi Manasi a ilpu mapoi Ifreem;
9is asuol nahaijin pece ura an nahaijin nofowai Kena an nahaijin inig et ahes nuritoga iran: et eteuc inmaliyum iji igki u ilpu mapoi Ifreem irai iji maliyum u ilpu mapoi Manasi: et lep eteuc nahaijin pece u ilpu mapoi Manasi an nahaijin nofowai inig et ahes narutu iran, um lep yetpok u unjap:
10era ohuun nahaijin inig et ahes nuritoga iran a ilpu mapoi Ifreem, ja era ohuun nahaijin inig et ahes narutu iran a ilpu mapoi Manasi, et lep eteuc injap an na-haijin; et lep yetpan u inpece u ilpu mapoi Eser an nahaijin inig et ahes narutu iran, im Isakar an na-haijin an ridjai o un.
11Era lep ohuun a ilpu mapoi Manasi an nahaijin pece u ilpu mapoi Isakar, im ilpu mapoi Eser, Bed-sian im niji maliyum iran, im Ibleem im niji maliyum iran, im nup u Tor im niji maliyum iran, im nup Entor im niji maliyum iran, im nup u Teanak im niji maliyum iran, im nup u Mecitto im niji maliyum iran; nahaijin pece et eseij.
12Ja is ehka vai ilpu mapoi Manasi nahlo vaig nup urai maliyum iji igki; eris imiisjis a nup u Kenan par amen an pece iyehki.
13Ja eris wat emda a nup Isreel eris aniv nimtan ehele nup u Kenan ara; ja eris eti ahlo upene ra ara.
14Eris tas ehele Josua a ilpu mapoi Josef, um ika, As a uri aiek par alupai cama nahaijin pece et ethi ache im nuarin et ethi ache, ecra ahinag acen aijama, is aiheuc vai cama a Ihova um imihum pam an nopan inig?
15Is tas ehele ra a Josua, um ika, El eka ahinag aijaua, akumu apan an nesei aijaua, um atai auicai vai caua an pece u nup u Piris, im ilpu atimi actalactal, el et haklin lola edoon Ifreem vai caua.
16Eris ika a ilpu mapoi Josef, Et haklin vai cama inpece ijinies: et lep eteuc niji jariot aiurn u nup u Kenan asega era amen an pece sepagko ara; ara era amen Bed-sian ara im niji maliyum iran, im lep ra era amen an niskanse Jesriil ara.
17Is tas a Josua ehele ilpu mapoi Josef, ilpu mapoi Ifreem im Manasi marom, um ika, Eka ahinag aijaua, um lep emda acen: akupu eti ohuun nahaijin pece et ethi ache;
18akumu lep ohuun inlolan nedoon aijaua; et idim nesei, ja akumu acaldei aijaua: akumu ohuun niji uari pece iran aijaua: et eteuc niji jariot aiurn ura, era lep emda ara, ja er uauo, akupu ahlo nup u Kenan aijaua.
Currently Selected:
Josua Nuarin-tas alupas 17.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)