Ilpu Atimi Tas Alep Nuarin-tas alupas 9.
Nuarin-tas alupas 9.
1 Et asan tas alwai ehele nup u Sikem a Abimelek, um atgei ilpu etwan, ja eh ati yin natimarid. 7 Et acaiji ra a Jodam an tas ecsipece, um upyi asuptecnaig nauahas ra vaig. 22 Et asan tas alwai ehele nup u Sikem vai Abimelek a Ceal. 30 Et ehvaig nedo ura a Sibul. 34 Et esjilid ira ra a Abimelek, um ahwaig inmoho an jap an maliyum. 46 Et atnamud neom emda u Biirid natmas ura aien. 50 Eh atgei yin Dibes an nuarin hat irara flaur iran. 56 Eh ehneijid intas ahlaijaig u Jodam.
1IS apan Sikem a Abimelek inhal u Jerub-beal ehele ilpu atamaig irai risin, um tas ehele ra, im lep ehele ilpu atimi ehpan irai etmai risin asega, um ika,
2Aiheuc vai nyak aijaua, um tas ehele nup u Sikem asega, um ika, Et upene iramia mika eri esjilid iramia a ilpu atimi et sevente, ka yi esjilid iramia a natimi et ethi ache? im lep inig, imiehva aijaua mika ek atimi ehpan iramia ainyak.
3Eris asan tas iji igki asega ehele nup u Sikem a ilpu atamaig irai risin: eris merit ara par leh imi Abimelek; eris idim ika ara, Et etwaija aien.
4Eris lucsei inuari silver is sevente ara ehele neom u Beal-biirid, is ahtai a Abimelek imi ilpu ihki atimi im ilpu atimi auatatimi, eris ahced yin ara vaig.
5Is yetpan aien an nimnim u etman Ofra, um atgei ilpu etwan ilpu hal u Jerub-beal, natimi is sevente, ijinies an hat is ethi: ja is eled a Jodam inhal u Jerub-beal inharei; is idim atpuh aien.
6Eris asjapicnaig a ilpu atimi alupas u nup u Sikem, im nup u Millo asega, um ati Abimelek mika yi atimarid aien, an nuarin marara ithan cai alupas Sikem.
7Eris wat asuptecnaig nitai iji igki ehele Jodam, is apan aien um aiji an lolan nedoon Cerisim, um aunyauwaig, um efehtas, um ika ehele ra, Ak ilpu atimi alupas u nup u Sikem, akumu atahaijeg intas unyak aijaua, mika yi atahaijeg intas unyimia a Atua.
8An nopan iyehki eris apan niji cai mika eri ati natimarid ira ra; eris ika ara ehele incai oliv, Namu esjilid irama aiek.
9Ja is ika ehele ra incai oliv, Oʼo, et ehka vai nyak par udei narakei unyak, er ecen vai Atua im lep va atimi iran, um apan mika ki atimarid u niji cai ainyak.
10Eris lep ika ehele nateg niji cai, Namu apam aiek, um esjilid irama?
11Ja is ika ehele ra nateg, Oʼo, et ehka vai nyak par udei naiyu unyak, im nohwak upene, um apan mika ki atimarid u niji cai ainyak.
12Eris aketo niji cai, um ika ehele vaine, Namu apam aiek, um esjilid irama.
13Ja is ika ehele ra vaine, Oʼo, et ehka vai nyak par udei nide vaine unyak, et imiacitak a Atua im lep natimi vaig, um apan mika ki atimarid u niji cai ainyak.
14Eris lep aketo niji cai asega, um ika ehele nadeni, Namu apam aiek, um esjilid irama.
15Is ika ehele niji cai nadeni, El eka inveijec aijaua, um ati nyak mika ki atimarid unyimia ainyak, akumu apam aijaua, um asgeig an naiyu unyak: ja el et eti uce, etmu ahes an nadeni incap um atnamud niji sitar an nau Lebanon.
16Va nitai inigki el eka mun ago nedo inveijec um atoh aijaua, akis wat ati Abimelek aijaua mika yi atimarid aien; im lep inig, el eka ago nedo upene aijaua vai Jerub-beal im ilpu hal o un, um ara iran et idivaig nauritai upene o un is ago aien;
17(is ati nedoa vai ilpu atimi tak atimi iramia a etmak, is ubutpotet u inmas o un aien vai caua, um imiatamaig caua irai ikmai nup u Mitian:
18ja eka mun aat irai ilpu atimi ehpan irai etmak aijaua an nopan inig, um atgei ilpu halav atamaig o un, natimi et sevente, an hat et ethi, um ati Abimelek inhal u naheca atahig o un mika yi atimarid u nup u Sikem aien, vaig inig nikavaig, et etwamia aien;)
19el eka mun ago nedo inveijec um atoh aijaua vai Jerub-beal im ilpu hal o un an nopan inig, akumu imiacitak Abimelek aijaua, etmu lep imiacitak caua aien:
20ja el et eti uce, etmu ahes incap ehele Abimelek, um auahas ilpu atimi alupas u nup u Sikem, im nup u Millo; etmu lep ahes incap ehele ilpu atimi alupas u nup u Sikem, im nup u Millo, um auahas Abimelek.
21Is auroauro a Jodam, um ahapan, um yetpan Bier, um amen eahki; is idim imtitaig Abimelek etwan aien.
22Is wat atimarid u nup Isreel a Abimelek irai mesese is eseij,
23is abrai nesgai itai has a Atua ehele Abimelek im ilpu atimi alupas u nup u Sikem; eris ago nedo efaifa vai Abimelek a ilpu atimi alupas u Sikem:
24mika eri atijai irai Abimelek etwara nedo ipjin iyehki is ago aien vai ilpu hal u Jerub-beal, natimi is sevente, im inmas ura, is atgei ra aien; im lep irai ilpu atimi alupas u nup u Sikem, eris atau imi yin ara par atgei ilpu etwan.
25Eris ikni ilpu atimi imiiris yin a ilpu atimi alupas u nup u Sikem irai lola edoon, eris atoraliak itai ura sji igki asega ara eris apan ara an nefalaig iyehki um ahtaregdei ra: eris asuptecnaig nedo inigki ehele Abimelek.
26Is apam a Ceal inhal u Ibet im ilpu etwan, um yetpan Sikem: eris asgeig iran a ilpu atimi alupas u nup u Sikem.
27Eris apan itac ira ahapol ura ara, um asjapicnaig ohwai itai irai okoro vaine ura, um ahtaijiraig nohwai vaine, um cediaig, um apan anliin neom u natmas ura, um hag um umwig, um asan tas ahlaijaig vai Abimelek.
28Is ika a Ceal inhal u Ibet, Abimelek nigki a di, natimarid u nup u Sikem nigki a di, mika ti aheca o un akaija? et idim hal u Jerub-beal aien, et idim aheca o un a Sibul; ja et ika aien eri aheca o un a ilpu mapoi Hemor etmai Sikem: inta a uri akaija um aheca o un?
29Ek merit alupas ainyak mika ki atimarid u nup igcaki! inki auroauro ainyak um atipagki Abimelek. Ekpu ika ainyak ehele Abimelek, Asjapicnaig ilpu eucsupo unyum aiek, um apam um aat irak.
30Is wat atahaijeg intas o Ceal inhal u Ibet a Sibul natimi aminjinaig nup an maliyum, is alupas intavaitap o un.
31Is abra atimi aien jam adenaig, mika eri apan ehele Abimelek ara, um ika, Et mun yetpam Sikem a Ceal inhal u Ibet im ilpu etwan; era idim ago emda inmaliyum ara mika eri aat iram.
32Va nitai inigki atidai aiek an nepig, aiek im natimi iji ig era amen ehelum ara, um atpaijinai ra an lelitai:
33ja namu auroauro aiek an nuhihialeg, um atidai, et wat aridjai nagesega, um aat irai up uran maliyum: im lep inig, etu wit apan itac aien im natimi leh imi yin, um aat iram, namu ago vai ra aiek et idivaig nemda unyum.
34Is atidai an nepig a Abimelek, im natimi asega amen ehelen, um atpaijinai nup u Sikem irai iji ira atimi is for.
35Is apan itac a Ceal inhal u Ibet, um aiji an nefalaig an neucse nathatahau u inmaliyum: is atidai a Abimelek, im natimi amen ehelen, um udei nuarin atpaijinaig iran ura.
36Is wat ecet atimi iji ehki a Ceal, is ika aien ehele Sibul, Almoi, era ahes irai lola edoon natimi um asuol sepam, Ja is ika ehelen a Sibul, Na ecetai naiyu u niji edoon aiek et idivaig natimi.
37Is aketo a Ceal um tas, um ika, Almoi, era asuol sepam natimi an nuarin juju, era lep apam niji ira atimi et eche an nuarin marara Mioniinim.
38Is um ika ehelen a Sibul, Intas unyum yek eda an nopan inig, as ika aiek, Ethi di nigki a Abimelek mika ti aheca o un akaija? natimi iji ehki as amcel vai ra aiek ji igki; namu idim apan itac aiek, um ati nedoa vai ra.
39Is apan a Ceal um uhup irai up u Sikem, um ati nedoa vai Abimelek.
40Is esjilid iran a Abimelek, um ahau yin, eris atgei atimi is ahinag, um ati inmocop ira ra, um yetpan an neucse nathatahau u inmaliyum.
41Is amen Aruma a Abimelek, um yetpan an nopan iyehki is ahlo pan Ceal im ilpu etwan a Sibul; va eri jim amen an maliyum Sikem ara.
42Ja is wat lahlah an tak apnyin, eris asuptecnaig ehele Abimelek hal atimi mika eris apan itac anliin pece natimi;
43is um lucsei atimi o un aien, um atiakoai ra irai iji ira atimi is eseij, um atpaijinaig ra an lelitai, um yetpan an nopan iyehki is ecetai aien mika, eris ahes an maliyum natimi um apan itac; ja is aat ira ra aien, um atgei ra.
44Is idim teloteloh pan a Abimelek, im niji ira atimi amen ehelen, um aiji an nefalaig an neucse nathatahau u inmaliyum: eris lep aat ira atimi asega an lelitai niji ira atimi is ero is eche, um atgei ra:
45Is ati nedoa vai nup an maliyum a Abimelek an nadiat iyehki asega; is atoraliak inmaliyum aien, um atgei atimi amen iran, um alcapdicraig inmaliyum, um ahwaig inmoho an jap iran.
46Eris wat atahaijeg vaig natimi asega eris amen an neom emda u Sikem, eris apan ara an nuarin ehka an neom u Biirid natmas ura.
47Eris asuptecnaig ehele Abimelek mika, eris asjapicnaig an nuarin is ethi natimi asega eris amen an neom emda um ijinies Sikem.
48Is aridjipan an nedoon Salmon a Abimelek, aien im natimi asega amen ehelen; is leh inpas an nikman a Abimelek, um auud yi aled inran irai cai, um leh, um atijai an neuhlin, um ika ehele atimi amen ehelen, Akumu auroauro aijaua, um ago nedo et idivaig nedo unyak, eka mun ecetai aijaua.
49Eris auud yi aled niji ran ura natimi asega, athi um athi ehni, um apitac Abimelek, um ikni an neom emda, um ahli neom emda va atimi; is uce eris emesmas natimi asega an neom emda u Sikem, eris idivaig wun dausant (1,000) ara, ilpu atamaig im ilpu takata.
50Jais par apan Dibes a Abimelek, um imiarehed irai Dibes, um atoraliak.
51Ja is eteuc an maliyum iyehki neom ijinies is ethi is emda, eris ahapan eahki a ilpu atamaig im ilpu takata asega, nup an maliyum asega marom, um atapnes ipjin neucse neom, um aridjai an lolan neom.
52Is yetpan neom ijinies iyehki a Abimelek, um ati nedoa vaig, um apan ubutpotet an neucse neom mika yi atnamud iran.
53Is um ethaigse nuarin hat irara flaur iran tah intakata is ethi an nidjini Abimelek, um ahtagrei ehni nipji ipek o un.
54Ja is auroauro aien um ahlaig vai intakuras iyehki is apos nij va atimi o un, um ika ehelen, Ahyausei nauitoga unyum aiek, um atgei nyak, va eri jim ika natimi vai nyak, Is atgei yin a intakata. Is ahcai yin a intakuras o un, is pali mas aien.
55Eris wat ato a nup Isreel mika is mas a Abimelek, eris apan irai imnim ura ara asega, athi um athi ehni.
56Is uce is aru nedo has iyehki u Abimelek a Atua, is ago aien vai etman, an natgei vaig u ilpu etwan is sevente.
57Is aru irai idjinira a Atua nedo has asega u nup u Sikem: is yetpan ira ra intas ahlaijaig u Jodam inhal u Jerub-beal.
Currently Selected:
Ilpu Atimi Tas Alep Nuarin-tas alupas 9.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)