Ilpu Atimi Tas Alep Nuarin-tas alupas 10.
Nuarin-tas alupas 10.
1 Et tas alep vai nup Isreel a Tola an maliyum Semir. 3 Jeer, is eteuc inmaliyum is dirte irai ilpu halav atamaig o un is dirte. 6 Era ehcerucai nup Isreel a nup u Filistia im nup Amon. 10 Et ika a Atua an nohocred, ura eri apan ehele ilpu atmas ahcil ura. 15 Eris wat adumoij an liinmopora ara is aiheuc vai ra aien.
1IS wat mas a Abimelek, is atidai par imiatamaig nup Isreel a Tola inhal u Pua, inhal u Toto, is mapoi Isakar aien; is amen aien an maliyum Semir an nedoon Ifreem.
2Is tas alep aien vai nup Isreel irai mesese is twente dri, eris atelmoi yin Semir ara.
3Is wat mas aien is atidai a Jeer, is mapoi Cileat aien, is tas alep aien vai nup Isreel irai mesese is twente tu.
4Eris eteuc iran a ilpu halav atamaig is dirte, eris ateuc ara irai togke tupko is dirte, is lep eteuc ira ra inmaliyum is dirte, eris anvi nidara par ika Hevod-jeer (Niji maliyum haklin u Jeer) um imihum pam an nopan inig, era eteuc an pece Cileat.
5Is mas a Jeer, eris atelmoi yin Kemon ara.
6Eris aketo a nup Isreel um ago nedo has an nuhup u Ihova, um alaigaheni vai Beal im Astarod, im ilpu atmas u nup u Siria, im ilpu atmas u nup u Saiton, im ilpu atmas u nup u Moab, im ilpu atmas u nup Amon, im ilpu atmas u nup u Filistia, eris udei Ihova ara, um eti alaigaheni vai yin.
7Is alupas nedemda u Ihova vai nup Isreel, is lep atcijaig ra aien irai ikmai nup u Filistia, im lep irai ikmai nup Amon.
8An nopan iyehki eris ehcerucai nup Isreel ara um ehtipidai ra, irai mesese is eetiin; nup Isreel asega marom eris amen ara an nahaijin Jortan igcapan an pece u nup Emor, inpece Cileat marom.
9Im lep inig, eris algauwaig Jortan a nup Amon mika eri lep ati nedoa vai ilpu mapoi Juta, im ilpu mapoi Benjamin, im ilpu mapoi Ifreem; is idim alupas nohocred u nup Isreel.
10Eris ahlaig vai Ihova a nup Isreel, um ika, Ecra mun ago nedo has vai euc aijama, vaig inig nikavaig, ecra mun udei Ihova aijama, um lep alaigaheni vai ilpu atmas.
11Is ika a Ihova ehele nup Isreel, Kis idim imiatamaig caua ainyak vai nup Ijipt, im lep vai nup Emor, im lep vai nup Amon, im lep vai nup u Filistia;
12eris ehcerucai caua a nup u Saiton, im nup Amalek, im nup u Mitian; akis lep ahlaig vai nyak aijaua, kis imiatamaig caua ainyak irai ikmara.
13Ja eka mun udei nyak aijaua, um alaigaheni vai ilpu atmas u nup urai pece: va nitai inigki inki eti lep imiatamaig caua ainyak.
14Apan aijaua um ahlaig vai ilpu atmas iji ig eka mun ehtai ra aijaua; erumu imiatamaig caua ara an nopan ohocred unyimia.
15Eris ika a nup Isreel ehele Ihova, Ecra mun ago nedo has aijama: namu ago vai cama aiek nedo asega inig et upene iram; jam aiheuc vai cama ache aiek, um imiatamaig cama an nopan inig.
16Eris atcijaig ilpu atmas u nup urai pece ehele ra ara, um alaigaheni vai Ihova ache: is lep aiheuc vai nup Isreel aien va nohocred ura.
17Eris asjapicnaig a nup Amon, um amen an pece Cileat. Eris lep asjapicnaig a nup Isreel, um amen an nuarin pece Mispi.
18Eris tas jipe a ilpu atimi alupas u nup u Cileat, um ika, Natimi inig yek eda etpu atupun aien um ati nedoa vai nup Amon? etpu atimarid u nup u Cileat asega aien.
Currently Selected:
Ilpu Atimi Tas Alep Nuarin-tas alupas 10.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)