Ilpu Atimi Tas Alep Nuarin-tas alupas 8.
Nuarin-tas alupas 8.
1 Et ago eropse inliinmopoi ilpu mapoi Ifreem a Citeon. 4 Era esjum a nup u Sukkod im nup u Penuel par aiheuc vai Citeon um alaa ilpu eucsupo o un. 10 Et arop irai Siba im Salmunna a Citeon. 13 Et aru irai up u Sukkod im nup u Penuel aien. 18 Et atgei Siba im Salmunna a Citeon vai inmas u ilpu etwan. 22 Et ika aien eri jim ati yin mika yi atimarid ura. 24 Et ahes nedo apat irai efot o un. 28 Era imiasuol nup u Mitian ara. 29 Ilpu hal u Citeon im inmas o un. 33 Era ago nedo apat a nup Isreel jam eti aru nedo upene u Citeon.
1ERIS ika ehele Citeon a ilpu mapoi Ifreem, Na a uri aiek par ago nedo inigki vai cama, um eti imiacaij cama, as wat apan aiek um ati nedoa vai nup u Mitian? Eris atuh emda yin ara.
2Is ika aien ehele ra, Ek eti ago tah nitai ainyak, et idivaig nitai inig eka mun ago aijaua; et esjilid nasjapicnaig ohwai itai apitac u ilpu mapoi Ifreem, irai asjapicnaig ohwai itai uhup u nup Ahiiser.
3Et mun atcijaig irai ikmamia a Atua ohwat atimarid eraigki u nup u Mitian, nan, Oreb im Sieb: is ehka vai nyak par ago tah nitai et idivaig caua. Is wat asan tas inigki aien, is eropse inliinmopora ara um tiih nedemda ura.
4Is yetpan Jortan a Citeon, um algaunyi, aien, im natimi is dri huntret (300) ehelen; eris auatialidi ara, ja eris ahau nup u Mitian ara.
5Is ika aien ehele nup u Sukkod, Aiheuc vai nyak aijaua, um alaa atimi ahced nyak nitai caig incara; era idim arici ara, ek lep ahau Siba im Salmunna ainyak, ohwat atimarid u nup u Mitian.
6Eris ika a ilpu atimi alupas u nup u Sukkod, Na eti esjilid irai Siba im Salmunna aiek, mika ecri alaa ilpu eucsupo unyum nitai caig incara aijama.
7Is ika a Citeon, Va nedo unyimia, etu wit atcijaig imi nyak Siba im Salmunna a Ihova, ekpu aredei ohumia ainyak irai itai upunupun an namasacen im nadeni.
8Is ahes eahki aien um aridjipan Penuel, um lep asan tas is uce ehele ra: ja eris tas ehelen a nup u Penuel is idivaig eris tas ehelen a nup u Sukkod.
9Is lep tas ehele nup u Penuel aien, um ika, Eku wit adumoij pam an nigpa ainyak, ekpu alcapdicraig neom emda um ijinies inigki ainyak.
10Erus amen Karkor a Siba im Salmunna im ilpu eucsupo ura ehele ra, is idivaig atimi is fiftiin dausant (15,000), natimi asega eris eled ara irai ilpu eucsupo asega u nup an ridjai o un: eris atgei atimi is wun huntret im twente dausant (120,000) iji ig eris apos ij va atimi ara.
11Is aridjipan a Citeon an nefalaig u ra sji ehki eris amen irai eom atga ara, an nahaijin Noba im Jocbeha an ridjai o un, um auud ilpu eucsupo: eris tup amen a ilpu eucsupo, um eti imtitaig tah nitai.
12Erus wat aha a Siba im Salmunna, is apitac rau aien, um arop irai ohwat atimarid u nup u Mitian, nan, Siba im Salmunna, um ahau ilpu eucsupo asega.
13Is adumoij pam an nedoa a Citeon inhal u Joas, ja is par aridjai nagesega.
14Is leh intakuras is ethi irai up u Sukkod aien, um ahodai yin: is asuptecnaig ehelen aien nago irai ilpu atimarid u nup u Sukkod, im ilpu atimi alupas ura, eris atimi is sevente seven ara.
15Is yetpan irai up u Sukkod aien, um ika, Almoi Siba im Salmunna aijaua, akis asan tas auyat ehelek aijaua vai rau, um ika, Na eti esjilid irai Siba im Salmunna aiek, mika ecri alaa ilpu eucsupo arici unyum nitai caig incara aijama.
16Is arop irai ilpu atimarid an maliyum iyehki aien, um aredei nup u Sukkod irai itai upunupun an namasacen im lep nadeni.
17Is alcapdicraig neom emda um ijinies irai Penuel aien, um atgei nup an maliyum.
18Is ika aien ehele Siba im Salmunna, Eris idivaig di natimi iji ehki akis atgei ra Tebor aijaurau? Erus ika arau, Eris idivaig euc ara; eris idivaig ilpu hal u tah natimarid ara asega, athi um athi ehni.
19Is ika aien, eris ilpu etwak ara, ilpu hal u risik marom: et umoh a Ihova, et idim uco, el akis ika aijaurau eri umumoh ara, inki eti atgei caurau ainyak.
20Is ika aien ehele Jider inhal o un inmeto, Atidai aiek, um atgei rau. Ja is eti ahyausei nauitoga o un a intakuras iyehki: is imtitaig aien, vaig inig nikavaig, is tup takuras aien.
21Erus ika a Siba im Salmunna, Atidai aiek, um auud cumrau: et idivaig niji mesese iran nemda o un tah. Is atidai a Citeon, um atgei Siba im Salmunna, um iknipagki niji itaahnaig im niji teijeug, im napelumai cap eris yecrei ra iran, im lep niji itai esjilid ira auiwai kamela ura.
22Eris ika ehele Citeon a nup Isreel, Namu atimarid unyima aiek, aiek marom, im inhal unyum, im mapom: vaig inig nikavaig, na mun imiatamaig cama aiek va nup u Mitian.
23Is ika ehele ra a Citeon, Inki eti atimarid unyimia ainyak, inyi eti lep atimarid unyimia a inhal unyak: etpu atimarid unyimia a Ihova.
24Is ika ehele ra a Citeon, Ekpu ugyi tah nitai et ethi ache ehelemia ainyak, mika aki alupai nyak niji teijeug iji ig aijaua akis atoraliak an nedoa aijaua, athi um athi ehni. Eris yecrei ra irai teijeug colt nahaiji atimi eris atgei ra, nikavaig, ilpu mapoi Ismeel.
25Eris ika ara, Ecrupu auroauro aijama um alupai. Eris elgelgei napelumai ara, um erekhaigse iran niji teijeug ura ara asega, eris atoraliak ara an nedoa, athi um athi ehni.
26Is idivaig sikel is wun dausant im seven huntret (1,700) nopoc irai teijeug colt iji ehki is ugyi ra vaig aien; eris lep ahtai niji itaahnaig, im niji itai esjilid, im napelumai cap eris yecrei ra iran a ilpu atimarid u nup u Mitian, im lep niji atau colt irai auiwai kamela ura.
27Is ago napelumai esjilid itap iran a Citeon, um ati an maliyum o un, Ofra marom: ja eris par apan eahki a nup Isreel asega, um ago nedo apat vaig: is itai oop napelumai iyehki vai Citeon im ilpu hal o un asega.
28Is uce eris imiasuol nup u Mitian a nup Isreel, va nitai inigki eris eti lep imiaridjai nidjinira ara. Is eteuc nigpa an pece irai mesese is forte an nopan umoh u Citeon.
29Is apan a Jerub-beal inhal u Joas, um amen an nimnim o un.
30Eris eteuc irai Citeon a ilpu halav atamaig is sevente is apos ra aien: eris ahinag a ilpu ehnaa o un.
31Is leh naheca o un Sikem ehgan aien, is lep apos inhalav atamaig imi yin aien, is anvi nidan a Citeon par ika Abimelek.
32Is mas a Citeon inhal u Joas an nefatimi o un, eris atelmoi yin an netheso o Joas etman Ofra, an maliyum u nup Abi-iser.
33Ja is wat mas a Citeon eris adumoij pan a nup Isreel, um alaigaheni vai ilpu atmas, eris ika ara yi atmas esjilid ura a Beal-biirid.
34Eris eti lep imiehva Ihova Atua ura a nup Isreel, is imiatamai ra aien vai ikmai ilpu atimi tak atimi ira ra asega marehed mihtag:
35um eti aiheuc vai ilpu hal u Jerub-beal, Citeon marom, par aru ira ra, is idivaig nedo upene asega o un is ago aien vai nup Isreel.
Currently Selected:
Ilpu Atimi Tas Alep Nuarin-tas alupas 8.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)