Ilpu Atimi Tas Alep Nuarin-tas alupas 7.
Nuarin-tas alupas 7.
1 Era asjapicnaig ehele Citeon a ilpu eucsupo et dirte tu dausant (32,000), ja era abraig pagki ra, era eled dri huntret ache. 9 Er ago emda inliinmopoi Citeon va numjeg ahnag o un tah va nareto barle im nesgantas iran. 16 Nedo arapakau u Citeon va niji toho im niji lamp im niji ipjiitai obohtan. 24 Era arop irai Oreb im Sieb a ilpu mapoi Ifreem.
1IS auroauro a Jerub-beal, Citeon marom, im natimi asega iji ig eris amen ehelen ara, um atidai an nuhihialeg, um athai eom atga ura ubutpotet pan an nehpanwai Herot: eris amen a nup u Mitian an nahaijira inig et ahes narutu iran, an niskanse, ubutpotet pan an nedoon Mori.
2Is ika a Atua ehele Citeon, Era ahinag acen natimi iji ig era amen ehelum ara, vai nyak par atcijaig nup u Mitian ehele ra, va eri jim tas ijinies vai nyak a nup Isreel, um ika, Ecra mun imiatamaig cama irai ikmama aijama.
3Va nitai inigki namu atauai ehele atimi aiek, um ika, Ara asega era etehto ara um imtitaig, eri fi auroauro ara an nuhihialeg, um ahes an nedoon Cileat, um adumoij pan. Eris adumoij pan natimi is twente tu dausant (22,000); eris lep amen natimi is ten dausant (10,000).
4Is ika ehele Citeon a Ihova, Era idim ahinag acen natimi; namu imiasuol ra aiek an wai, ekpu ahilek inliinmopora vai euc eahki ainyak: inyi idim uco, eku wit asaig ehelum ainyak vaig tah, um ika, Etmu atau iram a natimi inigki, inyi idim atau iram aien; ja eku wit asaig ehelum ainyak vaig tah, um ika, Etmu jim atau iram a natimi inigki, inyi idim eti atau iram aien.
5Is imiasuol atimi an wai aien: is ika ehele Citeon a Ihova, Ara asega era ehtalad wai ara et idivaig et ehtalad wai kuri, namu echim ikni ra aiek; im lep inig, ara asega era atpuse ara irai eijinwidwud ura par umnyi.
6Eris dri huntret natimi iji ehki eris ehtalad wai ara, nikavaig, eris atijai nikmara ara an nipjineucsera: ja eris atpuse irai eijinwidwud ara asega is eche par umnyi inwai.
7Is ika ehele Citeon a Ihova, Ekpu imiatamaig caua ainyak vai natimi et dri huntret era mun ehtalad wai ara, um atcijaig nup u Mitian irai ikmamia: ja namu adcijai atimi asega et eche aiek mika eri adumoij pan irai imnim ura, athi um athi ehni.
8Eris leh nitai caig incara ara im niji toho, athi um athi ehni: is acaiji atimi is dri huntret iji ehki ache aien mika eri amen ehelen, ja is adcijai atimi asega et eche aien mika eri adumoij pan irai imnim ura, athi um athi ehni.
9Is amen inpak an nedoa u nup u Mitian ithan sepagko an niskanse. Is lep ika ehelen a Ihova an nepig iyehki, Namu atidai aiek, um asuol an nuarin amen iran u atimi, ekpu idim atcijai ra an nikmam ainyak.
10Ja el et imtitaig aiek par asuol um imiapan atimi unyum, namu asuol aiek ache, im Fura naheca unyum, an nuarin amen iran u atimi:
11napu atahaijeg intas iji ig aiek eri asaig ara; ja par apitac etpu emda inliinmopom aiek par asuol an pak an nedoa, um imiapan atimi unyum. Ja is par apitac aien im Fura naheca o un, um asuol um yetpan an nahaijin itac u inpak an nedoa.
12Eris asjeuc pan an niskanse a nup u Mitian, im nup Amalek, im nup an ridjai o un asega, eris ahinag acen ara, eris tup idivaig niji heled ara; is ehka par esvi niji kamela ura, eris ahinag acen um idivaig nauanavig an nohmunjap.
13Is wat yetpan a Citeon, is asuptecnaig numjeg ahnag o un tah natimi ehele etwan, is ika aien, Ek mun umjeg ahnag ainyak, um ecetai, et mun atcelcaig nareto irai barle an nuarin amen iran u nup u Mitian, um yetpan an tah neom atga, um isji mika yi eropse, eh mun alcapdicraig, et mun lep jase.
14Is tas a etwan, um ika, Et idim uco, nesgantas nigki, et idim Citeon nigki inhal u Joas, nup Isreel et ethi, im inpak an nedoa o un: et mun atcijaig ehelen nup u Mitian a Atua, im inpak an nedoa ura asega.
15Is wat atahaijeg intas inig a Citeon, va numjeg ahnag iyehki, im nesgantas iran, is alaigaheni aien, um adumoij pan an pak an nedoa u nup Isreel, um ika, Akumu atidai aijaua; et mun idim atcijaig irai ikmamia inpak an nedoa u nup u Mitian a Ihova,
16Is atiakoai atimi is dri huntret aien irai pak an nedoa is dri, is ati intoho is ethi an nikmai atimi asega aien, athi um athi ehni, im lep ipjiitai obohtan eris tup nipjin, im lep lamp is ethi irai iji ipjiitai.
17Is ika ehele ra aien, Akumu easpam ehelek aijaua, um ago et idivaig nedo unyak: im lep inig, eku wit yetpan an nahaijin nuarin amen iran u atimi ainyak, akumu ago nedo inig aijaua, ekpu ago ainyak.
18Eku wit ahlai intoho ainyak, ainyak marom im natimi asega ehelek, akumu lep ahlai toho aijaua ira ahaijin nuarin amen iran u atimi asega marehed mihtag, um ika, Nedoa u Ihova, im Citeon.
19Is yetpan an nahaijin nuarin amen iran u atimi a Citeon, im natimi is wun huntret ehelen, an nijihgan nepig; eris tup paam ikni ilpu atimi ehlad: eris ahlai niji toho ara, um ahtagrei niji ipjiitai eris apos an nikmara ara.
20Eris ahlai toho ura niji ira atimi is dri, um ahtagrei ipjiitai ura, um ehvaig niji lamp ura irai mauura, im niji toho ura irai matara, par ahlai iran: eris ahlaig ara, um ika, Nedoa u Ihova im lep u Citeon.
21Eris aiji ara asega irai iji uarin ura, athi um athi ehni, um arehed an nuarin amen iran u atimi: eris athut inpak an nedoa asega, um aunyauwaig, um ahapan.
22Eris ahlai toho ura natimi is dri huntret, is ika a Ihova eri auud jipe ra a ilpu eucsupo an pak an nedoa asega: eris lep ahapan inpak an nedoa um yetpan Bedsitta an pece Sererad, um yetpan an nehni Ebel-mihola, um lep yetpan Tabad.
23Eris asjapicnaig a nup Isreel, nikavaig, ilpu mapoi Naftalai, im ilpu mapoi Eser, im ilpu mapoi Manasi, um ahau pan nup u Mitian.
24Is abra atimi a Citeon, mika eri apan an nedoon Ifreem asega ara, um ika, Akumu asuol sepam aijaua, um aat irai up u Mitian, um atapnes ra an wai Bed-bera um yetpan Jortan. Eris asjapicnaig a ilpu mapoi Ifreem asega, um yetpan an wai Bed-bera im lep Jortan.
25Eris arop irai ohwat atimarid u nup u Mitian ara, nan, Oreb im Sieb; eris atgei Oreb ara an hehteuc Oreb, im Sieb u nehpanitai par ahtaijiraig nohwai vaine iran Sieb; um ahau pan nup u Mitian, um imiapan nidjini Oreb im Sieb ehele Citeon an nahaijin Jortan igcapan.
Currently Selected:
Ilpu Atimi Tas Alep Nuarin-tas alupas 7.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)