Ilpu Atimi Tas Alep Nuarin-tas alupas 6.
Nuarin-tas alupas 6.
1 Era ehcerucai nup Isreel va nedo has ura a nup u Mitian. 8 Et acaiji ra a naprofeta et ethi. 11 Et abraig pan Citeon a nagelo et ethi mika yi imiatamai ra. 17 Et atnamud nitai tup ahtai u Citeon incap. 25 Et auahas natau u Beal a Citeon, um ahlap an nitai ahlap an natau Ihova-selom. 28 Et imiaras inhal o un a Joas, um anvi nidan par ika Jerub-beal. 33 Inpak an nedoa u Citeon. 36 Nitai asjaaicnaig et ero o Citeon.
1ERIS um ago nedo has a nup Isreel an nuhup u Ihova: is lep atcijai ra a Ihova irai ikmai nup u Mitian irai mesese is seven.
2Eris ehtipidai nup Isreel a nup u Mitian: eris lep aha a nup Isreel vai nup u Mitian, um ago vai ra niji mai tan iji ig et amen irai edoon, im niji mai ij, im niji uarin ehka.
3Eris wat ahwai upsiitai ura a nup Isreel, eris aridjipam a nup u Mitian, im nup Amalek, im nup an ridjai o un, eris aridjipam ara marom, um aat ira ra;
4eris athai eom atga ura ara, um aat ira ra, um auahas nohwai itai an nobohtan, um yetpan Cesa, um eti udei tah nitai hegaig incai nup Isreel; is eti siip, ka kurimatau, ka togke,
5eris aridjipam ara um imiapam niji itai eklim edo irai pece ura im niji eom atga ura, eris ahinag acen ara um idivaig niji heled; is ehka par esvi ra im lep niji kamela ura: eris apam ara mika eri auahas inpece.
6Eris imiasuol alupas nup Isreel a nup u Mitian; eris lep ahlaig vai Ihova a nup Isreel.
7Eris wat ahlaig vai Ihova a nup Isreel vai nup u Mitian,
8is abrai naprofeta is ethi a Ihova mika yi apan ehele nup Isreel aien, is ika ehele ra aien, Et ika a Ihova Atua u nup Isreel, Kis iknipagki caua an pece Ijipt ainyak, um imialau ijo caua an neom u nauaraheca;
9kis imiatamaig caua irai ikmai nup Ijipt ainyak, im lep irai ikmai ra sji igki asega eris ehcerucai caua: kis lep ahlo nup urai pece iji igki ainyak, um alupai caua inpece ura;
10kis lep ika ehelemia ainyak, Ek Atua unyimia ainyak Ihova; akumu jim imtitai ilpu atmas u nup Emor iji ig aijaua, eka amen an pece ura aijaua: ja eka mun eti imiaiji intas unyak aijaua.
11Is apam a nagelo o Ihova is ethi, um ateuc ithan cai alupas Ofra, is ohuun a Joas mapoi Ahiiser: is auud hwiit a Citeon inhal o un ubutpotet pan u nehpanitai par ahtaijiraig nohwai vaine iran, mika yi adenaig vai nup u Mitian.
12Is ehcohos pan ehelen a nagelo o Ihova iyehki, um ika ehelen, Et amen ehelum a Ihova, ak natimi emda.
13Is ika ehelen a Citeon, Awe, ak natimi alupas unyak, el et amen ehelema a Ihova, et echamecha irai ohocred asega inigki et mun yetpam irama? niji auritai ehka o un eda eris asuptecnaig ehelema a ilpu retpoma, um ika, Is iknipagki caija an pece Ijipt a Ihova? ja et mun udei cama an nopan inig a Ihova, um atcijaig cama irai ikmai nup u Mitian.
14Is adumoij pan ehelen a Ihova, um ika, Namu apan aiek an nemda unyum inigki, napu lep imiatamaig nup Isreel aiek vai ikmai nup u Mitian: ek mun idim abrai euc ainyak.
15Is ika ehelen aien, Awe, ak natimi alupas unyak, ekpu imiatamaig nup Isreel ainyak um uauo? et haklin neteuc unyak irai ilpu mapoi Manasi, et lep atimi ihki natimi ainyak irai ilpu hal u etmak.
16Is ika ehelen a Ihova, Et idim inveijec, ekpu atau iram ainyak, napu lep auud nup u Mitian aiek et idivaig natimi et ethi ache.
17Is ika ehelen aien, El et aiheuc vai nyak aiek, namu ehvaig nyak nitai asjaaicnaig aiek mika an tas ehelek aiek.
18Aiheuc vai nyak aiek, um jim apan, um yetpan an nadumoij pam unyak, mika ki leh nitai tup ahtai unyak, um ati an nuhup unyum. Is ika aien, Ekpu amen ainyak um yetpan an nadumoij pam unyum.
19Is apan an nimnim o un a Citeon, um atho inhakli nanin is ethi, um ahen niji areto apalapal is ti leven iran irai flaur is hin is ethi: is atohwaig nohui nanin aien an cat is ethi, is lep atladwi nidin an nipjinitai aien, um imiapan itac ehelen ithan cai iyehki, um ati an nuhup o un.
20Is ika ehelen a nagelo o Atua, Namu leh nohui nanin aiek im niji areto apalapal et ti leven iran, um ikni an hehteuc inigki, um atladwi nidin. Is um ago aien.
21Is adan nilpui niseuc an nikman a nagelo o Ihova, um atcei pan nohui nanin im niji areto apalapal et ti leven iran; is ahes incap an hehteuc um aridjai, um atnamud nohui nanin im niji areto apalapal et ti leven iran. Ja is par apitac a nagelo o Ihova um tup tiih pan iran.
22Is wat ato a Citeon mika is agelo o Ihova aien, is ika a Citeon, Awe, ak Ihova Natimarid! ek mun idim almoi nesganimtai nagelo o Ihova ainyak.
23Is ika ehelen a Ihova, Etmu eteuc nigpa ehelum; namu jim imtitaig aiek: napu eti mas aiek,
24Is um actaig natau eahki imi Ihova a Citeon, um anvi nidan par ika Ihova-selom: et amen Ofra u ilpu mapoi Ahiiser um imihum pam an nopan inig.
25Is ika ehelen a Ihova an nepig iyehki, Namu leh kurimatau atamaig takuras u etmam aiek, kurimatau sekunt marom, et eteuc inmesese et seven iran, um alcapdicraig natau u Beal et ohuun a etmam, um atai niji cai et eteuc ubutpotet iran:
26um actaig natau imi Ihova Atua unyum ijinies an hehteuc inigki, an nuarin iyehki as ahlap an nitai ahlap iyehki iran aiek, um leh kurimatau sekunt, um ahlap an nitai ahlap atnamud irai cai iji ig napu atai aiek.
27Is lucsei atimi is ten irai ilpu aheca o un a Citeon, um ago is idivaig is asaig ehelen a Ihova: is ago nitai inig aien an nepig, is idim ehka vai yin par ago an nadiat; vaig inig nikavaig, is imtitaig nup u nimnim u etman, im nup uran maliyum.
28Eris wat atidai an nuhihialeg a nup uran maliyum, eris ecetai natau u Beal ara eris alcapdicraig, eris lep atai niji cai is eteuc ubutpotet iran, eris lep ahlap irai kurimatau sekunt an natau iyehki eris actaig.
29Eris tas jipe ara, um ika, Et mun ago nitai inigki a di? Eris wat ahodaig ara um ahilek, eris ika hal ira ra, Et mun ago nitai inigki a Citeon inhal u Joas.
30Eris asaig ehele Joas a nup uran maliyum, um ika, Namu imiapam inhal unyum aiek, mika yi mas aien: et idim alcapdicraig natau u Beal aien, et lep idim atai niji cai aien is eteuc ubutpotet iran.
31Is tas a Joas ehele atimi asega an nuhup o un, um ika. Akupu imiisjis ehelek aijaua vai Beal, ka oʼo? el eka imiaras natimi inig aijaua et aat irai Beal aien, etpu mas aien ja par lahlah an tak apnyin. El et atua aien etpu aat aien irai natimi inig et mun alcapdicraig natau o un aien.
32An nadiat iyehki eris anvi nidan par ika Jerub-beal (Etmu aat iran a Beal), vaig inig nikavaig, is ika a etman, Etpu aat a Beal irai natimi inig et mun alcapdicraig natau o un aien.
33Eris asjapicnaig a nup u Mitian asega, im nup Amalek, im nup an ridjai o un, um algauwaig Jortan, um athai eom atga ura an niskanse Jesriil.
34Ja is amen ehele Citeon a Nesgai Ihova, is um ahlai intoho aien; eris asjapicnaig a ilpu mapoi Ahiiser um atau iran.
35Is abra atimi aien mika eri apan ara um imiacaij ilpu mapoi Manasi asega; eris asjapicnaig ara um atau iran: is lep abra atimi aien mika eri apan ara um imiacaij ilpu mapoi Eser, im ilpu mapoi Sebulun, im ilpu mapoi Naftalai; eris lep aridjipam ara mika eri aubilid yin ara.
36Is ika ehele Atua a Citeon, El et imiatamaig nup Isreel aiek vai nyak, et idivaig as asaig aiek,
37inyi idim uco, ekpu ati nalau asega irai siip et ethi ainyak an nuarin inig er auud korn iran; el et eteuc nopoigmul an nalau irai siip ache, el et lep mese nobohtan asega et eche, ekpu ato ainyak mika an imiatamaig nup Isreel aiek vai nyak, et idivaig as asaig aiek.
38Is idim uco: is wat lahlah an tak apnyin, is auroauro aien um atidai an nuhihialeg, um asjapicnaig nalau iyehki irai siip, um avise inwai iran; is ohua inwai an nipjinitai is ethi.
39Is ika ehele Atua a Citeon, Etmu jim alupas nedemda unyum aiek vai nyak, ekpu lep ecethi tas ainyak: namu aiheuc vai nyak aiek, mika ki ecethi ato ainyak va nalau inigki irai siip; etmu mese ache nalau inigki irai siip, etmu lep eteuc nopoigmul an nobohtan asega.
40Is ago nedo inigki a Atua an nepig iyehki: is idim mese ache nalau iyehki irai siip, ja is eteuc nopoigmul an nobohtan asega.
Currently Selected:
Ilpu Atimi Tas Alep Nuarin-tas alupas 6.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)