Ilpu Atimi Tas Alep Nuarin-tas alupas 4.
Nuarin-tas alupas 4.
1 Erus imiatamaig nup Isreel a Tebora im Berak vai Jebin im Sisera. 18 Et atgei Sisera a Jeel.
1IS wat mas a Ihut, eris lep aketo a nup Isreel, um ago nedo has an nuhup u Ihova.
2Is atcijai ra a Ihova an nikmai Jebin natimarid u nup u Kenan, is atimarid aien an maliyum Hesor; is atimi alupas u ilpu eucsupo o un a Sisera, is amen aien Harosed-coem.
3Is ahlaig vai Ihova a nup Isreel: is eteuc ehelen niji jariot aiurn is nain huntret (900); is ehcerucai alupas nup Isreel aien irai mesese is twente.
4An nopan iyehki is aminjinaig nup Isreel a Tebora, naprofeta takata, ehgai Lapitod.
5Is amen aien ithan cai paam u Tebora, juju an niblai Rema im Bedel an nedoon Ifreem: eris ahtagpan ehelen a nup Isreel mika yi tas alep vai ra aien.
6Is abra atimi aien par apan um imiacaij Berak inhal u Abinoam, mika yi ahes Kites-naftalai aien um apam ehelen, is ika ehelen aien, Et idim tas alep a Ihova Atua u nup Isreel, um ika, Namu apan aiek, um imiapam inpak an nedoa an nedoon Tebor, um lucsei ehelum ilpu eucsupo o nup u Naftalai im nup u Sebulun inyi ten dausant (10,000).
7Ekpu lep imiapam ehelum ainyak an nofowai Kaison Sisera, natimi alupas u ilpu eucsupo o Jebin, im niji jariot o un, im ilpu atimi o un et ahinag; ekpu lep atcijaig yin an nikmam ainyak.
8Is ika ehelen a Berak, El et atau irak aiek, ekpu apan ainyak: ja el eti atau irak aiek, inki eti apan ainyak.
9Is ika a Tebora, Ekpu idim atau iram ainyak: ja eri eti imiahpas euc va nedoa inig napu ati aiek; vaig inig nikavaig, etpu atcijaig Sisera an nikmai intakata a Ihova. Is atidai a Tebora, um ahced Berak um yetpan Kites.
10Is imiacaij nup u Sebulun im nup u Naftalai a Berak mika eri apan Kites; is aridjipan aien, eris lep apitac yin natimi is ten dausant (10,000): is atau iran a Tebora.
11Is epujaig nup u Kinai a Hiber nup u Kinai, mapoi Hobab, natimi ehpan irai Moses, um athai neom atga o un an nuarin marara Seaneem, ubutpotet pan Kites.
12Eris asuptecnaig ehele Sisera ara, mika is aridjipan nedoon Tebor a Berak inhal u Abinoam.
13Is asjapicnaig niji jariot o un asega a Sisera, niji jariot aiurn is nain huntret (900) marom, im ilpu atimi asega o un eris amen ehelen, is ahes irai Harosed-coem aien, um yetpan an nofowai Kaison.
14Is ika ehele Berak a Tebora, Atidai aiek; nadiat nigki etpu idim atcijaig Sisera an nikmam a Ihova: et idim apan a Ihova um uhup iram. Is ahes an nedoon Tebor a Berak, um asuol, eris apitac yin natimi is ten dausant (10,000).
15Is ika a Ihova yi esjilid an nedoa a Berak irai Sisera, im ilpu atimi ateuc irai jariot o un asega, im ilpu eucsupo o un asega; va nitai inigki is asuol irai jariot o un a Sisera, um ahapan ubos.
16Ja is ahau niji jariot a Berak, im ilpu eucsupo, um yetpan Harosed-coem: eris atgei ilpu eucsupo asega u Sisera an nedoa; is eti eled tah natimi.
17Ja is ahapan ubos a Sisera um yetpan an neom atga u Jeel ehgai Hiber nup u Kinai: eris idim asa nigpa ehele Jebin natimarid u nup u Hesor im Hiber nup u Kinai im ilpu dualep o un.
18Is alau ijo a Jeel, um aubilid Sisera, um ika ehelen, Ak natimi alupas, apam aiek, apam ehelek aiek, um jim imtitaig. Is wat apan aien ehelen anliin neom atga o un, is adahpoi yin a Jeel an napelumai.
19Is ika ehelen a Sisera, Aiheuc vai nyak aiek, um alumak tah inwai; ek ahvig wai ainyak. Is leh inhubej aien, um atladwi nidenided iran, um aluman, um lep adahpoi yin.
20Is lep ika a Sisera ehelen, Namu aiji aiek an neucse neom atga, im lep inig, el et ham tah natimi um ahodaig euc, um ika, Et amen tah natimi igcaki, ka oʼo? namu ika aiek, Oʼo.
21Is apan a Jeel ehgai Hiber, um leh neel u neom atga, um leh hamer an nikman, um eklim apan ehele Sisera, um atcei neel iyehki an hagamucid o un, um ago ipjin an nobohtan: is idim umjeg asega aien va nauatialidi o un, ja is pah mas aien.
22Is wat apitac Sisera a Berak, is alau ijo a Jeel um aubilid yin, um ika ehelen, Apam aiek, ekpu ehvaig ehelum ainyak natimi inig na ahilek yin aiek. Is wat yetpan a Berak anliin neom atga o un, is asjeuc a Sisera an nuhup o un um mas, is amen ipjin neel iyehki an hagamucid o un.
23Is uce, is ika a Ihova an nadiat iyehki eri esjilid a nup Isreel irai Jebin natimarid u nup u Kenan.
24Eris lep emda a nup Isreel, um esjilid irai Jebin natimarid u nup u Kenan, um yetpan an nopan iyehki eris auahas ehni Jebin natimarid u nup u Kenan.
Currently Selected:
Ilpu Atimi Tas Alep Nuarin-tas alupas 4.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)