Ilpu Atimi Tas Alep Nuarin-tas alupas 3.
Nuarin-tas alupas 3.
1 Nup urai pece iji ig eh udei ra mika uhpu ato nedo o nup Isreel vai ra. 6 Era uhum jipe vai ra ara um ago nedo apat. 8 Et imiatamai ra vai Kusan-risadeem a Odniel. 12 Vai Eclon a Ihut. 31 Vai nup u Filistia a Samcar.
1NUP urai pece ji igki is udei ra a Ihova, mika yi ato nedo o nup Isreel aien vai ra, nikavaig, nup Isreel asega iji ig eris eti ato nedoa asega an pece Kenan ara;
2im lep inig, mika eri esege imi nup Isreel im ilpu mapora par ato nedoa, ra sji ig marom, eris eti upyi ato nedoa ara;
3nikavaig, ilpu atimarid is faiv u nup u Filistia, im nup u Kenan asega, nup u Saiton marom, im nup u Haivai eris amen nedoon Lebanon ara, ahes Beal-hermon um yetpan an nahaijin Hemad.
4Eris idim ika eri ato nedo o nup Isreel vai ra, kit eri imiaiji intas alep u Ihova ara, is asaig aien ehele ilpu retpora irai Moses, ka oʼo.
5ERIS amen a nup Isreel ehele nup u Kenan, im nup u Hed, im nup Emor, im nup u Piris, im nup u Haivai, im nup u Jibus:
6eris lucsei ilpu halav atahig ura mika eri ehgara, um alupai ilpu halav atahig ura mika eri ehgai ilpu halav atamaig ura, um atpuse an nuhup u ilpu atmas ura.
7Eris ago nedo has a nup Isreel an nuhup u Ihova, um eti imiehva Ihova Atua ura, um alaigaheni vai ilpu atmas ura, um atpuse an nuhup u niji atmasimai ura.
8Va nitai inigki is alupas nedemda u Ihova vai nup Isreel, is lep atcijai ra aien an nikmai Kusan-risadeem natimarid an pece Mesopotemia: eris aheca u Kusan-risadeem a nup Isreel irai mesese is eet.
9Eris wat ahlaig vai Ihova a nup Isreel, is imiatidai natimi imiatamai ra is ethi a Ihova vai nup Isreel, is imiatamai ra aien, nan, Odniel inhal u Kinas, etwai Keleb inharei.
10Is amen alupas ehelen a Nesgai Ihova, is tas alep ehele nup Isreel aien, um apan, um ati nedoa: is atcijaig Kusan-risadeem natimarid an pece Mesopotemia a Ihova an nikman; is esjilid irai Kusan-risadeem aien.
11Eris amen igpa a nup uran pece irai mesese is forte. Is pah mas a Odniel inhal u Kinas.
12Eris aketo a nup Isreel um ago nedo has an nuhup u Ihova: is ago emda Eclon natimarid u nup u Moab a Ihova vai nup Isreel, vaig inig nikavaig, eris ago nedo has ara an nuhup u Ihova.
13Is asjapicnaig ehelen aien nup Amon im nup Amalek, um apan, um auud nup Isreel, um ohuun inmaliyum u niji eaig, Jeriko marom.
14Eris lep aheca u Eclon natimarid u nup u Moab a nup Isreel irai mesese is eetiin.
15Ja eris wat ahlaig vai Ihova a nup Isreel, is imiatidai natimi imiatamai ra is ethi a Ihova, nan, Ihut inhal u Cira, mapoi Benjamin, natimi mo: eris ika a nup Isreel yi imiapan nitai tup ahtai ura aien imi Eclon natimarid u nup u Moab.
16Ja is ago imi yin a Ihut nauitoga is ethi is arig an nahaijin im nahaijin, is kubit is ethi nopra iran; is arore iran aien ithan napelumai o un an neduon inmatan.
17Is imiapan nitai tup ahtai iyehki aien imi Eclon natimarid u nup u Moab: is alupas nohui Eclon.
18Is wat alupai yin nitai tup ahtai iyehki a Ihut, is adcijaig ilpu atimi iji ig aien eris apos nitai tup ahtai iyehki ara.
19Ja is adumoij pan aien irai iji atmasimai eris ates eris aiji Cilcal, um ika ehele Eclon, Ak natimarid, et eteuc ehelek intas adenaig et ethi imi euc: is ika aien ehele atimi, Alau ijo aijaua. Eris udei yin ara asega eris amen ehelen ara um alau ijo.
20Is yetpan ehelen a Ihut; is echim ateuc aien an neom van lidija, eris ati vai yin ache. Is ika a Ihut, Et eteuc ehelek intas ahes ehele Atua imi euc. Is ahes an nitai ateuc o un aien, um atidai.
21Is arahpan va nikman inmauun a Ihut, um ahyausei nauitoga iyehki an neduon inmatan, mu ahcai nipjinetgan:
22is apitac nauitoga inceen; is atapnes nauitoga naclan, va nitai inigki is ehka vai yin nahyausei nauitoga vaig an nipjinetgan; is epit itac.
23Ja is par apitac a Ihut, um alau ijo an naiyu, um atapnes intapnes an neucse neom iyehki iran, um ago ipjin.
24Is wat alau ijo a Ihut, eris apan a ilpu aheca u Eclon; ja eris wat ecetai ara mika, is ipjin intapnes an neusce neom, eris ika ara, Et idim tup umjeg aien an neom o un van lidija.
25Eris aitgaig yin ara um lep ehcamai: ja is eti asalgei intapnes an neucse neom aien; va nitai inigki eris leh nitai asalgei intapnes ara, um asalgei: eris lep almoi natimarid ura ara, is eropse an nobohtan aien, um mas.
26Eris wat aitgaig yin ara, is ahapan a Ihut, um ahtaregdei niji atmasimai eris ates, um yetpan Sierad.
27Is wat yetpan aien, is ahlai intoho aien an nedoon Ifreem, eris ahes an nedoon a nup Isreel, um asuol, um ahced yin, is uhup ira ra aien.
28Is ika aien ehele ra, Apitac nyak aijaua: et idim atcijaig ilpu atimi tak atimi iramia nup u Moab irai ikmamia a Ihova. Eris asuol ara, um apitac yin, um aminjinaig niji uarin algauwaig Jortan, um ika eri jim algauwaig tah natimi.
29Eris atgei nup u Moab ara an nopan iyehki is idivaig natimi is ten dausant (10,000), eris alupas um emda natimi iji ehka asega; is eti ahapan tah natimi.
30Eris imiasuol nup u Moab a nup Isreel an nadiat iyehki. Eris amen igpa a nup uran pece irai mesese is eete.
31Is wat mas a Ihut, is isjeupigmoig yin a Samcar inhal u Enad, is atgei nup u Filistia is siks huntret (600) aien: is lep imiatamaig nup Isreel aien.
Currently Selected:
Ilpu Atimi Tas Alep Nuarin-tas alupas 3.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)