Ilpu Atimi Tas Alep Nuarin-tas alupas 20.
Nuarin-tas alupas 20.
1 Et asuptecnaig nohocred o un a mapoi Livai iyehki an nasjapicnaig u atimi. 8 Intas alep u atimi eris asjapicnaig. 12 Eh wat ahodaig nup u Benjamin, era aat irai up Isreel ara. 18 Era atgei nup Isreel et forte dausant (40,000) ara an nedoa et ero. 26 Era ago nedo arapakau a nup Isreel, um atgei nup u Benjamin asega, era eled natimi et siks huntret (600) ache.
1ERIS apan a nup Isreel asega et idivaig natimi et ethi, ahes an maliyum Tan um yetpan an maliyum Bier-siba, im lep nup uran pece Cileat, um asjapicnaig an nuhup u Ihova an maliyum Mispi.
2Eris ehcohos pan an nuhup u Ihova an nasjapicnaig inigki u ilpu atimi u Atua a ilpu atimi esjilid ira atimi asega, irai elcau asega u nup Isreel marom, eris ilpu eucsupo ara is for huntret dausant (400,000) um apos nij va atimi.
3(Eris atahaijeg a ilpu mapoi Benjamin mika eris aridjipan an maliyum Mispi a nup Isreel.)
4Eris ika a nup Isreel, Asuptecnaig, um ika et echamecha va nedo has esjilid inigki? Is tas a mapoi Livai iyehki, natamnyu intakata iyehki eris atgei yin, um ika, Kis yetpan an maliyum Cibea u ilpu mapoi Benjamin ainyak im ehgak, mika ecru amen iran aijumrau.
5Eris atidai a ilpu atamaig u nup u Cibea um aat irak, um arehed an neom vai nyak an nepig, um ika eri atgei nyak: eris auahas ehgak ara, mika is mas aien.
6Kis leh ehgak ainyak, um atiakoai nohun, um imiapan yin irai uari pece asega u nup Isreel: vaig inig nikavaig, era mun ago nedo has er amcel vaig ara an pece Isreel.
7Almoi, eka ilpu mapoi Isreel aijaua asega; akumu aktaktai aijaua, um asaig intas unyimia.
8Eris atidai natimi asega et idivaig natimi et ethi, um ika, Inyi eti apan an nimnim o un tah et ethi iraija; inyi eti lep adumoij pan an neom o un tah ethi iraija.
9Ja intupu ago nedo inigki vai nup u Cibea akaija; intupu ikni itai asjaaicnaig akaija, ja par aat irai up u Cibea et idivaig nativaig iran;
10intupu lep lucsei atimi inyi ten ira atimi et wun huntret irai iji elcau asega u nup Isreel, im lep atimi inyi wun huntret ira atimi et wun dausant, im lep atimi inyi wun dausant ira atimi et ten dausant, mika eri imiapam nitai caig ara inca atimi mika eri ago ara, etu wit yetpan an maliyum Cibea u ilpu mapoi Benjamin, et idivaig nedo maumau asega era mun ago a nup uran maliyum iyehki an pece Isreel.
11Va nitai inigki eris asjapicnaig a ilpu atamaig asega u nup Isreel, um aat irai up uran maliyum, is tup ethi ache inliinmopora ara is idivaig natimi is ethi.
12Ja eris abraig pan atimi a nup urai iji elcau an pece Isreel, mika eri ahced nelcau asega u ilpu mapoi Benjamin, um ika, Neveh nedo has inigki eris ago iramia?
13Va nitai inigki akumu atcijaig imi cama atimi iji igki aijaua, ilpu atimi auatatimi iji ig marom, era amen Cibea ara, mika ecri atgei ra aijama, um atipagki nedo has an pece Isreel. Ja eris esjum a ilpu mapoi Benjamin par atahaijeg intas o ilpu etwara nup Isreel:
14ja eris asjapicnaig a ilpu mapoi Benjamin, eris ahes irai iji maliyum ura ara, um yetpan irai Cibea, mika eri ati nedoa vai nup Isreel ara.
15Eris wat esvi ilpu mapoi Benjamin iji ig an nopan iyehki eris ahes irai maliyum ara, eris twente im siks dausant (26,000) ara sji ehki eris apos nij va atimi ara, eris lep eled a nup u Cibea, eris wat esvi ra eris atimi emda is seven huntret (700).
16Ira atimi asega iji igki eris ilpu atimi emda is seven huntret (700) eris mo ara; eris lep amarero ara, athi um athi ehni, par arapato inhat an numri nidjinin tah, jam et acjaliek.
17Eris wat esvi nup Isreel, eris for huntret dausant (400,000) ara sji ig eris apos nij va atimi ara: eris ilpu eucsupo ara asega; ja eris eti esvi ilpu mapoi Benjamin.
18Eris atidai a nup Isreel, um aridjipan an neom u Atua, um ahodaig Atua, um ika, Erumu uhup a di irama um aridjai, um ati nedoa vai ilpu mapoi Benjamin? Is ika a Ihova, Erumu uhup a ilpu mapoi Juta um aridjai.
19Eris atidai an nuhialeg a nup Isreel, um athai eom atga ura an maliyum Cibea, um aat iran.
20Eris apan a nup Isreel mika eri ati nedoa vai ilpu mapoi Benjamin; eris lep atah ira ra a nup Isreel mika eri ago nedoa vai ra Cibea.
21Eris ahes an maliyum Cibea a ilpu mapoi Benjamin, um auahas an nobohtan atimi is twente tu dausant (22,000) irai up Isreel an nadiat iyehki.
22Eris aridjipan a nup Isreel, um ehtigtaig an nuhup u Ihova um yetpan an jupura, um ahodaig Ihova, um ika, Ecrumu aketo aijama um apan um ati nedoa vai ilpu etwama ilpu mapoi Benjamin, ka oʼo? Is ika a Ihova, Akumu apan aijaua um aat ira ra.
23Eris ago emda inliinmopora natimi, nup Isreel marom, um aketo um atah ira ra an nuarin iyekki eris atah ira ra an nadiat uhup.
24Eris apan ubutpotet a nup Isreel par aat irai ilpu mapoi Benjamin an nadiat sekunt.
25Eris lep ahes an maliyum Cibea a ilpu mapoi Benjamin an nadiat sekunt, um aat ira ra, um lep auahas an nobohtan atimi is eetiin dausant irai up Isreel; eris apos nij va atimi ara sji igki asega.
26Eris aridjipan a nup Isreel asega, natimi asega marom, um yetpan an neom u Atua, um ehtigtaig, um ateuc eahki an nuhup u Ihova, um atwakam an nadiat iyehki um yetpan an jupura, um ahlap irai iji itai ahlap atnamud im niji itai ahlap va nigpa an nuhup u Ihova.
27Eris ahodaig Ihova a nup Isreel, (is idim amen eahki nelcau an tas etipup u Atua an nopan iyehki,
28is lep aiji an nuhup iran an nopan iyehki a Finehas, inhal u Eliesar, inhal u Eron,) um ika, Ecrumu lep aketo aijama um apan um ati nedoa vai ilpu etwama ilpu mapoi Benjamin, ka ecrumu udei ra aijama? Is ika a Ihova, Akumu apan aijaua; vaig inig nikavaig, ekpu atcijai ra imraig ainyak irai ikmamia.
29Eris ikni atimi a nup Isreel mika eri imiiris ara um arehed irai Cibea.
30Eris aridjipan a nup Isreel an nadiat dirt, um aat irai ilpu mapoi Benjamin, um atah ira ra Cibea, is idivaig an nopan iyehki.
31Eris apan itac a ilpu mapoi Benjamin, um aat ira atimi, eris lep eipai pan ra vai inmaliyum; eris atupun ara um auud atimi, um atgei, is idivaig an nopan iyehki, irai efalaig alupas erahki, et aridjipan et ethi an neom u Atua, et lep aridjipan et eche irai Cibea anliin pece, is idivaig natimi is dirte irai up Isreel.
32Eris ika a ilpu mapoi Benjamin, Inta atgei ra akaija is idivaig an nopan uhup. Ja eris ika a nup Isreel, Ti aha akaija, um eipai pam ra vai inmaliyum irai efalaig alupas.
33Eris atidaijai a nup Isreel asega ahes an nuarin ura, um atah ira ra Beal-temar: eris lep ahes irai uarin atpuh iran ura a ilpu atimi imiiris, eris ahes irai mai ij irai Cibea ara.
34Eris apan a ilpu atimi emda is ten dausant (10,000) irai up Isreel asega, is ipjin nedoa: ja eris eti ato a ilpu mapoi Benjamin mika is ubutpotet pan ira ra nohocred.
35Is auud ilpu mapoi Benjamin a Ihova an nuhup u nup Isreel; eris auahas atimi is twente faiv dausant im wun huntret (25,100) irai ilpu mapoi Benjamin a nup Isreel an nadiat iyehki: eris apos nij va atimi ara sji ehki asega.
36Eris idim ecetai a ilpu mapoi Benjamin mika, eris auud nup Isreel is idivaig an nopan iyehki: eris aha a nup Isreel an nuhup u ilpu mapoi Benjamin, vaig inig nikavaig, eris asgeig ara irai ilpu atimi imiiris iji ig eris ikni ra ara par arehed irai Cibea.
37Eris auroauro a ilpu atimi imiiris, um teloteloh pan irai Cibea; eris apan ara anliin, um ati nedoa, um atgei nup uran maliyum asega.
38Eris uhup a nup Isreel im ilpu atimi imiiris, um ehrati nitai asjaaicnaig inigki, nikavaig, eri ago nalaume im nadran cap alupas ara par aridjai an maliyum.
39Eris wat ahapan a nup Isreel an nedoa, eris atupun a ilpu mapoi Benjamin, um auud, um atgei irai up Isreel is idivaig natimi is dirte: eris idim ika ara, Et idim inveijec inta mun auud ra akaija, et idivaig an nedoa uhup.
40Ja is wat atupun nalaume im nadran cap alupas par aridjai an maliyum, eris easpan itac ira ra a ilpu mapoi Benjamin, um ecetai nalaume an maliyum par aridjai an nohatag.
41Eris wat ahidaig pan ra a nup Isreel, eris imtitaig alupas a ilpu mapoi Benjamin: eris idim ato ara mika is yetpan ira ra nohocred.
42Va nitai inigki eris atidjira ara an nuhup u nup Isreel, um aha alaig apan an namasacen; ja is uhum pan ira ra nedoa; eris lep ahes an maliyum ara sji ehki, eris auahas ilpu mapoi Benjamin juju an nibla ra a nup Isreel.
43Is uce eris arehed irai ilpu mapoi Benjamin ara, um ahau ra, um tup auwihi ra an nuarin ehnain pan irai Cibea an ridjai o un.
44Eris atgei irai ilpu mapoi Benjamin atimi is eetiin dausant (18,000); eris ilpu atimi emda ara sji ehki asega.
45Eris adumoij pan ara sji ehki eris eled, um aha alaig apan an namasacen an mun nij Rimmon: eris atgei atimi is faiv dausant (5,000) ira ra ara irai efalaig alupas; eris lep ahau pan emda ra ara um yetpan irai Cibeon, um atgei atimi is tu dausant (2,000) ira ra.
46Eris atimi is twente faiv dausant (25,000) ara asega irai ilpu mapoi Benjamin eris atgei ra an nadiat iyehki; eris ilpu atimi emda ara asega um apos nij va atimi.
47Ja eris adumoij pan natimi is siks huntret (600) um ahapan an namasacen an mun nij Rimmon, um amen an mun nij Rimmon irai mohoc is for.
48Eris adumoij pan a nup Isreel, um aat irai ilpu mapoi Benjamin iji ig eris eled, um ago nedoa vai ra, um atgei nup urai iji maliyum, im niji itai eklim edo irai pece, niji itai umumoh asega marom: eris lep ahli niji maliyum asega iji ig eris yetpan ira ra ara.
Currently Selected:
Ilpu Atimi Tas Alep Nuarin-tas alupas 20.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)