Ilpu Atimi Tas Alep Nuarin-tas alupas 19.
Nuarin-tas alupas 19.
1 Et apan an maliyum, Bedlehem tah mapoi Livai mika yi imiadumoij pan ehgan aien. 16 Et aiheuc vai yin tah nefatimi an maliyum, Cibea, um leh yin an neom o un. 22 Era auahas ehgan a nup u Cibea, ja is mas aien. 29 Et atiakoai nohun aien irai uarin is twelv, um imiapan irai elcau is twelv u nup Isreel.
1AN nopan iyehki is wat eti eteuc tah natimarid an pece Isreel, is amen an nahaijin nedoon Ifreem tah mapoi Livai, is leh naheca atahig is ethi ehgan aien an maliyum Bedlehem-juta.
2Is esjum vai yin a ehgan, um ago ingeijid, um udei yin, um apan an nimnim u etman an maliyum Bedlehem-juta, um amen eahki irai mohoc is for.
3Is atidai a natamnyu un, um apitac yin, mika yi tas updak ehelen, um imiadumoij pan yin, is ahced yin a naheca atamaig o un, im lep togke is ero: is imiapan yin an neom u etman a ehgan: is wat ecet yin a etmai intakata, is imiacitak aien par ehtet iran.
4Is aminjinaig yin a etmai ehgan; is amen ehelen ira adiat is dri: eris hag ara, um umwig, um amen eahki.
5Is wat yetpam nadiat ford, eris wat atidai an nuhihialeg ara, is atidai aien mika yi atga o un aien: is ika ehele natimi a etmai ehgan, Namu caig tah nitai caig aiek, um imiatamaig nohum, ja par apitac aiek um atga unyum.
6Eris ateucse arau, um ehrahag um ehraumwig: is idim ika ehele natimi a etmai ehgan, Aiheuc vai nyak aiek, um eklim amen an nepig asega, etmu lep imiacitak inliinmopom aiek.
7Is wat atidai a natimi mika yi atga o un, is imiisjis vai yin a etmai ehgan: va nitai inigki is lep amen eahki aien.
8Is atidai an nuhihialeg aien an nadiat fiftd, mika yi atga o un: ja is ika a etmai ehgan, Aiheuc vai nyak aiek, um imiatamaig nohum. Erus amen arau um yetpan jupki, erus lep hag arau.
9Is wat atidai a natimi mika yi atga o un, aien, im ehgan, im naheca o un, is ika ehelen a etmai ehgan, Almoi, et ubutpotet pan u nepig, aiheuc vai nyak aiek, um amen an nepig asega: et idim jupki, amen igcaki aiek, mika yi imiacitak inliinmopom; ja et wat lahlah an tak apnyin, fi auroauro aijautaij an nuhihialeg, um atga unyimitaij, um yetpan an nimnim unyum.
10Ja is esjum a natimi par amen an nepig iyehki, va nitai inigki is atidai aien um atga o un, um yetpan an nuarin inig is ehnain pan Jibus, Jerusalem marom; is eteuc ehelen togke is ero eris atijai satel iran, is lep ahced yin a ehgan.
11Ehtijis wat ubutpotet u Jibus ahtaij, is atiih nadiat; is lep ika a naheca ehele natimi alupas o un, Et upene mika tijpu apan akataij an maliyum inigki u nup Jibus, um amen iran.
12Ja is ika ehelen a natimi alupas o un, Ehtijpu eti apan eahki akataij an maliyum u nup urai pece et eche, era eti up Isreel ara: ehtijpu apan akataij an maliyum Cibea.
13Is ika ehele naheca o un aien, Apan aiek, ehtijmu yetpan irai tah inmaliyum eraigko akataij; par amen iran an nepig, nikavaig, Cibea, ka Rema.
14Ehtijis alaig apan an nefalaig u ehtaij ahtaij; ehtijis wat ubutpotet pan an maliyum Cibea ahtaij, an pece Benjamin, is ete nagesega vai ra.
15Ehtijis adumoij pan eahki ahtaij, par apan um amen eahki an maliyum Cibea: ehtijis wat apan anliin ahtaij, ehtijis ateucse ahtaij an nefalaig is ethi an maliyum: vaig inig nikavaig, is eti imiacaij ehtaij tah natimi, mika tijpu amen an neom o un ahtaij.
16Ja is ahes an nauritai o un an nahapol a nefatimi is ethi an jupura, is lep up u nedoon Ifreem aien; is amen Cibea aien: ja eris ilpu mapoi Benjamin a nup uran maliyum iyehki.
17Is wat easpan aien, is ecet natimi atga an nefalaig is ethi aien an nefalaig an maliyum: is ika a nefatimi, Na apan eda aiek? na ahes eda aiek?
18Is ika ehelen aien, Ehtaij ahes irai Bedlehem-juta aijumtaij, um alaig apan an nahaijin nedoon Ifreem; ek up eahki ainyak: kis apan ehele Bedlehem-juta ainyak, ja ek apan an neom u Ihova an nopan inig ainyak; ja et eti leh nyak an neom o un tah natimi.
19Ja et eteuc incei korn im nitai caig incai togke eraigki et ero unyak; et lep eteuc nitai caig im nide vaine imtak, im lep imi intakata, im lep imi intakuras inig et ahced cumrau: et eti ti tah nitai.
20Is ika a nefatimi, Kaiheuc vai euc; ja ekmu alaamia nitai imiatamaig nohumia ainyak; jam jim amen an nefalaig aijautaij.
21Is imiapan ehtaij anliin neom o un aien, um alaa togke nitai caig: ehtijis yiri neduei tijis ahtaij, um hag um umwig.
22Eris wat ago imiacitak inliinmopora ara, eris arehed an neom hal atimi auatatimi, irai up uran maliyum, um auud intapnes, um tas ehele natimi alupas an neom, nefatimi iyehki, um ika, Imalau ijo natimi inig et mun ham anliin neom unyum aien, mika ecri ato yin aijama.
23Is alau ijo ehele ra a natimi iyehki, natimi alupas an neom marom, um ika ehele ra, Oʼo, ak ilpu etwak, oʼo, aiheuc vai nyak aijaua, um jim ago nedo has esjilid inigki; vaig inig nikavaig, et mun ham anliin neom unyak a natimi inigki, jim ago nedo maumau inigki aijaua.
24Almoi, inhalav atahig unyak mun igki, et atahig aien, im lep ehgan; inki imialau ijo rau ainyak an nopan inig, amen ehele rau aijaua, um ago vai rau nedo inig eka merit vaig aijaua: jam jim ago nedo inig er amcelvaig va natimi inigki.
25Ja eris esjum natimi par atahaijeg intas o un: va nitai inigki is leh ehgan a natimi iyehki, um imialau ijo yin imi ra; eris amen ehelen ara, um auahas yin an nepig asega um yetpan an nuhialeg: ja eris atcijaig yin ara an nauhoig yi amud an nadiat,
26Is apan a intakata iyehki an nathut an nadiat, um eropse an neucse neom u natimi iyehki, is amen an neom o un a natamnyu un, um asjeuc um yetpan an nopan lah.
27Is atidai an nuhialeg a natamnyu un, um asalgei intapnes an neom, um alau ijo mika yi atga o un aien: ja is eropse an neucse neom a intakata iyehki ehgan, is lep amen nikman is ero an nuarincai atgeig sepamki an neucse neom.
28Is ika ehelen aien, Atidai aiek, ehtijmu apan akataij. Ja is eti tas tah. Is lep atijai yin irai togke is ethi o un a natamnyu un, is lep atga o un a natimi, um yetpan an nimnim o un.
29Is wat yetpan an neom o un aien, is leh nauitoga aien, um asjiraig ehgan, um atiakoai nohun irai uarin is twelv, um imiapan yin irai uari pece asega u nup Isreel.
30Eris ika natimi asega eris ecetai ara, Eris eti ago tah nedo et idivaig nedo inigki, um eti ecetai, ahes an nopan iyehki eris udei inpece Ijipt a nup Isreel, um imihum pam an nopan inig: aktaktai aijaua, tas jipe, um asuptecnaig intas unyimia.
Currently Selected:
Ilpu Atimi Tas Alep Nuarin-tas alupas 19.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)