Ilpu Atimi Tas Alep Nuarin-tas alupas 18.
Nuarin-tas alupas 18.
1 Era abraig pan atimi et faiv a ilpu mapoi Tan, mika eri ahilek nuarin pece vai ra. 3 Era tas jipe ara im Jonadan an nimnim u Maika, et ago emda inliinmopora aien par apan. 7 Era ahilek inpece Lisem ara, um adumoij pan, um tas upene vaig. 11 Era ikni atimi et siks huntret (600) ara, mika eri apan um atoraliak. 14 An natga ura era ahneg vai Maika ara natimi ahlap o un im niji itai itap o un. 27 Era atoraliak Lisem ara, um anvi nidan par ika Tan. 30 Era atijai nalaigaheni vai atmasimai ara, um ikni Jonadan im ilpu halav atamaig o un, mika eri ilpu atimi ahlap vai ra.
1AN nopan iyehki is eti eteuc tah natimarid an pece Isreel: im lep inig, an nopan iyehki eris ahilek nuarin pece amen iran a ilpu mapoi Tan; vaig inig nikavaig, eris eti leh nahaijin pece asega ura ara irai elcau u nup Isreel um imihum pan an nopan iyehki.
2Eris abraig pan atimi is faiv a ilpu mapoi Tan irai elcau ura an pece ura, ilpu atimi emda, an maliyum Sora, im inmaliyum Esteol, mika eri ahilek inpece ara, um ato vaig; eris ika ehele ra ara, Apan aijaua, um ahilek inpece: eris wat yetpan an nedoon Ifreem ara, an nimnim u Maika, eris atumop eahki ara.
3Eris wat ubutpotet u nimnim u Maika ara, eris ato nohrai intakuras iyehki mapoi Livai: eris ahidai ra ara um apan anliin, um ika ehelen, Is imiapam euc igcaki a di? na ago inhe aiek igcaki? inhe nauritai unyum igcaki?
4Is ika ehele ra aien, Et a itai a Maika vai nyak, um alupai nyak tah nimtan, ek lep atimi ahlap vai yin ainyak.
5Eris ika ehelen ara, Aiheuc vai cama aiek, um ahodai itai ira Atua, mika ecri ato aijama el etpu upene vai cama nefalaig inig ecra atga iran aijama, koʼo.
6Is ika ehele ra a natimi ahlap, Atga unyimia aijaua an nigpa: et uhup iramia a ihova an nefalaig inig eka atga iran aijaua.
7Eris atga ura ara natimi is faiv, um yetpan Lisem, um ecet atimi amen iran, eris tup amen ara um eti aktaktai, et idivaig nup u Saiton, eris igpa ara, um eti imtitaig vaig tah nitai; is eti eteuc tah natimi tas alep an pece ura mika yi auoh ehcamai ra vaig tah nitai; eris amen itac acen ara vai nup u Saiton, eris eti uhum jipe ara im natimi et eche.
8Eris adumoij pan ehele ilpu etwara ara irai maliyum Sora im Esteol: eris ika ehele ra a ilpu etwara, Neveh tas unyimia?
9Eris ika ara, Akumu atidai aijaua, mika ti aridjipan akaija, um aat ira ra: ecra mun ecetai inpece aijama, et idim upene: akumu fi auroauro aijaua, um jim esjum par apan, um atoraliak, um ohuun inpece iyehki.
10Aku wit apan aijaua, akupu yetpan ira atimi aijaua era tup amen ara, et lep alupas inpece iyehki, nuarin inig marom et eti ti tah nitai et eteuc an nobohtan: etpu atcijaig an nikmamia a Atua.
11Eris ahes eahki irai elcau u ilpu mapoi Tan, irai maliyum Sora im Esteol, natimi is siks huntret (600) eris apos nij va atimi ara.
12Eris aridjipan ara, um athai eom atga ura ubutpotet pan Kirjad-jiarim, an pece Juta: va nitai inigki eris anvi nidan nuarin iyehki par ika Maheeni-tan (Nuarin amen u ilpu mapoi Tan) um imihum pam an nopan inig: et idim eteuc an nahaijin Kirjad-jiarim an ridjai o un.
13Eris ahes eahki ara um yetpan an nedoon Ifreem, um lep yetpan an nimnim u Maika.
14Eris tas natimi is faiv eris apan ara par ahilek inpece, um ika ehele ilpu etwara, Akumu ato aijaua mika et eteuc an nimnim inigki niji itai itap, nikavaig, efot, im nalmu itai, im natmasimai auud ugnyit, im natmasimai hat; va nitai inigki aktaktai aijaua nedo inig akupu ago aijaua.
15Eris ahidai pan ra eahki ara, um yetpan an neom u intakuras iyehki mapoi Livai, an nimnim u Maika, um aiheuc vai yin.
16Eris aiji an neucse nirahed natimi is siks huntret (600) eris apos nij va atimi, irai ilpu mapoi Tan.
17Eris aridjipan natimi is faiv eris apan ara par ahilek inpece, um apan anliin neom, um atipagki natmasimai auud ugnyit, im natmasimai hat, im efot, im niji almu itai: is aiji a natimi ahlap an neucse nirahed ehele atimi is siks huntret (600) eris apos nij va atimi ara.
18Is uce eris apan anliin neom u Maika natimi iji ehki, um imialau ijo natmasimai auud ugnyit, im efot, im niji almu itai, im natmasimai hat. Ja is ika ehele ra a natimi ahlap, Eka ago inhe aijaua?
19Eris ika ehelen ara, Namu jim tas aiek, atijai nikmam an nipjineucsem, um ahced cama, mika an etmama, im natimi ahlap vai cama: et eti upene mika an atimi ahlap va nup an nimnim u natimi et ethi ache, ja et upene mika an atimi ahlap vai ilpu eteuc an nelcau et ethi u nup Isreel.
20Is imiacitak inliinmopoi natimi ahlap, is leh efot aien, im niji almu itai, im natmasimai auud ugnyit, im natmasimai hat, um apan an nibla atimi.
21Is uce eris adumoij pan ara um atga ura, um ikni an nuhup ura ilpu halav, im niji itai eklim edo irai pece, im naga ura.
22Eris wat ahes an nimnim u Maika ara jam eti itac acen, eris asjapicnaig a ilpu atimi iji ig is eteuc niji eom ura ubutpotet pan an nimnim u Maika, um uhum ilpu mapoi Tan.
23Eris ahlaig ijinies vai ilpu mapoi Tan ara. Eris ahidai nesgaiimtara ara, um ika ehele Maika, Na a uri aiek par apitac cama, aiek im niji ira atimi?
24Is ika aien, Eka mun iknipagki ilpu atua unyak aijaua kis ago ainyak, im lep natimi ahlap, um lep atga unyimia aijaua: et lep eled inhe imi nyak? im lep inhe intas inig eka asaig ehelek aijaua, Na a uri aiek?
25Eris ika ehelen a ilpu mapoi Tan, Uhmu jim ahgei nohram ehelema, va eri jim teloteloh pan iram ilpu atimi edemda, um atgei euc, im lep nup an nimnim unyum.
26Eris atga ura ara a ilpu mapoi Tan: is wat ato a Maika mika eris emda ara um esjilid iran, is adumoij aien um apan an nimnim o un.
27Eris lucsei nitai itap iji ig ara is ago aien, im natimi ahlap iyehki is amen ehelen aien, um yetpan Lisem, ehele atimi iji ig eris amen igpa ara, um eti imtitaig vai tah natimi: eris ati nedoa vai ra ara, um atgei ra, um atnamud inmaliyum ura an cap.
28Is eti eteuc tah natimi imiatamai ra, vaig inig nikavaig, eris itac acen ara vai nup u Saiton, is eteuc inmaliyum ura an niskanse iyehki et ubutpotet Bed-rihob; eris lep eti uhum jipe ara im natimi et eche.
29Eris actaig inmaliyum a ilpu mapoi Tan, um amen iran. Eris anvi nidai inmaliyum ura ara par ika Tan, nilpun nidai Tan mapora, eris apos yin imi Isreel: ja is upyi idai inmaliyum iyehki Lisem.
30Eris atijai natmasimai auud ugnyit u Maika a ilpu mapoi Tan: is atimi ahlap vai ilpu mapoi Tan a Jonadan, inhal u Cersom, inhal u Manasi, im ilpu hal o un, um yetpan an nopan imiapan atimi an taka pece.
31Eris atijai natmasimai auud ugnyit u Maika ara, is ago aien, an nopan asega is amen an maliyum Sailo neom u Atua.
Currently Selected:
Ilpu Atimi Tas Alep Nuarin-tas alupas 18.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)