Ilpu Atimi Tas Alep Nuarin-tas alupas 16.
Nuarin-tas alupas 16.
1 Et ahapan an maliyum Cesa a Samson, um imiapan niji tapnes an maliyum. 4 Era alupai Telila nimtan a nup u Filistia, et oop Samson aien. 6 Et ecedri imiahnag yin a Samson. 15 Ja et par apitac aien um esjilid iran. 21 Era arop iran a nup u Filistia, um ago apat nesganimtan. 22 Is wat lep eteuc nemda o un, is alcapdicraig neom aien irai up u Filistia, ja is pah mas aien.
1AN nopan iyehki is apan an maliyum Cesa a Samson, um ecet intakata has eahki, um amen ehelen.
2Eris asuptecnaig ehele nup u Cesa hal ra, um ika, Et mun apam igcaki a Samson, eris arehed iran ara, um atpaijinaig yin an neucse nathatahau an nepig asega, eris igpa ara an nepig asega, um ika, Etu wit lahlah an nuhialeg, intupu atgei yin akaija.
3Is asjeuc a Samson um yetpan an nijihgan nepig, ja is atidai aien an nijihgan nepig, um leh intapnes is ero an neucse nathatahau an maliyum, im nauincai aduwi is ero, im lep naui aiurn, um atijai an neuhlin is ero, um apos pan um aridjai an lolan nedoon et ehnain pan Hibron.
4Ja is wat ti pan itac nitai iji igki, is aiyu inliinmopon aien vai intakata is ethi an niskanse Sorek, nidan Telila.
5Eris aridjipan ehelen a ilpu atimarid u nup u Filistia, um ika ehelen, Namu oop yin aiek, um ato nitai inig et eteuc nemda alupas o un iran, im lep nedo inig etpu tup upene irama vaig par emda um esjilid iran, mika ecri arore yin aijama par auoh ohocred yin: ecrupu lep alupai euc niji uari silver inyi eleven huntret (1,100) aijama, athi um athi ehni.
6Is ika a Telila ehele Samson, Namu aiheuc vai nyak aiek, um asuptecnaig ehelek nitai inig et eteuc nemda alupas unyum iran, im nitai inig et tup upene iran par raore euc vaig, mika uhpu auoh ohocred euc.
7Is ika ehelen a Samson, El era arore nyak ara irai wau mat inyi seven eris idim eti ago mese, ekpu auatialidi ainyak, um idivaig tah natimi et eche.
8Eris imiapan ehelen a ilpu atimarid u nup u Filistia inwau mat is seven eris idim eti ago mese, is arore Samson iran aien.
9Eris wat amen ehelen natimi an nuarin neom o un, um atpaijinaig yin, is ika ehelen aien, Ak Samson, erupu atgei euc a nup u Filistia. Is esjamud niji wau aien, et idivaig eh esjamud inya aijema et wat atcei pan incap. Va nitai inigki eris eti ato nohuun nemda o un ara.
10Is ika a Telila ehele Samson, Na mun ago nedo efaifa vai nyak aiek, um asan tas ahcil ehelek: namu aiheuc vai nyak aiek, um asuptecnaig ehelek nitai inig, et tup upene mika eri arore euc vaig.
11Is ika ehelen a Samson, El era arore nyak ara irai jaula mat, eris eti ago tah nauritai iran, ekpu auatialidi ainyak, um idivaig tah natimi et eche.
12Va nitai inigki is lucsei jaula mat a Telila, um arore yin iran. Eris wat amen an nuarin neom o un natimi, um atpaijinaig yin, is ika ehelen aien, Ak Samson, Erupu atgei euc a nup u Filistia. Is esjamud niji jaula irai ikman is ero aien et idivaig inya.
13Is ika a Telila ehele Samson, Na mun ago nedo efaifa vai nyak aiek, um asan tas ahcil ehelek um imihum pam an nopan inig: namu asuptecnaig ehelek aiek nitai inig et tup upene mika eri arore euc iran. Is ika ehelen aien, El et ahod nuhud numri nidjinik et seven ira apelumai aiek um ago ipjin ehele pin, ekpu auatialidi ainyak um idivaig tah natimi et eche.
14Is wat umjeg a Samson, is ahod nuhud numri nidjinin is seven ira apelumai a Telila, um ago ipjin ehele pin, um ika ehelen, Ak Samson, erupu atgei euc a nup u Filistia, Is aijilahlah aien va numjeg o un, um atidai, um lehpan pin an ceen nitai ahod im napelumai.
15Is ika ehelen a Telila, Et ehka vai euc par ika, Ek merit vai euc ainyak, et wat eti amen ehelek inliinmopom: na mun ecedri ago nedo efaifa vai nyak aiek, um eti asuptecnaig ehelek nohuun nemda alupas unyum.
16Is wat imiedohalav yin irai iji adiat an tas o un aien, um imiisjisitai, um auahas inliinmopon, is idivaig is ubutpotet u inmas o un aien;
17is lep asuptecnaig inliinmopon asega ehelen aien, um ika ehelen, Is eti yetpan an nidjinik tah resor; kis idim atimi Nasari imi Atua ainyak, ahes an napos vaig unyak um imihum pam an nopan inig: el eh ucsei nyak, etpu udei nyak nemda unyak, ekpu lep auatialidi ainyak, um idivaig tah natimi et eche.
18Is wat ato a Telila mika is asuptecnaig ehelen inliinmopon asega, is abraig pan aien um ahlaig vai ilpu atimarid u nup u Filistia, um ika, Akumu ecethi ache aridjipam aijaua, et idim asuptecnaig ehelek inliinmopon asega aien. Eris aridjipam ehelen a ilpu atimarid u nup u Filistia, um lehpam mune irai ikmara.
19Is ika a Telila yi umjeg an nijin neduon a Samson; is ahlaig a Telila vai natimi is ethi, is lep ika aien yi ucsei nuhud numri nidjini Samson is seven; is lep atupun a Telila um auoh ohocred yin, is idim udei yin nemda o un.
20Is ika aien, Ak Samson, erupu atgei euc a nup u Filistia. Is aijilahlah va numjeg o un aien, um ika, Ekpu alau ijo ainyak et idivaig irai opan iji ehki, um auhohaig nyak. Ja is eti ato aien mika is atcijaig yin a Ihova.
21Ja eris arop iran a nup u Filistia, um ago apat nesganimtan is ero, um imiapan yin an maliyum Cesa, um arore yin irai atau bras, um ika yi irara flaur aien an neom ipjin.
22Ja is wat ti pan itac nucsei numri nidjinin, is lep atupun um heto.
23An nopan iyehki eris asjapicnaig a ilpu atimarid u nup u Filistia, mika eri ahlap an nitai ahlap alupas ara vai Tecon natmas ura, um imiacitak: eris idim ika ara, Et mun atcijaig irai ikmaija Samson natimi edemda vai caija a natmas uja.
24Eris wat ecet Samson natimi, eris imiahpas natmas ura ara: eris idim ika ara, Et mun atcijaig imi caija a natmas uja natimi edemda vai caija, is auahas inpece uja aien, um atgei atimi is ahinag iraija.
25Is wat cediaig inliinmopora ara, eris ika ara, Ahlaig vai Samson, mika yi ago nedo imiacitak vai caija aien. Eris ahlaig vai Samson ara an neom ipjin; is ago nedo imiacitak vai ra aien: eris lep ati yin ara juju an niblan noboatau is ero.
26Is ika a Samson ehele intakuras iyehki is atau iran an nikman aien, Aiheuc vai nyak aiek, um asjaaicnaig vai nyak noboatau et ero et apos neom inigki, mika ki asgeig iran ainyak.
27Eris ohua an neom a ilpu atamaig im ilpu takata; eris asjapicnaig eahki a ilpu atimarid asega u nup u Filistia; eris amen an lolan neom a ilpu atamaig im ilpu takata is idivaig is dri dausant (3,000), eris easpan Samson ara is wat ago nedo imiacitak aien.
28Is ahlaig vai Ihova a Samson, um ika, Ak Ihova Natimarid, aiheuc vai nyak aiek, um imiehva nyak; ak Atua, aiheuc vai nyak aiek, um ecethi ache ago emda nyak, mika ki fi auroauro ainyak, um aru irai up u Filistia vai nesganimtak et ero.
29Is asjiraig noboatau eraigko is ero juju aien, is aiji iran neom iyehki, eris lep apos neom iyehki vaig, noboatau is ethi an matan, im noboatau is eche an mauun.
30Is ika a Samson, Ekmu mas ainyak pan irai up u Filistia. Is atpuse aien an nemda asega o un; is achadaliek neom ijinies irai ilpu atimarid, im lep ira atimi asega amen iran. Va nitai inigki is atgei an mas vaig o un aien atimi is ahinag acen ira atimi iji ehki is atgei ra aien an numoh vaig o un.
31Eris lep asuol sepan a ilpu etwan asega, im ilpu atimi ehpan iran asega, um leh yin, um imiaridjai yin, um atelmoi yin an netheso o Manoa etman, juju an niblan maliyum Sora im inmaliyum Esteol. Is tas alep vai nup Isreel aien irai mesese is twente.
Currently Selected:
Ilpu Atimi Tas Alep Nuarin-tas alupas 16.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)