Ilpu Atimi Tas Alep Nuarin-tas alupas 15.
Nuarin-tas alupas 15.
1 Era atapnes ehgai Samson vai yin ara. 3 Et ahli korn u nup u Filistia aien irai kuri aleg im nisincai. 6 Era atnamud ehgan im etmai ehgan an cap a nup u Filistia. 7 Et auud ra aien, um atgei atimi et ahinag. 9 Era arore yin a nup u Juta, um atcijaig yin imi nup u Filistia. 14 Et atgei ra aien an neduon nahpai togke. 18 Et ago nimtanwai Enhakkori vai yin a Atua i Remad-lihai.
1Ja is wat ti pan itac hal opan, an nopan eldei hwiit, is ateghe ehgan a Samson, um leh pan inhakli nanin imi yin; is um ika aien, Inki apan ainyak ehele ehgak an nuarin neom o un. Ja is atapnes yin a etmai ehgan vai yi jim apan anliin aien.
2Is ika a etmai ehgan, Kis idim aktaktai ainyak mika is acen asega inliinmopom aiek vai yin; va nitai inigki kis ahtai yin ainyak imi napa unyum: ja et idim eklim upene um esjilid iran a etwan inharei, et upene irak mika an leh yin aiek par isjeupigmoig yin.
3Is tas vai ra a Samson, um ika, Etpu ehka vai ra par atijai tah nitai irak, el ek auahas inliinmopoi nup u Filistia ainyak.
4Is apan a Samson um arop irai kuri aleg is dri huntret, um lucsei isincai, um ati nilauun is ethi imi nilauun is ethi, um ati nisincai juju an niblan nilauun is ero.
5Is wat atni niji isincai aien, is atcijaig niji kuri aleg aien irai korn umoh u nup u Filistia, um atnamud niji uhud korn, im korn umoh, im lep okoro vaine, im okoro oliv.
6Eris um ika a nup u Filistia, Et mun ago nedo inigki a di? Eris um ika hal ra, Samson, nohanig u nat naico nup u Timnad, vaig inig nikavaig, is atipagki ehgan aien, um ahtai yin imi napa o un; Eris aridjipam a nup u Filistia, um atnamud yin im etman an cap.
7Is ika ehele ra a Samson, Eka mun idim ago nedo inigki aijaua, ja ekpu aru iramia ainyak; ja etpu apitac ainyak um atumop.
8Is auud ra aien nikmara im neduora, um atgei atimi is ahinag: is asuol aien um amen an mun nij is ethi Itam.
9Eris aridjipan a nup u Filistia, um athai eom atga ura an pece Juta, um imiterimterim ra an nuarin pece Lihai.
10Eris ika natimi an pece Juta, Eka a uri aijaua par apam um aat irama? Eris ika ara, Ecra apam aijama mika ecri arore Samson aijama, um ago vai yin et idivaig et mun ago vai cama aien.
11Eris aridjipan an lolan nij Itam natimi is dri dausant (3,000) an pece Juta, um ika ehele Samson, Na idim ato aiek mika era esjilid iraija a nup u Filistia; neveh nedo inigki na mun ago vai cama aiek? Is ika ehele ra aien, Ek mun ago nedo inigki vai ra ainyak et idivaig nedo iyehki eris ago vai nyak ara.
12Eris ika ehelen ara, Ecra mun asuol aijama mika ecri arore euc aijama, um atcijaig euc an nikmai nup u Filistia. Is ika a Samson ehele ra, Akumu asig yi aktit intas ehelek aijaua, mika akupu eti atgei nyak aijaua.
13Eris tas ehelen ara, um ika, Oʼo; ja ecrupu aroraktit euc aijama, um atcijaig euc an nikmara: ja ecrupu idim eti atgei euc aijama. Eris arore yin ara irai jaula mat is ero, um imasuol yin an mun nij iyehki.
14Is wat yetpan an nuarin pece Lihai aien, eris auarehrara vai yin a nup u Filistia: is lep amen alupas ehelen a Nesgai Ihova, is idim takitai um idivaig inya er ahli injaula eraigki eris arore yin iran, eris ahiyi nikman is ero.
15Is ecetai neduon neucse togke mat aien, um ada nikman, um leh, um auud, um ahau pan atimi is wun dausant (1,000).
16Is ika a Samson, An neduon neucse togke, niji ira atimi irai iji ira atimi; an neduon neucse togke, ek mun auud ainyak um ahau pan atimi et wun dausant (1,000).
17Is wat tas ehni aien, is ethaigse neduon neucsen an nikman aien, um anvi nidan nuarin iyehki par ika Remad-lihai (Nethaigse neduon neucsen).
18Is ahvig alupas inwai aien, um ahlaig vai Ihova, um ika, Na mun ika aiek ki imiatamaig alupas cama ainyak naheca unyum: ja ekpu mas ainyak va nahvig inwai, um eropse an nikmai ilpu atimi iji ig eris eti aperitome ira ra, ka oʼo?
19Ja is asalgei nuarin nobohtan a Atua Remad-lihai, ja is par apitac um ahes inwai iran; is wat umnyi inwai aien, is nusjai aien, um umoh: va nitai inigki is anvi nidan nimtanwai iyehki aien par ika En-hakkori (Nimtanwai eris ahlaig vaig), et eteuc an nuarin pece Remad-lihai um imihum pam an nopan inig.
20Is tas alep aien vai nup Isreel irai mesese is twente an nopan iyehki, eris wat esjilid ira ra a nup u Filistia.
Currently Selected:
Ilpu Atimi Tas Alep Nuarin-tas alupas 15.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)